قازاقستان مەن ساۋد ارابياسى اراسىنداعى جاڭا اۋە رەيستەرى كوبەيمەك

None
استانا. قازاقپارات – ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ قاجىلىق جانە ۋمرا ءمينيسترى تاۋفيك بەن فاۋزان بين مۋحامماد ال- رابيا باستاعان ساۋد ارابياسىنىڭ دەلەگاتسياسىمەن كەزدەستى، دەپ حابارلايدى قازاقپارات.

كەزدەسۋ بارىسىندا تاراپتار ەكى ەل اراسىنداعى اۋە تاسىمالىن ودان ارمەن ارتتىرۋ جانە ۇشۋ گەوگرافياسىن كەڭەيتۋ تۇرعىسىندا كەلىسسوزدەر جۇرگىزدى. مينيستر قايىربەك وسكەنبايەۆ قازاقستان مەن ساۋد ارابياسى اراسىنداعى اۆياتسيا سالاسىنداعى ىنتىماقتاستىق ارتىپ كەلە جاتقاندىعىن باياندادى.

«2015 -جىلدان باستاپ وتاندىق «SCAT» جانە ساۋدارابيالىق «Fly Nas» اۆياكومپانيالارى قاجىلىق ساپارعا اتتانعاندار ءۇشىن تىكەلەي اۋە تاسىمالىن ورىنداۋدا. وتكەن جىلى ساۋد ارابيا تاراپى قاجىلىققا بارۋعا نيەت ەتكەن قازاقستاندىقتار ءۇشىن 4 مىڭ كۆوتا ءبولدى. بەس پارىزدىڭ ءبىرىن ورىنداۋشىلاردى تاسىمالداۋ كەزىندە مەدينا جانە دجيدداعا استانا، الماتى، شىمكەنت جانە اقتاۋدان 19 رەيس ۇيىمداستىرىلدى»، - دەپ اتاپ ءوتتى ۆەدومستۆو باسشىسى.

بۇگىندە «SCAT» اۆياكومپانياسى جىلدىڭ بارلىق مەرزىمىندە جيىلىگى اپتاسىنا 1-2 رەت الماتى جانە شىمكەنتتەن مەدينا، دجيددا باعىتىندا تۇراقتى چارتەرلىك اۋە تاسىمالىن ورىنداۋدا. سونىمەن قاتار 2022-2023 -جىلدارداعى كۇزگى جانە قىسقى ناۆيگاتسيالىق ماۋسىمدا ءبىرقاتار وتاندىق اۋە كومپانيالارى تۇراقتى جولاۋشىلار تاسىمالىن ۇيىمداستىرۋدى جوسپارلاپ وتىر. اتاپ ايتقاندا، «Air Astana» الماتى - مەدينا باعىتىندا، «Fly Arystan» اقتاۋ - مەدينا باعىتتارىندا اپتاسىنا جيىلىگى 2 رەتتەن تۇراقتى رەيستەر ورىنداماق.

قازاقستان تاراپى ساۋد اراۆياسىنىڭ ازاماتتىق اۆياتسيا بيلىگى باسشىلارىمەن كەلىسسوزدەر جۇرگىزۋدە. وسىعان وراي بيىلعى 29-قىركۇيەكتە كانادانىڭ مونرەال قالاسىندا وتەتىن ICAO- عا قاراستى ازاماتتىق اۆياتسيا ۇيىمى حالىقارالىق اسسامبلەياسىنىڭ 41-سەسسياسى اياسىندا ەكى مەملەكەت اراسىنداعى ءوزارا تۇسىنىستىك تۋرالى مەموراندۋمعا قول قويىلادى دەپ كۇتىلۋدە.

ونىڭ شەڭبەرىندە اۆياكومپانيالار جولاۋشىلار تاسىمالىن اپتاسىنا 4 تەن 8 گە دەيىن ارتتىرۋ كوزدەلىپ وتىر. بۇل - قازاقستانداعى «اشىق اسپان» رەجيمى اياسىندا جۇزەگە اسىرىلماق.

ءوز كەزەگىندە تاۋفيك فاۋزان ال- رابيا مينيسترگە جان- جاقتى قولداۋى ءۇشىن العىسىن ءبىلدىرىپ، ەلدەر اراسىنداعى تىكەلەي رەيستەردىڭ اشىلۋى ءوزارا قارىم- قاتىناستى نىعايتۋعا ەلەۋلى ۇلەس قوساتىنىن اتاپ ءوتتى. سونداي- اق ول اۋە تاسىمالىن ورىنداۋعا ساۋدارابيالىق اۆياكومپانيالار دا مۇددەلى ەكەندىگىن جەتكىزدى.

«ءسىزدىڭ باستاماڭىزبەن ۇسىنىلعان مەملەكەتتەر اراسىنداعى اۋە تاسىمالىن ودان ارمەن ارتتىرۋ مەن ۇشۋ گەوگرافياسىن كەڭەيتۋ بويىنشا ەكى ەلدىڭ اۋە بيلىگى وكىلدەرىنىڭ كەلىسسوزدەرى جەمىستى ناتيجەسىن بەرۋدە. جاقىن ارادا تىكەلەي اۋە قاتىناستارى قايتا جانداناتىن بولادى»، - دەدى ساۋد ارابياسىنىڭ قاجىلىق جانە ۋمرا ءمينيسترى.


سوڭعى جاڭالىقتار