رەسەيمەن شەكاراداعى احۋال تولىق باقىلاۋدا - اكىمدىك

ورال. قازاقپارات - باتىس قازاقستان وبلىسىمەن شەكتەسەتىن رەسەيمەن شەكاراداعى احۋال تولىق باقىلاۋدا.

بۇل تۋرالى ب ق و اكىمىنىڭ ورىنباسارى باقىتجان نارىمبەتوۆ وڭىرلىك كوممۋنيكاتسيالار قىزمەتى الاڭىندا وتكەن بريفينگىدە ءمالىم ەتتى، دەپ حابارلايدى قازاقپارات ءتىلشىسى.

ب. نارىمبەتوۆتىڭ ايتۋىنشا، بارلىق كۇشتىك قۇرىلىمدار مەن مەملەكەتتىك ورگاندار ءوڭىر تۇرعىندارىنىڭ قاۋىپسىزدىگىن قامتاماسىز ەتۋ ءۇشىن قىزمەت ەتۋدە.

قازىرگى تاڭدا رەسەي فەدەراتسياسىنان قازاقستانعا وتەتىن شەكارا بەكەتتەرىندە تاۋلىكتىك پاترۋلدەۋ جۇرگىزىلىپ جاتىر.

ونىڭ سوزىنە قاراعاندا، «سىرىم»، «شاعان»، «تاسقالا»، «تەپلىي» شەكارا بەكەتتەرىندە پوليتسيا دەپارتامەنتى قىزمەتكەرلەرى تاۋلىك بويى ۇزدىكسىز جۇمىس ىستەۋدە. ورال قالاسى بويىنشا پاترۋلدىك پوليتسيا مەن جاياۋ جاساقتار كوبەيتىلىپ، بارلىق قوعامدىق جەرلەر باقىلانۋ ۇستىندە.

ودان بولەك ەرىكتىلەردەن قۇرىلعان 5 توپ (25 ادام) وبلىس ورتالىعىنداعى الاڭ، پاركتەرگە باقىلاۋ جاساپ، مونيتورينگ جۇرگىزۋدە.

وبلىستاعى ەرىكتىلەر رەسەيدەن كەلگەندەرگە جينالۋ ورىندارى مەن كومەك كورسەتۋ ورىندارىن (تەمىرجول بەكەتى، اۆتوبەكەت، «دينا» سۋپەرماركەتى) بەلگىلەپ، قولۇشىن بەرۋدە.

وبلىس اكىمى ورىنباسارىنىڭ مالىمدەۋىنشە، تاسىمالداۋشىلارمەن شەكارادان ورالعا جانە ودان ءارى جەتكىزۋ ورىندارىنا دەيىن كەلىسىلگەن باعادا (1 ادامنان 700 رۋبل) تاسىمالداۋ جۇرگىزىلۋدە.

وبلىس ەرىكتىلەرىنىڭ باستاماسىمەن «اتامەكەن» جانە «سامال» جازعى لاگەرلەرىنىڭ بازاسىندا كەلۋشىلەردى اقىلى تۇردە قابىلداۋ پۋنكتتەرى (بارلىعى 330 ورىن) ۇيىمداستىرىلدى.

كۇنى بۇگىن اتالعان قابىلداۋ پۋنكتتەرىندە ۋاقىتشا تۇرۋ جانە تاماقتانۋ قىزمەتتەرى اقىلى تۇردە كورسەتىلۋدە (ۋاقىتشا تۇرۋ +تاماقتانۋ اقىسى - 5000 تەڭگە).

رەسەيدەن كەلگەندەر جانە ءوڭىر تۇرعىندارى تۇيتكىلدى ماسەلەلەردى شەشۋ ماقساتىندا 109 ءبىرىڭعاي call-ورتالىعىنا حابارلاسۋعا بولادى.

سونىمەن بىرگە الەۋمەتتىك جەلىلەردە ەلىمىزدىڭ باسقا وڭىرلەرىنە جۇرەتىن تۇراقتى اۆتوبۋس مارشرۋتتارىنىڭ قوزعالىس كەستەسى، جولاقى باعاسى تۋرالى اقپاراتتار ورنالاستىرىلدى. مىسالى، قالىپتاسقان جاعدايعا بايلانىستى اتىراۋ قالاسىنا جولاۋشىلار اۆتوبۋسى كۇنىنە ءۇش رەت قاتىناۋدا.

«سونداي-اق بارلىق پويىز باعىتتارىنا قوسىمشا ۆاگوندار تىركەۋ، اۋە رەيستەرىن كوبەيتۋ جونىندە سۇرانىستار بويىنشا ءتيىستى مينيسترلىك پەن «قازاقستان تەمىر جولى» ۇلتتىق كومپانياسىمەن كەلىسسوزدەر جۇرگىزىپ جاتىرمىز. قاجەت بولعان جاعدايدا مونيتورينگ جانە جەدەل شارالار قابىلداۋ ءۇشىن دەربەس شتاب قۇرىلاتىن بولادى. وبلىس اكىمى ازىق-تۇلىك تاپشىلىعىنا جول بەرمەۋدى جانە تاۋارلاردىڭ تۇراقتى بولۋىن قامتاماسىز ەتۋدى تاپسىردى. سول سەبەپتى ازىق-تۇلىك باعاسىن تەكسەرۋ جانە دەلدالداردى انىقتاۋ ماقساتىندا مونيتورينگتىك توپتار جۇمىستانۋدا»، دەدى ب. نارىمبەتوۆ.