قايرات ساتىبالدى ۇلىنىڭ سىبايلاسىنا ىزدەۋ جاريالاندى
25 قىركۇيەك, 15:28

قايرات ساتىبالدى ۇلىنىڭ سىبايلاسىنا ىزدەۋ جاريالاندى

استانا. قازاقپارات – ق ر سىبايلاس جەمقورلىققا قارسى ءىس- قيمىل اگەنتتىگى قايرات ساتىبالدى ۇلىنا قاتىستى بيۋدجەتكە تولەنەتىن باسقا دا مىندەتتى تولەمدەردەن جالتارۋ، سونداي-اق قىلمىستىق جولمەن الىنعان اقشانى جانە وزگە دە مۇلىكتى زاڭداستىرۋ (جىلىستاتۋ) فاكتىلەرى بويىنشا سوتقا دەيىنگى تەرگەۋدى جالعاستىرىپ جاتىر، دەپ حابارلايدى قازاقپارات انتيكورعا سىلتەمە جاساپ.

«تەرگەۋ بارىسىندا ق. ساتىبالدى ۇلىنىڭ اسا سەنىمدى ادامى - قازاقستان ازاماتى ەفەندي كەمال، 1983 -جىلى تۋعان، ءبىرقاتار كوممەرتسيالىق كاسىپورىنداردىڭ قۇرىلتايشىسى جانە ديرەكتورى انىقتالدى.

ەفەنديدىڭ قىلمىستىق ءرولى كەدەن سالاسىنداعى ماسەلەلەردى شەشۋ، قىلمىستىق جولمەن الىنعان اقشانى جانە باسقا دا مۇلىكتى زاڭداستىرۋ (جىلىستاتۋ) بولدى.

ول ءۇشىن وعان ق. ساتىبالدى ۇلى شوتتان اقشا الۋعا سەنىمحات بەرگەن. مىسالى، ەفەنديدىڭ ءبىر ەپيزودى بويىنشا عانا 2018 -جىلدىڭ شىلدەسى مەن تامىز ايىنىڭ 3 كۇن ىشىندە ق. ساتىبالدى ۇلىنىڭ جەكە شوتىنان قولما- قول 37 ميلليارد تەڭگە جانە 62 ميلليون ا ق ش دوللارى الىنعان.

اعىمداعى جىلدىڭ اقپان ايىنان باستاپ ەفەندي قازاقستاننان تىس جەرلەردە جاسىرىنىپ، قىلمىستىق قۋدالاۋ ورگانىنا كەلۋدەن جالتارىپ ءجۇر.

ونىڭ قۇقىققا قارسى ارەكەتتەرى ق ر قىلمىستىق كودەكسىنىڭ 218-بابىنىڭ 3-بولىگى 3-تارماعى بويىنشا سارالانىپ، ىزدەۋ جاريالاندى. سوتقا دەيىنگى تەرگەۋ جالعاسىپ جاتىر»، - دەلىنگەن رەسمي حابارلامادا.

ەسكە سالساق، سىبايلاس جەمقورلىققا قارسى قىزمەت لاۋازىمدىق وكىلەتتىكتەرىن اسىرا پايدالانۋ جانە «قازاق تەلەكوم» ا ق-نىڭ قاراجاتىن اسا ءىرى كولەمدە ۇرلاۋ فاكتىلەرى بويىنشا كۇدىكتى قايرات ساتىبالدى ۇلىن ۇستاپ، ۋاقىتشا ۇستاۋ يزولياتورىنا قامادى.

20-قىركۇيەك كۇنى استانا قالاسىندا قايرات ساتىبالدىنىڭ ىسىنە قاتىستى سوت وتىرىسى باستالاتىنى حابارلاندى.

ەلوردانىڭ بايقوڭىر اۋداندىق №2-سوتىندا ءوتىپ جاتقان پروتسەسس بارىسىندا پروكۋرور كۇدىكتى قايرات ساتىبالدىنى التى جىلعا باس بوستاندىعىنان ايىرۋدى سۇرادى.

اۆتور اقبوپە ءابدراسۋل

جاڭالىقتار