حالىققا قىزمەت كورسەتۋ ورتالىقتارىنىڭ جۇمىسى كۇشەيتىلدى

استانا. قازاقپارات - ەلىمىزدىڭ 8 وڭىرىندەگى حالىققا قىزمەت كورسەتۋ ورتالىقتارىندا جۇمىس رەجيمى كۇشەيتىلدى، دەپ حابارلايدى قازاقپارات «ازاماتتارعا ارنالعان ۇكىمەت» مەملەكەتتىك كورپوراتسياسىنا سىلتەمە جاساپ.

«شەتەلدىكتەردىڭ حالىققا قىزمەت كورسەتۋ ورتالىقتارىنا جاپپاي كەلۋىنە بايلانىستى «ازاماتتارعا ارنالعان ۇكىمەت» مەملەكەتتىك كورپوراتسياسى استانا، الماتى قالاسى، سونداي- اق قوستاناي، باتىس قازاقستان، سولتۇستىك قازاقستان، پاۆلودار جانە الماتى وبلىستارىنداعى ح ق ك و- دا كليەنتتەردى كۇشەيتىلگەن رەجيمدە قابىلداۋ تۋرالى شەشىم شىعاردى»، - دەلىنگەن كورپوراتسيا تاراتقان حابارلامادا.

ءمالىم ەتىلگەندەي، كۇشەيتىلگەن جۇمىس رەجيمىنە كوشۋ جەكە سايكەستەندىرۋ ءنومىرىن (ج س ن) الۋشىلار كەزەگىن ازايتۋى ءتيىس.

«شەتەل ازاماتتارى كۇشەيتىلگەن رەجيمگە كوشكەن 8 وڭىردەگى حالىققا قىزمەت كورسەتۋ ورتالىقتارىنا بارىپ، قاجەتتى قىزمەتتى الا الادى. ج س ن الۋ ءۇشىن شەتەل ازاماتتارىنان جەكە باسىن كۋالاندىراتىن قۇجات تالاپ ەتىلەدى. ال قىزمەتتى الۋشىنىڭ رەسمي وكىلى جۇگىنگەن جاعدايدا، نوتاريالدى كۋالاندىرىلعان سەنىمحات جانە ءوتىنىشى قاجەت بولادى. شەتەلدىكتەر ءۇشىن ج س ن كۋالىگىن بەرۋ مەرزىمى - 1 جۇمىس كۇنى. قازاقستاندا ج س ن الۋ بارلىعىنا تەگىن»، - دەيدى ۆەدومستۆودان.

سونداي- اق مەملەكەتتىك كورپوراتسيانىڭ دەرەگىنشە، جوعارىدا اتالعان 8 وڭىردەن باسقا ايماقتارداعى ح ق ك و جۇمىس ۋاقىتىندا وزگەرىس جوق.

كۇشەيتىلگەن جۇمىس رەجيمىنە كوشكەن 8 وڭىردەگى حالىققا قىزمەت كورسەتۋ ورتالىقتارىنىڭ مەكەنجايى:

• الماتى قالاسى، جەتىسۋ اۋدانى، قۇلاگەر ش/ا، سەرىكوۆ كوشەسى، 6ا؛

• استانا قالاسى، ساۋران كوشەسى، 7؛

• پاۆلودار قالاسى، پاۆلوۆ كوشەسى، 48؛

• ورال قالاسى، جامبىل كوشەسى، 81/2؛

• قوستاناي قالاسى، گاشەك كوشەسى، 14؛

• پەتروپاۆل قالاسى، اۋەزوۆ كوشەسى، 157؛

• كوكشەتاۋ قالاسى، اۋەزوۆ كوشەسى، 189ا؛

• اقتوبە قالاسى، ساڭقىباي باتىر داڭعىلى، 249.