قازاقستاندىقتار مەككە مەن مەديناعا تىكەلەي اۋە رەيسىمەن قاتىنايدى - مينيستر تاۋفيك ءال- ءرابيا
قاجىلىق جانە ۋمرا ءمينيسترى تاۋفيك ءال- ءرابيانىڭ سوزىنە قاراعاندا، اتالعان جوبانىڭ قازاقستاندى دا قامتۋى پرەزيدەنت قاسىم- جومارت توقايەۆتىڭ وسى ەلگە جاساعان ساپارى قانشالىقتى جەمىستى بولعانىن كورسەتەدى.
«قازاقستان مەن ساۋد ارابياسىنىڭ اراسىنداعى قارىم- قاتىناس وتە قارقىندى دامىپ كەلەدى. ءبىزدى جوعارى مارتەبەلى پرەزيدەنت مىرزانىڭ ەكى اي بۇرىن ساۋد ارابياسىنا جاساعان ساپارى قۋانتتى. بۇل ساپار وتە جەمىستى بولىپ، كوپتەگەن كەلىسىمگە قول قويىلدى. كەلەشەكتە بۇل كەلىسىمدەر ەكى ەل قارىم- قاتىناسىنا سەرپىن بەرەدى دەپ ويلايمىز. قازاقستان مەن ساۋد ارابياسىنىڭ اراسىنداعى قارىم- قاتىناستىڭ تىعىز ەكەنىن ايتا وتىرىپ، مەن قاجىلىق جانە ۋمرا ءمينيسترى بولىپ تاعايىندالعاننان كەيىنگى ەكىنشى ساپارىمدى سىزدەرگە جاساپ وتىرعانىمدى اتاپ وتكىم كەلەدى. ياعني، بۇل مەنىڭ وسى لاۋازىمداعى ەكىنشى ساپارىم بولىپ تۇر.
سونداي- اق ەكى ەلدىڭ تىعىز بايلانىسىنىڭ ءبىر مىسالى رەتىندە قازاقستان ازاماتتارىنىڭ ساۋد ارابياسىنا سايت ارقىلى نەمەسە ساۋدا ارابياسىنىڭ ەلشىلىگىنە بارۋ ارقىلى ەلەكتروندى ۆيزا الىپ، قاجىلىق جاساي الاتىنىن كەلتىرۋگە بولادى»، - دەيدى مينيستر.
سونىمەن قاتار دوكتور تاۋفيك ءال- ءرابيا ەكى ەلدىڭ اراسىندا تىكەلەي اۋە رەيستەرىن اشۋ ارقىلى Nusuk جوباسىن قولدانۋشى قازاقستاندىقتاردىڭ ساپارىن ودان ءارى جەڭىلدەتە ءتۇسۋ جوسپاردا بار ەكەنىن جەتكىزدى.
«بۇل ىستە ءبىز قازاقستان ۇكىمەتىمەن بىرگە بۇكىل شارالاردى قاراستىرىپ جاتىرمىز. Fly Nas كومپانياسىمەن كەلىسسوز ءجۇرىپ جاتىر. 2023 -جىلى وسى باعىتتا جاڭالىق بولادى. ءبىراق بۇل ءبىز اۋە تاسىمالىندا تەك Fly Nas كومپانياسىمەن عانا ارىپتەستىك ورناتامىز دەگەن ءسوز ەمەس. ەسىگىمىز بارىنە اشىق - ساۋد ارابياسىنىڭ كومپانيالارىنا دا، قازاقستان كومپانيالارىنا دا اشىقپىز. كەلەشەكتە قازاقستان مەن ساۋد ارابياسىنىڭ قالالارى اراسىندا اۋە تاسىمالىن دامىتۋدى جوسپارلاپ وتىرمىز. بۇگىن مەن قازاقستاننىڭ يندۋستريا جانە ينفراقۇرىلىمدىق دامۋ مينيسترىمەن كەزدەسۋ وتكىزدىم. سول كەزدە وسى ماسەلەنى تالقىلادىق. سونداي- اق ءبىز ەكى ەلدىڭ اۋە كومپانيالارىنىڭ ارىپتەستىگىن دامىتۋ، ەكى ەلدىڭ اراسىندا تىكەلەي اۋە قاتىناسىن ورناتۋ ماسەلەلەرىن ءسوز ەتتىك. مينيستر مىرزا بۇل يدەيانى قولداپ، كەلەشەكتە مىندەتتى تۇردە اتالعان ماسەلەنى زەردەلەپ، تىكەلەي اۋە قاتىناسىن ەنگىزەتىنىن ءمالىم ەتتى»، - دەدى ساۋد ارابياسىنىڭ وكىلى.
