سولتۇستىككە كوشەتىن تۇرعىندارعا ىنتالاندىرۋ سەرتيفيكاتى بەرىلەدى - مينيستر

استانا. قازاقپارات – ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا سولتۇستىككە جۇمىس كۇشىن كوشىرۋدەگى وزگەرىستەردى ايتىپ بەردى، دەپ حابارلايدى قازاقپارات ءتىلشىسى.

«ىشكى ميگراتسياداعى ەڭ باستى ماسەلە - وڭتۇستىكتەن سولتۇستىككە ازاماتتاردى كوشىرۋ عانا ەمەس، سولتۇستىكتە جۇمىس ورنىنىڭ بولۋى، سودان كەيىن باسپانانىڭ بولۋى، ودان كەيىن عانا كوشۋدى ويلاستىرعان ءجون. سوندىقتان قازىر كوشى- قون جونىندەگى باعدارلامامىزعا وزگەرىستەر ەنگىزىپ جاتىرمىز، ونداعى ءبىرىنشى وزگەرىس - كوشەتىن ازامات جۇمىس ورنىن بەلگىلەۋى كەرەك. ياعني جۇمىس بەرۋشىلەر نەمەسە سول جەردەگى جەرگىلىكتى اتقارۋشى ورگاندار جۇمىسقا ورنالاستىرادى.

ەكىنشى وزگەرىس - جۇمىس ورنى بەلگىلى بولعان سوڭ، قاجەتتى كەلىسىمشارتتى جاساعان سوڭ ىنتالاندىرۋ سەرتيفيكاتتارى بەرىلەدى. مۇندا ولاردىڭ الاتىن باسپاناسىنىڭ 50 پايىزىن قۇرايتىن شاماداعى قاراجات قولىنا بولىنەدى. بۇل قاراجاتتى ازامات ءۇي سالۋعا نەمسە ساتىپ الۋعا بولماسا وتباسى بانكىنە باستاپقى كاپيتال رەتىندە ساقتاپ، ودان كەيىن ساتىپ الۋىنا دا مۇمكىندىك بولادى»، - دەدى مينيستر ورتالىق كوممۋنيكاتسيالار قىزمەتىندە.

بۇعان دەيىن تامارا دۇيسەنوۆا رەسەيدەن ەلىمىزگە قانشا ادام جۇمىس ماقساتىندا كەلگەنىن ايتقان ەدى.

سونىمەن بىرگە قازاق كارتاسى اياسىندا شەتەلدەگى ەتنيكالىق قازاقتارعا جەڭىلدەتىلگەن ۆيزا، 10 جىلعا دەيىن ۋاقىتشا تۇرۋ مۇمكىندىگى بەرىلەدى.