ەلىمىزدە باسپانا جالداۋ نارىعى تولىق رەتتەلمەگەن - مينيستر

None
استانا. قازاقپارات – ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا باسپانانى جالعا بەرۋ قۇنىنىڭ قىمباتتاۋنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«جالپى، بىزدە باسپانا جالداۋ نارىعى سوڭىنا دەيىن رەتتەلمەگەن جانە ونىڭ باسىم بولىگى - كولەڭكەدە جاتىر. بۇل ماسەلەنى قاراۋ جانە ءوز ۇسىنىستارىن ەنگىزۋ ءۇشىن باسەكەلەستىكتى قورعاۋ جانە دامىتۋ اگەنتتىگىنە ارنايى جەكە تاپسىرما بەرىلگەن. جاقىندا اگەنتتىك وسى باعىت بويىنشا ءوز ۇسىنىستارىن بەرەدى دەپ ويلايمىن. مەنىڭ جەكە پىكىرىم - ءيا، بۇل پاتەر يەلەرىنىڭ دە، جالعا الۋشىلاردىڭ دا مۇددەلەرى قورعالاتىنداي ەتىپ رەتتەلۋى كەرەك»، - دەدى تامارا دۇيسەنوۆا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ءمينيستردىڭ ايتۋىنشا، بۇل پاتەردى كىمگە، قانشاعا جالعا بەرۋ كەرەك دەگەندى بىلدىرمەيدى، نارىق رەتىندە رەتتەۋ قاجەت.

«جالداۋ ءتىزىلىمى قۇرىلىپ، قانشا پاتەر جالعا بەرىلەتىنى، ولاردىڭ قانشا سالىق تولەگەنى، مۇددەلەرىن قانشالىقتى قورعاۋ قاجەت بولاتىنى تۇسىنىكتى بولسا دەيمىن. مىسالى، پاندەميا كەزىندە بيزنەسى توقتاپ قالعاندىقتان قانشا ادام مەملەكەتتەن كومەك الدى. وسى تۇرعىدان رەتتەلۋى قاجەت دەپ ويلايمىن، مەملەكەتتىڭ دە، وسى بيزنەسپەن اينالىساتىن ادامداردىڭ مۇددەلەرى قورعالۋى كەرەك»، - دەدى تامارا دۇيسەنوۆا.

سوڭعى جاڭالىقتار