قاجىلىق جانە ۋمرا ءمينيسترىنىڭ ايتۋىنا قاراعاندا، پاندەميا الدىندا قازاقستان ازاماتتارىنا ساۋد ارابياسىنىڭ ەلەكتروندى ۆيزاسىن بەرۋ جولعا قويىلا باستاعان. ەندى اتالعان جوبانى Nusuk مەملەكەتتىك پلاتفورماسىنىڭ اياسىندا ورىستەتۋدىڭ مۇمكىندىگى تۋىپ وتىر.
«ەلەكتروندى ۆيزانى بىرنەشە مينۋتتىڭ ىشىندە الۋعا بولادى. كەيىنگى ۋاقىتتا قازاقستاننان كەلەتىن تۋريستەردىڭ سانى ارتىپ وتىر. جىل باسىنان بەرى ساۋد ارابياسىنا سىزدەردىڭ ەلدەن كەلگەن قۇلشىلىق ەتۋشىلەردىڭ سانى 36 مىڭعا جەتتى. جوعارى مارتەبەلى كورول سالمان بەن ابدەلازيز ءال ساۋدتىڭ ۇكىمەتى كورولدىگىمىزدىڭ ەكى قاسيەتتى قالاسى مەككە مەن مەديناعا، باسقا دا قالالارىمىزعا بۇكىل الەمنەن كەلۋشىلەردى تارتۋعا ۇلكەن ءمان بەرەدى. سوندىقتان ءبىز بۇكىل مۇسىلمانداردى، سونداي- اق قازاقستاننىڭ بارشا ازاماتتارىن ءوز ەلىمىزدە كورگىمىز كەلەدى.
Nusuk مەملەكەتتىك پلاتفورماسىن ۋمرا ساپارىن قالاي ورىنداۋعا بولاتىنىن سيپاتتايتىن ورىن دەۋگە بولادى. سونداي- اق جاڭاعى ايتىپ وتىرعان ەلەكتروندى ۆيزانى قالاي الۋعا بولاتىنى، قوسىمشا قانداي جەرلەرگە ساياحات جاساۋعا بولاتىنى تۋرالى تولىققاندى اقپارات تابۋعا بولادى. بۇل - بارشا الەم جۇرتىنا ارنالعان پلاتفورما. ءبىراق ونىڭ ىسكە قوسىلاتىنى تۋرالى مالىمەت وسى جەردە تۇڭعىش رەت جاريالانىپ وتىر.
Nusuk مەملەكەتتىك پلاتفورماسى قازىر ۋمرا ساپارىن جاساۋعا جانە مەككە مەن مەديناعا ساياحات جاساۋعا ارنالىپ وتىر. ال قاجىلىق ءۇشىن باسقا پلاتفورما مەن باسقا باعدارلامالار بار»، - دەپ ءتۇسىندىردى دوكتور تاۋفيك ءال- ءرابيا.
ايتا كەتۋ كەرەك، بۇل Nusuk پلاتفورماسى ساۋد ارابياسىنىڭ تۋريزم جونىندەگى باسقارماسىمەن بىرلەسە وتىرىپ، Visit Saudi ەكوجۇيەسى شەڭبەرىندە قىزمەتتەردىڭ تولىق اۋقىمىن ۇسىنۋ ءۇشىن، سونىڭ ىشىندە ۆيزالار، رۇقساتتار، برونداۋ پروتسەستەرى مەن راسىمدەرىن جەڭىلدەتۋ ءۇشىن ىسكە قوسىلعان. سونىمەن قاتار مەككە مەن مەديناعا كەلەتىن مۇسىلمانداردىڭ تاجىريبەسىن جاقسارتۋ مەن بايىتۋ ءۇشىن ءتۇرلى پاكەتتەر مەن باعدارلامالاردى ۇسىنادى.
سونىمەن قاتار، Nusuk مەملەكەتتىك پلاتفورماسىندا ساۋد ارابياسىنداعى قىزىقتى نىساندارعا بارۋدى ساپالى جوسپارلاپ، كولىك ىزدەۋ، مارشرۋت ءتۇزۋ قىزمەتتەرىن، ينتەراكتيۆتى كارتالاردى پايدالانۋعا بولادى.
پلاتفورما قىزمەت كورسەتۋشى ۇيىمدارعا دا ءوز قىزمەتتەرىن ۋمرادا قۇلشىلىق ەتۋشىلەرگە ەلەكتروندى تۇردە ۇسىنۋعا مۇمكىندىك بەرەدى. سول ارقىلى جەكە سەكتورعا قولداۋ كورسەتەدى. ال قاجىلىقتى جوسپارلاۋ باعدارلاماسىنىڭ قىزمەتتەرى Nusuk پلاتفورماسىنا تولىقتاي اۋىستىرىلعانعا دەيىن Maqam پلاتفورماسىندا كورسەتىلەدى.