بالاباقشا تاربيەشىلەرىنە جالاقى تولەۋدىڭ جاڭا جۇيەسى ەنگىزىلمەك

None
استانا. قازاقپارات - ورتالىق كوممۋنيكاتسيالار قىزمەتىندە بولعان بريفينگىدە وقۋ-اعارتۋ ءمينيسترى اسحات ايماعامبەتوۆ بالاباقشا تاربيەشىلەرىنە ەڭبەكاقى تولەۋدىڭ جاڭا جۇيەسى سىناقتان ءوتىپ جاتقانىن ايتتى، دەپ حابارلايدى قازاقپارات ءتىلشىسى.

«بۇگىنگى تاڭدا بالاباقشالاردا ءبىر پەداگوگكە 25 بالادان كەلەدى. پەداگوگ پەن بالا اراسىنداعى ساپالى قارىم-قاتىناستىڭ، ءبىر مۇعالىمگە جۇكتەلەتىن جۇكتەمەنىڭ سالدارىنان ءار بالاعا كوبىرەك كوڭىل ءبولۋ مۇمكىندىگى شەكتەۋلى. مەملەكەت باسشىسىنىڭ تاپسىرماسى اياسىندا مەكتەپكە دەيىنگى ۇيىمداردىڭ پەداگوگتەرىن اتتەستاتتاۋ جۇيەسى جاڭارتىلىپ، ولاردىڭ جالاقىسى كوتەرىلەدى. سونداي-اق، تاربيەشىلەردىڭ جۇكتەمەسى ازايتىلادى. بۇل مەكتەپكە دەيىنگى تاربيەشىلەرگە بالالارعا كوبىرەك كوڭىل بولۋگە جانە دامىتۋ مەن وقىتۋ ءىس-شارالارىنىڭ تيىمدىلىگىن ارتتىرۋعا كوبىرەك مۇمكىندىك بەرەدى. قازىر بىرنەشە بالاباقشادا پيلوتتىق جوبا جۇرگىزىلىپ جاتىر. ونىڭ اياسىندا تاربيەشىلەرگە ەڭبەكاقى تولەۋ جۇيەسى سىناقتان ءوتىپ جاتىر. سونىمەن قاتار، پيلوتتىق جوبانىڭ قورىتىندىسى بويىنشا مەكتەپكە دەيىنگى ۇيىم پەداگوگتەرىنىڭ ەڭبەكاقىسىن ارتتىرۋ بويىنشا ەسەپ ۇسىنىلادى. نورماتيۆتىك قۇقىقتىق اكتىلەرگە دە وزگەرىستەر ەنگىزىلەدى»، - دەدى وقۋ-اعارتۋ ءمينيسترى اسحات ايماعامبەتوۆ.

سونداي-اق، ۆەدومستۆو باسشىسى 10-11- سىنىپ وقۋشىلارى ءۇشىن اعىلشىن ءتىلى ءپانىنىڭ ساعاتىن كوبەيتۋ جوسپارلانىپ وتىرعانىن ايتتى.

سوڭعى جاڭالىقتار