پاتەر جالداۋ باعاسى قىمباتتادى دەپ تيك-توكقا ءازىل جۇكتەگەن ايەل جازالاندى

استانا. قازاقپارات - قىزىلوردالىق ايەل جالعا الۋ باعاسىنىڭ كوتەرىلۋىنە بايلانىستى پاتەردەن شىعارۋ تۋرالى TikTok- عى «ءازىلى» ءۇشىن اكىمشىلىك جاۋاپكەرشىلىككە تارتىلدى.

بۇل تۋرالى قازاقپارات polisia.kz سايتىنا سىلتەمە جاساپ حابارلايدى.

قىزىلوردا قالاسىنىڭ 26 جاستاعى تۇرعىنى وتباسىمەن تابيعاتقا شىعىپ، «500 مىڭ تولەمەسەڭدەر كۆارتيرانى بوساتىڭدار دەپ كانالدا تۇنەپ جاتىرمىز» دەگەن TikTok-تا ۆيدەو جاريالادى.

بەينەجازبا بويىنشا پوليتسيا قىزمەتكەرلەرى تەكسەرۋ جۇمىستارىن جۇرگىزدى.

ناتيجەسىندە پوستاعى مالىمەت شىندىققا سايكەس كەلمەيتىن اقپارات ەكەنى انىقتالدى. ول ءوزىنىڭ جەكە ۇيىندە وتباسىمەن بىرگە تۇراتىن بولىپ شىقتى. ءبىر ساتتە مىڭداعان ادامداردىڭ نازارىن اۋدارعان جاس ايەل بۇل قاراپايىم ءازىل ەكەنىن ايتادى. وعان قاتىستى ق ر اكىمشىلىك قۇقىق بۇزۋشىلىق تۋرالى «ارنايى قىزمەتتەردى كورىنەۋ جالعان شاقىرۋ» اكىمشىلىك حاتتاما تولتىرىلىپ، اكىمشىلىك ايىپپۇل سالىندى.

ونىمەن پروفيلاكتيكالىق اڭگىمە جۇرگىزىلدى.