قىرعىزستان مەن تاجىكستان شەكاراداعى جاعدايدى رەتتەۋگە كەلىستى

بىشكەك. قازاقپارات - ءبىر كۇن بۇرىن قىرعىزستان مەن تاجىكستاننىڭ ارنايى قىزمەتتەرىنىڭ باسشىلارى ەكى ەلدىڭ شەكارالاس ايماقتارىنداعى جاعدايدى تۇراقتاندىرۋ تۋرالى حاتتاماعا قول قويدى، دەپ حابارلايدى قازاقپارات قىرعىزستان ۇلتتىق قاۋىپسىزدىك كوميتەتىنىڭ مەملەكەتتىك شەكارا قىزمەتىنە سىلتەمە جاساپ.

بۇل قۇجات شەكارا سىزىعىنان ەكى مەملەكەتتىڭ قوسىمشا كۇشىن شىعارۋدى، «تامدىق» (ق ر) جانە «بەداك» (ت ر) شەكارا زاستاۆالارىن، «بۇلاق- باشى» (ق ر) جانە «ك ە ح» (ت ر)، «كاتتا- تۇز» (ق ر) جانە «قاراقشىقۇم» (ت ر)، چايحانا ايماعىنداعى «اق- ساي» (ق ر) جانە حودجاي- الو ايماعىنداعى «شارشارا» (ت ر) بەكەتتەرىن الىپ تاستاۋدى جانە بۇل ايماقتاردا شەكارالىق بولىمشەلەردىڭ ەشبىر ءتۇرىن قالدىرماۋدى كوزدەيدى.

شەكارا زاستاۆالارى مەن بەكەت عيماراتتارى مەن قۇرىلىستارى توقتاتىلىپ، وسى اۋماقتارداعى قىرعىز- تاجىك مەملەكەتتىك شەكاراسىن كەلىسىلگەن باعىتپەن جۇرەتىن جىلجىمالى شەكارا جاساعى كۇزەتەتىنى حابارلاندى.

سونىمەن قاتار، قول جەتكىزىلگەن كەلىسۋشىلىكتەرگە سايكەس، بۇل ايماقتاردا ەكى ەلدىڭ شەكارالاس تۇرعىندارىنىڭ ءجۇرىپ- تۇرۋىنا، شەكارانى زاڭدى ءراسىم اياقتالعانشا كەز كەلگەن شارۋاشىلىق جانە باسقا دا قىزمەت تۇرلەرىن جۇرگىزۋگە تىيىم سالىندى.

قاقتىعىس ءجيى بولاتىن ايماقتارعا بەينەباقىلاۋ كامەرالارى ورناتىلادى.

بۇل حاتتاما ۋاقىتشا بولىپ تابىلادى جانە ەكى رەسپۋبليكا اراسىنداعى شەكارانى دەليميتاتسيالاۋ جانە دەماركاتسيالاۋ پروتسەسى تولىق اياقتالعانعا دەيىن جارامدى.

فوتو:media-center.kg