استانا كاسىپكەرلەرىنە قازاق ءتىلىن تەگىن ۇيرەتەدى
28 قىركۇيەك, 14:12

استانا كاسىپكەرلەرىنە قازاق ءتىلىن تەگىن ۇيرەتەدى

استانا. قازاقپارات - ەلوردا اكىمدىگى كاسىپكەرلەرگە كورنەكى اقپاراتتى دۇرىس راسىمدەۋگە كومەكتەسۋگە دايىن.

وسى ماقساتتا ەلوردالىق بيزنەسمەندەر ءۇشىن قازاق ءتىلىن وقىتۋ بويىنشا تەگىن قارقىندى كۋرستار ۇيىمداستىرىلدى، دەپ حابارلايدى قازاقپارات.

بۇل تۋرالى ەلوردا كاسىپكەرلەرىنىڭ « ءتىل تۋرالى» زاڭ تالاپتارىن ساقتاۋىنا ارنالعان ونلاين كونفەرەنسيا بارىسىندا استانا قالاسى تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى ايگەرىم مولدابايەۆا مالىمدەدى.

ونىڭ ايتۋىنشا، كۋرس ءبىر ايعا ەسەپتەلگەن جانە 24 اكادەميالىق ساعاتتان تۇرادى.

قاتىسۋ ءۇشىن كاسىپكەرلەر قاتىسۋشى سانىن كورسەتە وتىرىپ، ءوتىنىم بەرۋى قاجەت. كۋرس ۇيىمنىڭ ورنالاسقان جەرىندە ءوتۋى مۇمكىن.

«2021 -جىلعى 29-جەلتوقساندا مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كورنەكى اقپارات جانە ءدىني قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى. زاڭدى قابىلداۋدىڭ ماقساتى - ءتۇپنۇسقالىقتى ساقتاي وتىرىپ، ورفوگرافيا نورمالارىنا سايكەس دەرەكتەمەلەر مەن كورنەكى اقپارات ماتىندەرىن جازۋ، «ءماتىننىڭ ءتۇپنۇسقالىق اۋدارماسى» ۇعىمىن ەنگىزۋ. وسى زاڭ شەڭبەرىندە قازاقستان رەسپۋبليكاسىنىڭ 16 زاڭنامالىق اكتىلەرىنە تۇزەتۋلەر ەنگىزىلدى. ولاردىڭ ىشىندە كاسىپكەرلىككە قاتىستى «قازاقستان رەسپۋبليكاسىنداعى ءتىل تۋرالى»، «جارناما تۋرالى»، «ساۋدا قىزمەتىن رەتتەۋ تۋرالى» جانە «تۇتىنۋشىلاردىڭ قۇقىقتارىن قورعاۋ تۋرالى» زاڭدار بار. بۇل تۇزەتۋلەر مەملەكەتتىك ءتىل مارتەبەسىنە سايكەس كورنەكى اقپاراتتى مىندەتتى تۇردە پايدالانۋدى قامتاماسىز ەتۋگە باعىتتالعان. بۇل رەتتە ولار ورىس ءتىلىن قولدانۋدى شەكتەمەيدى»، - دەپ اتاپ ءوتتى ايگەرىم مولدابايەۆا.

ول زاڭنامالىق نورمالار مەملەكەتتىك جانە مەملەكەتتىك ەمەس ۇيىمداردىڭ دەرەكتەمەلەرىن جانە كورنەكى اقپاراتىن جازۋ ءتىلىن (تىلدەرىن) ناقتىلايتىنىن ايتتى.

مەملەكەتتىك ەمەس ۇيىمدارعا، اتاپ ايتقاندا كاسىپكەرلىك سۋبەكتىلەرىنە بلانكىلەردى، ماڭدايشالاردى تەك مەملەكەتتىك تىلدە، قاجەت بولعان جاعدايدا ورىس جانە (نەمەسە) باسقا دا تىلدەردە ورنالاستىرۋعا تاڭداۋ قۇقىعى بەرىلدى.

بۇل حابارلاندىرۋلار، جارناما، پرەيسكۋرانتتار، باعا بەلگىلەرى، مازىرلەر، كورسەتكىشتەر جانە باسقا دا كورنەكى اقپارات مەملەكەتتىك تىلدە مىندەتتى تۇردە، ورىس تىلىندە جانە باسقا تىلدەردە - قالاۋى بويىنشا جازىلاتىنىن بىلدىرەدى.

تاۋار (جۇمىس، كورسەتىلەتىن قىزمەت) تۋرالى، سونداي-اق ساتۋشى (دايىنداۋشى، ورىنداۋشى) تۋرالى اقپارات تيىسىنشە قازاق جانە ورىس تىلدەرىندە بەرىلۋگە ءتيىس.

مەملەكەتتىك ەمەس ۇيىمداردىڭ ماڭدايشالارىندا پايدالانىلاتىن، قازاقستاندا قورعالاتىن تاۋار بەلگىلەرى وزگەرىسسىز جازىلادى.

«ءتىل تۋرالى» زاڭنىڭ 21-بابىنا ەنگىزىلگەن تۇزەتۋلەردى ەسكەرە وتىرىپ، كاسىپكەرلەرگە كورنەكى اقپارات سالاسىندا جۇيەلى تۇردە جۇمىس جۇرگىزۋگە، تاۋار اتاۋلارىنىڭ، اس ءمازىرىنىڭ دۇرىس ءارى ساپالى اۋدارماسىن جاساۋعا كەڭەس بەرەمىز. سىرتقى جارناما ماتىندەرى مەن كورنەكى اقپاراتتىڭ ورفوگرافيالىق نورماعا سايكەس جازىلۋىن كەلىسۋ ماقساتىندا تەگىن كەڭەس الۋ ءۇشىن «قازاق ءتىلى قوعامىنا» جۇگىنە الاسىز. ءبىز سىرتقى جارناما ماتىندەرىندەگى جانە كورنەكى اقپاراتتاعى قاتەلەردى تۇزەتۋ جانە الدىن الۋ بويىنشا بىرلەسىپ جۇمىس ىستەۋگە دايىنبىز»، - دەپ اتاپ ءوتتى ايگەرىم مولدابايەۆا.

مەملەكەتتىك ءتىلدى وقىتۋ بويىنشا تەگىن كۋرستارعا كەلەتىن بولساق، قوسىمشا اقپارات الۋ ءۇشىن ەلوردا كاسىپكەرلەرى مىنا تەلەفوندارعا حابارلاسا الادى: 249052، 87051032662، 87781724273.

«2021 -جىلدىڭ قازان ايىندا قالالىق تىلدەردى دامىتۋ جانە ارحيۆ ءىسى باسقارماسى مەن ەلوردانىڭ كاسىپكەرلەر پالاتاسى اراسىندا مەملەكەتتىك ءتىل ساياساتىن ناسيحاتتاۋ، ءتىل سالاسىنداعى زاڭناما تالاپتارىن ءتۇسىندىرۋ جانە ورىنداۋ جۇمىستارىن جانداندىرۋ ماقساتىندا ەكىجاقتى ىنتىماقتاستىق تۋرالى مەموراندۋمعا قول قويىلدى. وسى مەموراندۋم اياسىندا ءبىز كاسىپكەرلەرگە ءتىل تۋرالى زاڭناما تالاپتارىنىڭ نورمالارىن ءتۇسىندىرۋ، ادىستەمەلىك كومەك كورسەتۋ، جارناما سالاسىنداعى وزەكتى ماسەلەلەر بويىنشا، كاسىپكەرلەردى مەملەكەتتىك تىلگە قارقىندى وقىتۋ كۋرستارىن ۇيىمداستىرۋ بويىنشا بىرلەسكەن جۇمىس جۇرگىزەمىز»، - دەپ ءتۇسىندىردى ديرەكتوردىڭ الەۋمەتتىك ماسەلەلەر جونىندەگى ورىنباسارى نۇرگۇل احمەتوۆا.


جاڭالىقتار