ءاليحان سمايىلوۆ قۇزىرلى ورگاندارمەن رەسەيدەن كەلۋشىلەر سانىنىڭ ارتۋىن تالقىلاندى
وندا رەسەي فەدەراتسياسىنان كەلۋشىلەر سانىنىڭ ارتۋىنا قاتىستى قالىپتاسىپ وتىرعان احۋال تالقىلاندى، دەپ حابارلايدى قازاقپارات primeminister.kz سايتىنا سىلتەمە جاساپ.
كەلگەن ادامداردى وڭىرلەر بويىنشا ورنالاستىرۋ، جۇمىسقا تۇرۋ ىقتيمالدىعىن قاراستىرۋ جانە كەڭەس بەرۋ ماسەلەلەرى بويىنشا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا، ميگرانتتاردى تىركەۋ جانە قۇقىقتىق ءتارتىپتى قامتاماسىز ەتۋ ماسەلەلەرى جونىندە ىشكى ىستەر ءمينيسترى مارات احمەتجانوۆ، جالعا بەرىلەتىن تۇرعىن ءۇي نارىعىنىڭ قۇقىقتىق اسپەكتىلەرى تۋرالى ادىلەت ءمينيسترى قانات مۋسين باياندادى.
كەڭەسكە عىلىم جانە جوعارى ءبىلىم ءمينيسترى ساياسات نۇربەك، سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين، باتىس قازاقستان وبلىسىنىڭ اكىمى عالي ەسقاليەۆ جانە الماتى قالاسىنىڭ اكىمى ەربولات دوسايەۆ قاتىستى.
پرەمەر-مينيستر وڭىرلەردە الەۋمەتتىك شيەلەنىسكە جول بەرمەۋ ءۇشىن ورتالىق جانە جەرگىلىكتى مەملەكەتتىك ورگانداردىڭ ءىس-قيمىلىن ۇيلەستىرۋدى كۇشەيتۋ قاجەتتىگىن اتاپ ءوتتى.
«ەلدەگى قۇقىقتىق ءتارتىپ پەن قاۋىپسىزدىكتى قامتاماسىز ەتۋ جونىندەگى جۇمىستى كۇشەيتۋ، سونداي-اق كەلىپ جاتقان رەسەيلىكتەرگە جاردەم كورسەتۋ كەرەك: ە ا ە و زاڭناماسىنا سايكەس ولاردى ۋاقىتىلى تىركەپ، ەڭبەكپەن قامتۋ ماسەلەلەرىن قاراستىرۋ قاجەت. بۇل ورايدا جالعا بەرىلەتىن تۇرعىن ءۇي نارىعىنداعى احۋالدى تۇراقتاندىرۋ بويىنشا شارالار قابىلداۋ ماڭىزدى»، - دەدى ءاليحان سمايىلوۆ.
ونىڭ ايتۋىنشا، بارلىق مەملەكەتتىك قۇرىلىمدار ءوز قۇزىرەتى اياسىندا وتانداستارىمىزعا دا، ميگرانتتارعا دا تاراپتاردىڭ قۇقىقتارى مەن جاۋاپكەرشىلىگىنە بايلانىستى ءتۇسىندىرۋ جۇمىستارىن جۇرگىزۋى قاجەت. الداعى كۇندەرى بۇل ماقساتتا جەدەل جەلىلەر اشىلادى.
سونىمەن قاتار پرەمەر-مينيستر ۋاقىتشا كەلگەن شەتەل ازاماتتارىن جۇمىسقا ورنالاستىرۋ كەزىندە ەڭبەك زاڭناماسىنىڭ ساقتالۋىنا باقىلاۋدى كۇشەيتۋدى تاپسىردى.
وعان قوسا، پرەمەر-مينيستر بارلىق كولىك ينفراقۇرىلىمىنىڭ تۇراقتى جۇمىس ىستەۋىن قامتاماسىز ەتۋدى، ەلگە كەلىپ جاتقان ادامداردىڭ ءبىر جەردە شوعىرلانۋىن بولدىرماۋ جونىندە قاجەتتى شارالار قابىلداۋدى، ح ق ك و- لاردىڭ ۇزدىكسىز جۇمىس ىستەۋى ءۇشىن قوسىمشا قىزمەت كورسەتۋ تەرەزەلەرىن اشۋدى تاپسىردى.