قازاقستانعا مۇحاممەد پايعامباردىڭ ءومىرىن بەينەلەيتىن كوشپەلى مۋزەي كەلەدى
سونىمەن قاتار ەلىمىزنە ساياحاتتاپ كەلەتىن ساۋديالىق تۋرسيتەردىڭ قاتارى ارتادى. بۇل تۋرالى مادەنيەت جانە سپورت ءمينيسترى داۋرەن ابايەۆ پەن ەلىمىزگە جۇمىس ساپارىمەن كەلگەن ساۋد ارابياسى كورولدىگىنىڭ قاجىلىق جانە ۋمرا ءمينيسترى تاۋفيك بەن فاۋزان ءال- رابيانىڭ كەزدەسۋىندە ءمالىم بولعان. تاراپتار ەكى ەل اراسىنداعى تۋريزمدى دامىتۋ ماسەلەلەرىن تالقىلادى.
مينيسترلەردىڭ كەزدەسۋى ۇلتتىق مۋزەيدە ۇيىمداستىرىلدى. مەيماندار ۇلتتىق جادىگەرلەرىمىزبەن، ەل تاريحىمەن تانىسىپ، قازاقستان تابيعاتىن ناسيحاتتاپ، ينۆەستيتسيالىق مۇمكىندىكتەر تۋرالى باياندايتىن ۆيدەولاردى تاماشالادى. وسى رەتتە دەلەگاتسيا مۇشەلەرى قازاقستاندا زاماناۋي كونتەنت ارقىلى مۇحاممەد (س. ع. س. ) پايعامباردىڭ ومىرىنەن سىر شەرتەتىن كورمە ۇيىمداستىرۋ بويىنشا ءوتىنىش ءبىلدىردى. ونى ساۋد ارابياسىنداعى ابدۋلازيز پاتشاسىنىڭ اتىنداعى «الەم مادەنيەتى ورتالىعى» الماتى جانە استانا قالالارىنداعى مۋزەيلەرمەن بىرىگىپ وتكىزەتىن بولادى.
سونداي- اق ساۋد ارابياسى مەن قازاقستان اراسىندا تىكەلەي قاتىنايتىن اۋە رەيستەرىنىڭ جۇمىسى، تۋريستىك وپەراتورلاردىڭ تىعىز بايلانىسى، مادەني- تانىمدىق نىسانداردىڭ ءوزارا ىنتىماقتاستىعى جايلى ءسوز قوزعالدى.
«ءبىز بيىل ساۋديالىقتارعا ەلىمىزدى ناسيحاتتاۋ ماقساتىندا ەكى مارتە روۋد- شوۋ ۇيىمداستىردىق. قازىرگى كەزدە ساۋد ارابياسى كورولدىگىنىڭ ازاماتتارى قازاقستانعا ۆيزاسىز كەلىپ، ءبىر اي بويى دەمالا الادى. وتكەن جىلعى كورسەتكىشتەرمەن سالىستىرعاندا ەلىمىزگە ساياحاتتاپ كەلگەن ساۋديالىقتاردىڭ سانى ەكى ەسە وسكەن. قازاقستاننىڭ تابيعاتى، جىل مەزگىلدەرى تۋرسيتەر ءۇشىن قولايلى. سوندىقتان تۋريزمدى دامىتۋ ماقساتىندا بىرىگىپ جوبالار ازىرلەۋگە دايىنبىز»، - دەدى ق ر مادەنيەت جانە سپورت ءمينيسترى داۋرەن ابايەۆ.
تاۋفيك بەن فاۋزان ءال- رابيانىڭ سوزىنشە، ولار ساۋديالىقتاردىڭ قازاقستانعا تۋريستىك ساپارلارىن زەرتتەپ جاتىر. ساۋديالىق تۋرسيتەردىڭ قازاقستانعا كوپتەپ كەلۋى كۇتىلۋدە.
«سونىڭ ءبىر دالەلى رەتىندە ايتا كەتەيىن، كەشە مەن شىمبۇلاققا كوتەرىلگەن كەزىمدە ساۋديالىق تۋريستەردى بايقادىم. نەگىزى، ساۋديالىقتار ساياحاتقا ەڭ كوپ قارجى جۇمسايتىن تۋريستەر قاتارىندا. قازاقستاندا تاريحي ورىنداردىڭ دا كوپ ەكەنىن بايقادىق. ەندى ەكى ەل ازاماتتارىنىڭ ءوزارا ساياحاتتاۋىن جەڭىلدەتەتىن جاعداي جاسايىق، مەن سىزدەردەن ۇلكەن قوللداۋ كۇتەمىن»، - دەدى ساۋد ارابياسى كورولدىگىنىڭ قاجىلىق جانە ۋمرا ءمينيسترى.
رەداكتور
اسحات رايقۇل