پاتەردى جالعا الاردان بۇرىن ەسكەرۋ قاجەت ەرەجەلەر

استانا. قازاقپارات - ەلىمىزدە پاتەر جالعا الۋشىلار مەن جالعا بەرۋشىلەر كوپ. اسىرەسە، قالادا بۇل ءتيىمدى بيزنەسكە اينالعان.

بيزنەس جۇرگەن جەردە ءتۇرلى الاياقتىق جاسالۋى مۇمكىن. بىرنەشە جىل ەڭبەك ءوتىلى بار ريەلتور اسلان سارسەنباي پاتەر جالعا العاندا، الاياقتاردان قالاي ساقتانۋ كەرەگىن ايتىپ بەردى، - دەپ حابارلايدى Massaget.kz ءتىلشىسى.

اسلان سارسەنبايدىڭ ايتۋىنشا، كەز كەلگەن ادام قالادا باسپانانى جالعا العاندا بىرنەشە ماسەلەگە نازار اۋدارۋى كەرەك.

قاندايريەلتوردانباس تارتۋ قاجەت؟

«جالعا الۋشى ريەلتوردان ءۇيدىڭ قۇجاتىن سۇراۋى ءتيىس. ول بولماسا، بىردەن ۇسىنىستان باس تارتۋ قاجەت. بۇل قۇجاتتار بولماسا، ريەلتورعا الدىن الا اقشا تولەۋگە دە بولمايدى. بۇل - الاياقتىڭ ءىس-ارەكەتى. مۇنداي جاعدايدا بارلىعى قۇجات، شارت ارقىلى ىسكە اسۋى ءتيىس. سونداي-اق، قازىر ريەلتور بولىپ جۇرگەندەر عالامتوردا تۇرعان حابارلاندىرۋداعى ءنومىردى بەرۋ ءۇشىن اقى سۇرايدى. مۇنداي ريەلتورلار دا ءوز جۇمىستارىن ادال اتقارىپ جاتقان جوق. ولار ادامدارعا جالعا بەرۋگە ارنالعان پاتەرلەردىڭ جەكە قورى بار ەكەنىن ايتادى. شىن مانىندە، ولار نومىرلەردى اشىق اقپارات قورىنان الىپ جاتىر. ال ناعىز ريەلتور بەلگىلى ءبىر اقى ءۇشىن جالعا الۋشى سۇراعان ءۇيدى تاۋىپ جانە ونى كورسەتۋى ءتيىس»، - دەيدى ول.

ماماننىڭ سوزىنشە، ءۇيدى كورسەتكەنى ءۇشىن ريەلتورعا اقى تولەنۋى كەرەك. ءبىراق ول شارت ارقىلى جۇزەگە اسۋى ءتيىس. وعان قوسا شارتتا ناقتى سوما بەلگىلەنەدى.

«نەگىزى جاقسى قىزمەت ۇسىنۋ ءۇشىن ريەلتور دا جۇمىسىنا كوپ اقى سۇراۋى مۇمكىن. ال ولار جۇمىسىنا تىم از اقشا تالاپ ەتسە، سونداي-اق، اقشانى الدىن الا ونلاين تۇردە تولەۋدى سۇراسا، ونىڭ الاياق ەكەنى ايقىن. ەلىمىزدە ريەلتور ءوز قىزمەتى ءۇشىن كەلىسىم سوماسىنان ەڭ كەمى 1 پايىز الادى»، - دەيدى ول.

كەلىسىمشارتتى مۇقيات وقۋ كەرەك

اسلان سارسەنبايدىڭ سوزىنشە، ءۇيدى جالعا ىزدەپ جۇرگەندەر ريەلتوردىڭ قىزمەتىنە اقى تولەۋدەن بۇرىن كەلىسىمشارتقا وتىرۋى كەرەك. سودان كەيىن شارتتى دۇرىستاپ وقىپ شىعۋى قاجەت.

