حالىققا قىزمەت كورسەتۋ ورتالىقتارىنىڭ جۇمىس ۋاقىتى ۇزاردى

استانا. قازاقپارات - ەلىمىزدە حالىققا قىزمەت كورسەتۋ ورتالىقتارىندا جۇمىس ۋاقىتىنىڭ ۇزارۋ سەبەبى ءتۇسىندىرىلدى، دەپ حابارلايدى قازاقپارات ءتىلشىسى.

حالىققا قىزمەت كورسەتۋ ورتالىقتارىنىڭ جۇمىس كەستەسىنىڭ نەلىكتەن وزگەرگەنىن «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ قوعاممەن بايلانىس جونىندەگى باسقارۋشى ديرەكتورى ناريمان دۇيسەكەيەۆ ءتۇسىندىرىپ ءوتتى.

«كليەنتتەر حالىققا قىزمەت كورسەتۋ ورتالىقتارىندا جۇمىس ۋاقىتىن ارتتىرۋدى بۇرىننان سۇراپ كەلەدى. ونىڭ ىشىندە مامانداندىرىلعان حالىققا قىزمەت كورسەتۋ ورتالىقتارى دا بار. سەبەبى ازاماتتار جۇمىس كۇندەرى مەملەكەتتىك قىزمەتتەردى الىپ ۇلگەرمەي جاتادى. وسىعان وراي ءبىزدىڭ كورپوراتسيا كليەنتتەرگە ىڭعايلى بولۋ ءۇشىن كۇندەلىكتى جۇمىس ۋاقىتىن ساعات 20.00 گە دەيىن ۇزارتتى. سونداي-اق، سەنبى كۇنى ساعات 13.00 گە دەيىن جۇمىس ىستەيدى. ودان بولەك، وسى اپتادان باستاپ مامانداندىرىلعان قىزمەت كورسەتۋ ورتالىقتارى جۇمىسىن قايتا جانداندىردى»، - دەيدى ول.

ونىڭ ايتۋىنشا، ەندى قازاقستاندىقتار ءۇشىن جۇرگىزۋشى كۋالىگىن الۋ، كولىك تىركەۋ، سونداي-اق مەملەكەتتىك ءنومىر الۋ قىزمەتى سەنبى كۇنى دە قولجەتىمدى.

ايتا كەتەيىك، حالىققا قىزمەت كورسەتۋ ورتالىقتارىنىڭ جۇمىس كەستەسى جانە مەكەنجايىن «ازاماتتارعا ارنالعان ۇكىمەت» مەملەكەتتىك كورپوراتسيانىڭ رەسمي سايتىنان بىلۋگە بولادى.