گرۋزيا مەن ازەربايجاننان اكەلىنگەن كولىكتەردى قالاي راسىمدەۋگە بولادى

None
تۇركىستان. قازاقپارات - ەلىمىزگە گرۋزيا مەن ازەربايجاننان تاسىمالدانعان كولىكتەر زاڭ تالاپتارىنا ساي راسىمدەلەدى.

بۇل تۋرالى قارجى مينيسترلىگى مەملەكەتتىك كىرىستەر كوميتەتىنىڭ ءتوراعاسى دانيار جانالينوۆ تۇركىستان وبلىسىنىڭ تۇرعىندارىمەن كەزدەسۋى بارىسىندا اتاپ ءوتتى، دەپ حابارلايدى قازاقپارات ءتىلشىسى.

كوميتەت ءتوراعاسىنىڭ ايتۋىنشا، ەل اۋماعىندا ۋاقىتشا اكەلىنگەن كولىك قۇرالدارىن ساتىپ الۋعا، سونداي-اق مۇنداي ماشينالاردى پايدالانۋعا تەك كەدەندىك تازارتۋدان وتكەننەن كەيىن جانە تيىسىنشە تيەسىلى كەدەندىك باجدار مەن سالىقتاردى تولەگەننەن كەيىن عانا بولادى.

«جەكە پايدالانۋعا ارنالعان شەتەلدىك كولىكتى جانە ءوزىنىڭ اۆتوكولىگىن اكەلگەن شەتەلدىك تۇلعالار بەلگىلى ءبىر ۋاقىتتان كەيىن قازاقستان اۋماعىنان (نەگىزىنەن گرۋزيا جانە ءازىربايجان ازاماتتارى) كەتەتىنى بايقالادى. ەۋرازيالىق ەكونوميكالىق وداقتىڭ كەدەندىك اۋماعىنا شەتەلدىك جەكە تۇلعالاردىڭ ەۋرازيالىق ەكونوميكالىق وداققا مۇشە بولىپ تابىلمايتىن مەملەكەتتە تىركەلگەن جەكە پايدالانۋعا ارنالعان كولىك قۇرالدارىن ءبىر جىلدان اسپايتىن مەرزىمگە ۋاقىتشا اكەلۋىنە جول بەرىلەدى. ۋاقىتشا اكەلۋ مەرزىمى اياقتالعاننان كەيىن اۆتوموبيلدەر ە ا ە و اۋماعىنان كەتۋگە ءتيىس. ارينە، وسى كولىك قۇرالدارىن دا زاڭداستىرۋعا بولادى. ول ءۇشىن بۇل كولىكتەر ۋاكىلەتتى ورگاننىڭ (ءى ءى م) بەلگىلەگەن تالاپتارىنا سايكەس كەلۋى كەرەك. مىسالى، قىلمىستىق ارەكەتتەرگە قاتىسى بار اۆتوكولىك قۇرالدارى، «وڭ جاق ءرولدى» اۆتوكولىكتەر مەن كەدەندىك تازارتۋدان وتپەگەن كولىكتەر زاڭداستىرىلمايدى. قازىرگى ۋاقىتتا ۋاكىلەتتى ورگانمەن شەتەلدىك اۆتوكولىكتەردى زاڭداستىرۋعا قاتىستى ق ر زاڭناماسىنا ءتيىستى تۇزەتىلەردى ەنگىزۋ بويىنشا جۇمىستار جۇرگىزىلىپ جاتىر»، - دەدى دانيار جانالينوۆ.


كوميتەت ءتوراعاسى سونداي-اق، ءبازبىر ازاماتتاردىڭ اۋىر قارجىلىق جاعدايىنا بايلانىستى بانك الدىنداعى قارىزدارىن كەشىرۋ جايىن دا ءتۇسىندىرىپ ءوتتى. جاڭا زاڭ جوباسىنا سايكەس، ەل ازاماتتارىنىڭ كرەديتورلاردىڭ تالاپتارىن تولىق كولەمدە قاناعاتتاندىرۋعا قابىلەتسىزدىگى كەزىندە تۋىندايتىن قوعامدىق قاتىناستاردى رەتتەۋ كوزدەلگەن.

«ازاماتتاردىڭ تولەم قابىلەتىن قالپىنا كەلتىرۋ ءراسىمىن، سونىمەن بىرگە سوتتان تىس جانە سوت بانكروتتىعى راسىمدەرىن قولدانۋ ءۇشىن نەگىزدەر، ولاردى جۇرگىزۋ ءتارتىبى مەن شارتتارى بەلگىلەنگەن. بۇل رەتتە بورىشكەردىڭ جوعارىدا كورسەتىلگەن راسىمدەردىڭ ءبىرىن قولدانۋ مۇمكىندىگى بەرەشەكتىڭ مولشەرىنە، مۇلىكتىڭ بولۋىنا نەمەسە بولماۋىنا، بانكتىك قارىز شارتى نەمەسە ميكروكرەديت بەرۋ تۋرالى شارت بويىنشا مەرزىمى وتكەن بەرەشەكتى رەتتەۋ نەمەسە ءوندىرىپ الۋ ءراسىمىن جۇرگىزۋگە جانە باسقا دا تالاپتارعا بايلانىستى بولادى. بۇگىنگى كۇنى زاڭ جوباسى قازاقستان رەسپۋبليكاسى پارلامەنت ءماجىلىسىنىڭ قاراۋىندا (29-ءساۋىر كۇنى ەنگىزىلگەن). زاڭ جوباسى قازاقستان رەسپۋبليكاسى پارلامەنتىنىڭ ءماجىلىسى مەن سەناتىندا ودان ءارى تالقىلاۋدان وتەدى، وعان ءالى دە وزگەرىستەر ەنۋى مۇمكىن. سونىمەن بىرگە، بانكتەردىڭ قىزمەتى بويىنشا سۇراقتار تۋىنداعان جاعدايدا ازاماتتارعا قارجى نارىعىن رەتتەۋ جانە دامىتۋ اگەنتتىگىنە حابارلاسۋلارىنا بولادى»، - دەدى دانيار جانالينوۆ.


باسقوسۋدا سونىمەن قاتار كولىك سالىعىن تولەۋدەگى كەزدەسەتىن قاتەلىكتەر مەن مۇلىك سالىعىن ۋاقىتىلى تولەمەگەن جەكە تۇلعالارعا ايىپپۇل سانكسيالارىن سالۋ ءتارتىبى ءتۇسىندىرىلدى. وزبەكستانمەن شەكاراداعى كەدەن بەكەتتەرىنەن تاۋار الىپ ءوتۋ ءتارتىبى مەن كولىكتەردى راسىمدەۋگە قاتىستى ءتۇرلى ساۋالدارعا جاۋاپتار بەرىلدى.

سوڭعى جاڭالىقتار