تامارا دۇيسەنوۆا ءتورت كۇندىك جۇمىس اپتاسىنا قاتىستى پىكىر ءبىلدىردى

استانا. قازاقپارات – ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءتورت كۇندىك جۇمىس اپتاسىنا كوشۋگە پىكىر ءبىلدىردى، دەپ حابارلايدى قازاقپارات ءتىلشىسى.

«بۇگىندە بۇل تاجىريبە بار. پاندەميا كەزىندە جۇمىستىڭ ەرەكشەلىگىنە بايلانىستى بىرەۋ ءتورت كۇن، بىرەۋ بەس، بىرەۋ التى كۇن جۇمىس ىستەدى. ەڭ باستىسى، جالاقى ەسەپتەلەتىن ساعاتتىڭ نورماتيۆىن جوعالتپاۋىمىز كەرەك»، - دەدى تامارا دۇيسەنوۆا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ەڭبەك ءمينيسترىنىڭ ايتۋىنشا، ەڭبەكاقى نورماتيۆىن قامتاماسىز ەتۋ ماڭىزدى.

«سوندىقتان ءبىز ارنايى يكەمدى جۇمىس رەجيمىن كورسەتتىك، بۇعان تىيىم سالىنبايدى. ەڭبەكاقى نورماتيۆىن قامتاماسىز ەتۋگە بولادى جانە ەتۋ دە كەرەك، ياعني ەڭ تومەنگى جالاقىدان تومەن بولماۋى قاجەت. ەكىنشىسى - جالاقى تومەندەمەۋى ءۇشىن ساعات نورماتيۆى قاجەت. سوندىقتان، بۇل ادامدارعا ىڭعايلى جۇمىس ىستەۋگە مۇمكىندىك بەرەتىن يكەمدى ادىستەردىڭ ءبىرى. قازىر پلاتفورمالىق جۇمىسپەن قامتۋ وسى ماسەلە بويىنشا جارقىن مىسال بولا الادى»، - دەدى مينيستر.

بۇعان دەيىن بۇل ماسەلەنى قازاقپارات ءتىلشىسى كوتەرىپ، كەلەر جىلدان باستاپ جۇمىس بەرۋشى مەن قىزمەتكەر اراسىنداعى كەلىسىم نەگىزىندە 4 كۇندىك جۇمىس اپتاسىنا كوشۋگە رۇقسات بەرىلۋى مۇمكىن ەكەندىگى تۋرالى جازعان بولاتىن.