پولشا رەسەيلىكتەردىڭ تەڭىز جانە اۋە پورتتارى ارقىلى ەلگە كىرۋىنە تىيىم سالدى

استانا. قازاقپارات - رەسەي ازاماتتارىنىڭ پولشاعا كىرۋىنە شەكتەۋ قويۋ تۋرالى بۇيرىق دۇيسەنبى كۇنى پولشانىڭ اۋە جانە تەڭىز شەكارا باقىلاۋ بەكەتتەرىندە كۇشىنە ەندى.

بۇرىن بۇل شارالار جاياۋ جۇرگىنشىلەر مەن اۆتوموبيل وتكىزۋ بەكەتتەرىندە ەنگىزىلگەن. بۇل تۋرالى قازاقپارات ت ا س س اقپارات اگەنتتىگىنە سىلتەمە جاساپ حابارلايدى.

ەندى پولشاعا كىرۋگە ەش سەبەبى جوق جولاۋشىنى بورتىنا العان تەڭىز جانە اۋە تاسىمالداۋشىلارى ونى ءوز قاراجاتى ەسەبىنەن كەرى قايتارۋعا ءماجبۇر بولادى.

19-قىركۇيەكتە پولشا ىشكى ىستەر مينيسترلىگىنىڭ باسشىسى ماريۋش كامينسكي ەستونيا، ليتۆا جانە لاتۆيا بيلىگىمەن ءتيىستى كەلىسىمدەرگە قول جەتكىزۋ قورىتىندىسى بويىنشا رەسەيلىكتەرگە ەلگە كىرۋ ەرەجەلەرىن قاتايتۋ، شەنگەن ايماعىنا تۋريستىك، مادەني، سپورت جانە ىسكەرلىك ماقساتتا، سونداي- اق حالىقارالىق ىنتىماقتاستىق باعدارلامالارى بويىنشا ساياحاتتايتىن رەسەي ازاماتتارىنىڭ كىرۋ مۇمكىندىگىن شەكتەۋدى بۇيىردى.

پولشا اۋماعىنا تەك ديسسيدەنتتەر، گۋمانيتارلىق ىستەر، تۇرۋعا ىقتيارحات يەلەرىنىڭ وتباسى مۇشەلەرى، جۇك تاسىمالداۋدى جەڭىلدەتۋ جانە كولىك قىزمەتى، ديپلوماتيالىق وكىلدىكتەر جانە ترانزيتتىك تاسىمالداۋ، پولشا وقۋ ورىندارىنىڭ عالىمدارى مەن ستۋدەنتتەرى، بالىقشىلار كىرە الادى.

پولشا رەسەيلىكتەرگە تۋريستىك ۆيزانى بىرنەشە ايدان بەرى بەرمەي كەلەدى.

ەل ۆيزاسىن ديپلوماتتار، جۇك كولىگى جۇرگىزۋشىلەرى، پولشا نەمەسە باسقا ە و ەلدەرى ازاماتتارىنىڭ وتباسى مۇشەلەرى، سونداي- اق «پولياك كارتاسىنىڭ»، ياعني پولشادان شىققانىن راستايتىن قۇجات يەلەرى نەمەسە گۋمانيتارلىق سەبەبى بار ادامدار عانا الا الادى.