«شارتقا قول قويماس بۇرىن ماتىنگە كوڭىل اۋدارۋ كەرەك. كەيبىر ريەلتور شارتتا «اقپاراتتىق قىزمەت» دەپ كورسەتەدى جانە سول ءۇشىن اقشا الادى. ءبىراق اۋىزشا باسقا دا قىزمەتتەردى كورسەتەمىز دەۋى دە مۇمكىن. شىن مانىندە، ولار تولەمدى الدىن الا سۇراپ، كەيىن تەك ساتىلىمدا تۇرعان ءۇي قوجايىنىنىڭ ءنومىرىن بەرىپ، قۇتىلۋى مۇمكىن. ويتكەنى كەلىسىمشارتتا سولاي كورسەتىلگەن. بۇل ءۇشىن ولارعا ارىزدانا المايسىز، سەبەبى شارتتا كورسەتىلگەن قىزمەتتى اتقارىپ تۇر. سوندىقتان كەلىسىمشارتقا مۇقيات قاراپ، كورسەتىلەتىن قىزمەتتىڭ ءتىزىمىن قاراپ شىعۋ كەرەك. ريەلتور كليەنت ايتقانداي ءۇيدى ىزدەستىرىپ، ونى كورسەتىپ، كەيىن جالعا بەرۋ تۋرالى شارتتى كورسەتۋى كەرەك. مىنەكەي، وسىدان كەيىن عانا سول قىزمەتكەرمەن ارى قاراي كەلىسىمگە كەلۋگە بولادى»، - دەيدى مامان.

الدىن الا تولەم جاساماڭىز

مامان تىكەلەي ءۇي قوجايىنىنا جۇگىنەتىن كەزدە دە مۇقيات بولۋ كەرەگىن ايتتى. ونىڭ سوزىنشە، ءۇيدى جالعا بەرەتىن ادام سول مەنشىكتىڭ يەسى بولماي شىعۋى دا مۇمكىن.

«ەلىمىزدە، اسىرەسە، قالالىق جەردە بۇل پروبلەما ءجيى كەزدەسەدى. اسىرەسە، وقۋ باستالماي تۇرىپ، اۋىلدىق جەردەن كەلەتىن جاستار مەن ستۋدەنتتەر بىردەن حابارلامالار ارقىلى مەنشىك يەسىنەن پاتەردى جالعا العىسى كەلەدى. ءبىراق ءۇيدى جالعا بەرەتىن ادام پاتەر يەسى بولماۋى مۇمكىن. ول باسقا ادامدارعا جالعا بەرىپ، جالعان كەلىسىمشارت جاسايتىندارى دا كەزدەسەدى. اقشانى الدىن الا سۇراپ، كەيىن ول جاسىرىنىپ قالۋى مۇمكىن. مۇنداي وقيعالار جايلى بىزگە جۇگىنەتىن ادامداردان ەستيمىز»، - دەيدى ول.

ماماننىڭ ايتۋىنشا، جالعا العان پاتەردىڭ يەسىنە العاشقىدا الدىن الا تولەم جاساماۋ كەرەك. ويتكەنى ءۇي قوجايىنى مەن جالعا الۋشىنىڭ اراسىندا كەلىسىمشارت بولماعاننان كەيىن مەنشىك يەسى ءتۇرلى سەبەپتەرمەن ولاردىڭ ۇيدەن شىعۋىن تالاپ ەتۋى مۇمكىن. ال الدىڭعى ايلارعا تولەنگەن اقشانى ناقتى دالەلسىز قايتارۋ وتە قيىن.

مامان مۇنداي ادامدار كوبىنە قالالىق جەردە بولاتىنى جانە بىردەن ءۇش ايعا تولەم جاساۋدى تالاپ ەتەتىنىن ايتتى. وعان قوسا، سول ءۇشىن جەڭىلدىك تە جاسايتىندار تابىلادى ەكەن. ءبىراق مۇنداي ۇسىنىستاردان ساق بولعان ءجون.