ەلىمىزدە قانشا ازامات ۇلتتىق سپورت تۇرلەرىمەن اينالىسادى
IV دۇنيەجۇزىلىك كوشپەندىلەر ويىندارىنا دايىندىق بارىسىن بايانداعان سپورت جانە دەنە شىنىقتىرۋ كوميتەتىنىڭ ءتوراعاسى سامات ەرعاليەۆ وسىلاي ءمالىم ەتتى، دەپ حابارلايدى قازاقپارات ءتىلشىسى.
«رەسپۋبليكامىزدا ۇلتتىق سپورت تۇرلەرىنە دايىندايتىن 8 سپورت كلۋبى مەن 13 سپورت مەكتەبى جۇمىس ىستەيدى. ەلىمىز بويىنشا 490 مىڭ ادام ۇلتتىق سپورت تۇرلەرىمەن تۇراقتى تۇردە اينالىسادى. مەملەكەت تاراپىنان ۇلتتىق سپورتتى دامىتۋ ماقساتىندا ءبىلىم بەرۋ ۇيىمدارىندا ۇلتتىق سپورت تۇرلەرىن مىندەتتى كومپونەنت رەتىندە ەنگىزۋ ءۇشىن دەنە شىنىقتىرۋ جانە سپورت تۋرالى زاڭعا وزگەرىس ەنگىزىلدى. يۋنەسكو- نىڭ ماتەريالدىق ەمەس مادەني مۇرالار تىزىمىنە ۇلتتىق سپورتتىڭ ءتورت ءتۇرى ەندى. ولار - اسىق اتۋ، توعىزقۇمالاق، قازاق كۇرەسى جانە ساياتشىلىق»، - دەپ اتاپ ءوتتى سامات ەرعاليەۆ.
سونىمەن قاتار، كوميتەت ءتوراعاسى بريفينگ اياسىندا 29-قىركۇيەك پەن 4-قازان ارالىعىندا تۇركيانىڭ يزنيك قالاسىندا IV دۇنيەجۇزىلىك كوشپەندىلەر ويىندارى وتەتىنىن ءمالىم ەتتى. وندا قازاقستان قۇراما كومانداسىنىڭ 49 سپورتشىسى سايىستىڭ 5 ءتۇرى بويىنشا باق سىنايدى. سونداي- اق، كوشپەندىلەر ويىندارىندا قازاق كۇرەسىنەن تۇڭعىش رەت قازاقستان ايەلدەر قۇراماسى سايىسقا تۇسەدى .
قوسا كەتەيىك، ۇلتتىق جانە ات سپورتى تۇرلەرى ورتالىعىنىڭ ديرەكتورى باقداۋلەت ءسابيتوۆ دۇنيەجۇزىلىك كوشپەندىلەر ويىندارىندا قازاقستاندىق توپ قاي سايىستان جۇلدە الۋى مۇمكىن ەكەنىنە بولجام جاساعان بولاتىن.