الماتىلىق ايەل بۇرىنعى كۇيەۋىن پىشاقتاپ تاستادى

الماتى. قازاقپارات - الماتى پوليتسياسى بۇرىنعى ەرلى-زايىپتىلار اراسىنداعى جانجالعا قاتىستى تۇسىنىكتەمە بەردى، دەپ حابارلايدى قازاقپارات ءتىلشىسى.

قۇقىق قورعاۋشى دينا ءتاڭسارى ءوزىنىڭ Instagram پاراقشاسىندا وقيعانىڭ ەگجەي-تەگجەيىن جاريالادى. ايتۋىنشا وعان جابىرلەنۋشىنىڭ ءسىڭىلىسى جۇگىنگەن.

«سالەمەتسىز بە! كامەلەتكە تولماعان بالانىڭ جانە مەنىڭ اپكەم جاناتتىڭ قۇقىقتارى مەن زاڭدى مۇددەلەرىن قورعاۋ ءۇشىن سىزگە جۇگىنۋگە ءماجبۇرمىن. ونىڭ شىمكەنتتىك بۇرىنعى كۇيەۋى 11- قىركۇيەكتە الماتىعا كەلىپ، 2022-جىلدىڭ 12- قىركۇيەگىندە تەلەفون ارقىلى حابارلاسادى. ول ورتاق قىزىنا كيىم ساتىپ الۋعا كومەكتەسەتىنىن ايتتى. ءسويتىپ، ول بالامەن كەزدەسۋگە رