تۇركيا مەن بىرىككەن اراب امىرلىكتەرىنە باراتىن رەسەيلىكتەر كوبەيدى
28 قىركۇيەك, 13:56

تۇركيا مەن بىرىككەن اراب امىرلىكتەرىنە باراتىن رەسەيلىكتەر كوبەيدى

استانا. قازاقپارات – رەسەيدەن قاشقاندار جالعىز ءبىزدىڭ ەلدى عانا ساعالاپ جاتقان جوق. ت م د ەلدەرى جانە گرۋزيا مەن تۇركياڭىزدا دا وسى جاعداي جانە رەسەيلىكتەر تابان تىرەپ جاتقان تەك بۇل ەلدەر عانا ەمەس، دەپ حابارلايدى «حابار 24».

ەندى جۇرت اعىلعان سوڭ بۇل جاقتاردا دا باسپانا باعاسى قىمباتتادى. جىلجىمايتىن مۇلىكتى ساتىپ الۋ قۇنى دا، جالداۋ اقىسى دا ءوستى. ال رەسەيدىڭ وزىندە كەرىسىنشە سۇرانىس تومەندەگەن. ءيا، جارتىلاي موبيليزاتسيا تۋرالى جاريالانعاننان كەيىن ماسكەۋدە باسپانانى جالداۋعا دەگەن سۇرانىس 50 پروتسەنتكە دەيىن تومەندەگەن.

شەتەلدەن جىلجىمايتىن مۇلىك ساتىپ الۋ كەزىندە رەسەيىكتەردى كوبىنە گرەكيا، كيپر مەن پورتۋگاليا قىزىقتىراتىن. بۇل بىلتىرعى كورسەتكىشتەر. الايدا بيىل جاعداي وزگەردى. الدىمەن اقپاندا ۋكراينادا قارۋلى قاقتىعىس باستالدى. ەندى تاياۋدا جارتىلاي موبيليزاتسيا جاريالاندى. ەندى رەسەيلىكتەردىڭ دەنى تۇركيا مەن بىرىككەن اراب امىرلىكتەرىنەن باسپانا ساتىپ الاتىن بولعان. سونداي- اق يسپانيا، كيپر، مالتا، يزرايل سەكىلدى جىلى مەملەكەتتەرگە، كارىب باسسەينى ەلدەرىنە دە سۇرانىس جوعارى. بۇل باعىتتاردىڭ نەلىكتەن تانىمال ەكەنىن ساراپشىلار بىلاي تۇسىندىرەدى.

مارينا شالايەۆا، Knight Frank Russia كومپانياسىنىڭ ايماقتىق ديرەكتورى:

- بۇل ەلدەردە تۇرۋعا ىقتيارحات الۋ جەڭىلىرەك. سونداي- اق بيلىك شەتەلدىك ينۆەستورلارعا قاتاڭ شارت قويمايدى. شەتەلدەن باسپانا ساتىپ الۋ تۋرالى ساۋالدىڭ 70 پروتسەنتى تۇرۋعا ىقتيارحات نە ازاماتتىق الۋمەن بايلانىستى. بۇل باعىتتا تۇركيا مەن بىرىككەن اراب امىرلىكتەرىنە سۇرانىس جوعارى.

ءيا، كورشىلەس رەسەيدە موبيليزاتسيا جاريالاعان ساتتەن باستاپ تۇركياعا ۇشاق بيلەتتەرىنىڭ قىمباتتاعانىن ب ا ق وكىلدەرى جارىسا جازدى. ءتىپتى ەڭ قىمباتى ماسكەۋ - ىستامبۇل باعىتىندا 11 مىڭعا دوللار ساتىلعان. قازىردىڭ وزىندە ەكى ەل اراسىنداعى بيلەتتەر بىرنەشە اپتاعا ساتىلىپ كەتكەن. قىمبات بولسا دا سول بيلەتكە قول جەتكىزۋ قيىن. جالپى رەسەيلىكتەر وزدەرى جىلدا دەمالىسقا كەلىپ، ۇيرەنگەن انتاليا، ىستامبۇل، مۇعلا، يزمير جانە انكارا سەكىلدى قالالارعا كوپتەپ كەلىپ جاتىر. بۇعان دەيىن رەسەيدىڭ ءبىرقاتار قالالارىنان انتالياعا شامامەن 10 مىڭ تۋريست كەلەتىن. سوڭعى ەكى اپتادا ونىڭ سانى 25 مىڭعا جەتكەن.

كۋرورتتىق جەرلەرگە كەلەتىن چارتەر ۇشاقتارى دا قازان ايى بويى جالعاساتىنى بەلگىلى بولدى. بۇرىندا، قىركۇيەكتەن باستاپ توقتايتىن. ال ۇشاق بيلەتىنە قول جەتكىزە الماعاندار ارنايى ۋاتساپ توپتارىن قۇرىپ، قۇرلىق جولى ارقىلى قاي باعىتتى تاڭداعاندارىن ءبىر- بىرىمەن ءبولىسىپ جاتىر. قازىرشە ءدال قانشا كىسىنىڭ كەلگەندىگى بەلگىسىز. ءبىراق، ولاردىڭ الدەقايدا كوبەيگەنى انىق.

جەرگىلىكتى ب ا ق- تىڭ مالىمدەۋىنشە، رەسەيلىكتەر ورتاشا ءۇش اپتاعا قوناقۇيلەرگە رەزەرۆاتسيا جاساتقان. ال قوناقۇيدە تۇراقتاماعاندار انتاليادا تۇراتىن ءوز وتانداستارىنىڭ ءۇيىن ءۇش ايعا جالعا الىپ جاتىر. جالپى سوڭعى ايلاردا رەسەيلىكتەر تۇركيادا جىلجىمايتىن مۇلىك الۋ بويىنشا كوش باستاپ تۇر. ياعني كەينگى ءۇش ايدا تىپتەن كوپ. مىسالعا ماۋسىم ايىندا تۇركيادان 1887 رەسەيلىك باسپانا ساتىپ العان. ال شىلدەدە 1028، ال تامىز ايىندا تاعى 1238- ءى ءۇي الدى.

كورشىلەس ەلدەگى جاعداي، پاتەرلەردىڭ جالعا الۋ باعاسىنا دا اسەر ەتتى. اسىرەسە انتاليا، ىستامبۇل، يزمير مەن انكارادا قىمبات. جاعالاۋداعى قالالاردا تۋريستەردىڭ كوبەيۋىنە باستى سەبەپكەر رەسەيلىكتەر بولىپ وتىر. ال پاتەر يەلەرى باعانى 2-3 ەسە قىمباتتاتقان. سوسىن، شەتەلدىكتەردەن 1 جىلدىڭ اقىسىن بىردەن الىپ وتىرۋ دا ولار ءۇشىن ىڭعايلى. ارينە بۇل جاعداي جەرگىلىكتى تۇرعىنداردىڭ دا قالتاسىنا اسەر ەتپەي قويماس. ال ونىڭ سالدارى الداعى ۋاقىتتا بەلگىلى بولماق. قازىر ناقتى كەسىپ- ءپىشىپ ايتۋ قيىن.

www.24.kz


جاڭالىقتار