ەلوردادا اتىراۋ وبلىسى مەن ب ق و- نىڭ اۋىل شارۋاشىلىعى جارمەڭكەسى ءوتىپ جاتىر

استانا. قازاقپارات - استانادا اتىراۋ جانە باتىس قازاقستان وبلىستارى تاۋار وندىرۋشىلەرىنىڭ ءداستۇرلى اۋىل شارۋاشىلىعى جارمەڭكەسى ءوتىپ جاتىر، دەپ حابارلايدى ەلوردا اكىمدىگىنىڭ رەسمي سايتى.

وبلىستاردىڭ اۋىل شارۋاشىلىعى وندىرۋشىلەرى ءوز ونىمدەرىن دەلدالسىز تىكەلەي تۇتىنۋشىلارعا ساتادى، سونىڭ ناتيجەسىندە ءونىمنىڭ باعاسى نارىقتىق باعادان %10-20 - عا تومەن بولادى. مۇنداي جارمەڭكەلەردىڭ باستى ماقساتى- استانالىقتارعا قولجەتىمدى ازىق- تۇلىك سەبەتىن جيناۋعا مۇمكىندىك بەرۋ.

جارمەڭكەدە ءوڭىردىڭ 50-دەن استام اۋىلشارۋاشىلىق تاۋار وندىرۋشىلەرى اكەلگەن 47-دەن استام تاۋار تۇرلەرى ۇسىنىلدى، ونىڭ ىشىندە: 90 توننادان استام سيىر ەتى مەن جىلقى ەتى، 44 توننا بالىق، 17 توننا ۇن جانە ماكارون ونىمدەرى، 15 توننا كوكونىس، 10 توننا كارتوپ، 10 توننا شۇجىق جانە كونسەرۆى ونىمدەرىنىڭ تۇرلەرى، 5 توننا وسىمدىك مايى، 5 توننا ءسۇت ونىمدەرى، 2 توننا جەمىس- جيدەك، 36 مىڭ دانا جۇمىرتقا، سونداي- اق 21,7 توننا باسقا دا ونىمدەر.

ەلورداداعى اۋىل شارۋاشىلىعى ونىمدەرىنىڭ جارمەڭكەسىنە اتىراۋ جانە باتىس قازاقستان وبلىستارىنىڭ تاۋار وندىرۋشىلەرى 220 توننا ءونىم اكەلدى.

«باعالار قولجەتىمدى، نارىقتىق باعادان الدەقايدا تومەن. جارمەڭكەدەن ءار دەمالىس سايىن ازىق- تۇلىك ساتىپ الۋ - ءبىزدىڭ داستۇرىمىزگە اينالدى. بالالارعا تاتتىلەر ساتىپ الامىن، ءقازىر بالىققا كەزەكتە تۇرمىن»، - دەيدى ەلوردا تۇرعىنى بەرىك سۇلتانوۆ.

«اتىراۋ وبلىسىنان ءبىز 110 توننا اۋىل شارۋاشىلىعى ءونىمىن، ونىڭ ىشىندە 44 توننا بالىق اكەلدىك. بۇل وتكەن جىلمەن سالىستىرعاندا 8 تونناعا ارتىق. ەلوردا تۇرعىندارىنىڭ كوڭىل- كۇيىن كوتەرۋ ءۇشىن كونسەرتتىك باعدارلاما ۇيىمداستىرىلدى. جالپى، ءبىزدىڭ ءونىمنىڭ باعاسى نارىقتىق باعادان %20 عا تومەن»، - دەپ اتاپ ءوتتى اتىراۋ وبلىسى اۋىل شارۋاشىلىعى باسقارماسى باسشىسىنىڭ ورىنباسارى باعدات رۇستەموۆ.

جارمەڭكەگە كەلگەن تاعى ءبىر قالا تۇرعىنى ۇيىمداستىرۋشىلارعا العىسىن ءبىلدىرىپ، تاۋارلار مەن باعالار تۋرالى ءوز ويىمەن ءبولىستى.

«ءبىز جاقىن جەردە تۇرامىز، اپتا سايىنعى اۋىلشارۋاشىلىق جارمەڭكەسىن كۇتەمىز. بۇگىن ءبىز بىرنەشە ليتر سۇيىقتىق پەن كوكونىس ساتىپ الامىز. باعاسى، مەنىڭ ويىمشا، قولجەتىمدى. كەشكە دوستارىمىز قوناققا كەلەدى، مەن سالات جاسايمىن»، - دەدى زارينا قاسىموۆا.

سونىمەن قاتار، جارمەڭكەگە كەلگەن ەلوردا تۇرعىندارى مەن قوناقتارى ءۇشىن اتىراۋ جانە باتىس قازاقستان وبلىستارىنىڭ ارتىستەرى جاقسى كوڭىل- كۇي سىيلادى.

ەستەرىڭىزگە سالا كەتەيىك، اۋىلشارۋاشىلىق جارمەڭكەلەرى ءار سەنبى جانە جەكسەنبى كۇندەرى 13 قاراشاعا دەيىن وتەدى. كەلەسى دەمالىس كۇندەرى جارمەڭكەگە شىعىس قازاقستان جانە اباي وبلىستارىنىڭ كاسىپكەرلەرى كەلەدى. وتەتىن ورنى: تۇران 48 مەكەن- جايى بويىنشا ورنالاسقان «استانا- ارەنا» ستاديونىنىڭ جانىنداعى الاڭ.