دۇنيەجۇزىلىك كوشپەندىلەر ويىندارىنا قاتىسۋشىلاردىڭ دايىندىعى ءۇشىن بارلىق جاعداي جاسالدى
ورتالىق كوممۋنيكاتسيالار قىزمەتىندەگى بريفينگ بارىسىندا سپورت جانە دەنە شىنىقتىرۋ كوميتەتىنىڭ ءتوراعاسى سامات ەرعاليەۆ وسىلاي مالىمدەدى، دەپ حابارلايدى قازاقپارات ءتىلشىسى.
«دۇنيەجۇزىلىك كوشپەندىلەر ويىندارى ءۇش رەت قاتارىنان قىرعىز جەرىندە وتكەن بولاتىن. بيىلعى ويىنداردىڭ ەستافەتاسىن تۇركيا رەسپۋبليكاسى قابىلداپ وتىر. ءتورتىنشى مارتە ۇيىمداستىرىلىپ وتىرعان دۇنيەجۇزىلىك كوشپەندىلەر ويىندارىنا قازاقستاننىڭ سپورتتىق دەلەگاتسياسى قاتىسادى. سپورتتىق شارا باعدارلاماسىنا 13 ويىن ءتۇرى ەنگەن. قازاقستان قۇراماسى 5 سپورت تۇرىنەن جارىسقا قاتىسادى. اتاپ ايتقاندا، كوكپار، جامبى اتۋ، قازاق كۇرەسى، كوكبورى، ءداستۇرلى ساداق اتۋدان سپورتشىلارىمىز باق سىنايدى. تەڭگە ءىلۋ مەن اۋدارىسپاقتان سپورتشىلار كورسەتىلىم جاسايدى.
مەملەكەت تاراپىنان سپورتشىلاردىڭ ويىندارعا دايىندىعى مەن قاتىسۋىن قاتاماسىز ەتۋ ءۇشىن بارلىق جاعداي جاسالدى. اتاپ ايتقاندا، بيىلدىڭ وزىندە كوكپار سپورتىنان قۇراما كوماندا 4 وقۋ- جاتتىعۋ جيىنىن وتكىزدى. قازاق كۇرەسىنەن 3 وقۋ- جاتىعۋ جيىنى شەت ەلدە، ياعني گرۋزيانىڭ گوري قالاسىندا ءوتتى. سپورتشىلار قاجەتتى سپورتتىق كيىم- كەشەكپەن قامتاماسىز ەتىلدى»، - دەدى سامات ەرعاليەۆ.
ونىڭ سوزىنشە، قازاقستان قۇراما كومانداسى بۇعان دەيىنگى ويىندارعا دا بەلسەنە قاتىسىپ، جۇلدەلى ورىنداردان كورىنگەن. ماسەلەن، جالپى كوماندالىق ەسەپتە 2014 -جىلى – 2-ورىن، 2016 -جىلى – 3-ورىن، 2018 -جىلى 2-ورىنعا يە بولعان.
ايتا كەتسەك، 29-قىركۇيەك پەن 4-قازان ارالىعىندا تۇركيانىڭ يزنيك قالاسىندا IV دۇنيەجۇزىلىك كوشپەندىلەر ويىندارى وتەدى. وندا قازاق كۇرەسىنەن تۇڭعىش رەت قازاقستان ايەلدەر قۇراماسى سايىسقا تۇسەدى .
بريفينگ بارىسىندا ۇلتتىق جانە ات سپورتى تۇرلەرى ورتالىعىنىڭ ديرەكتورى باقداۋلەت ءسابيتوۆ دۇنيەجۇزىلىك كوشپەندىلەر ويىندارىندا قازاقستاندىق توپ قاي سايىستان جۇلدە الۋى مۇمكىن ەكەنىنە بولجام جاساعان بولاتىن.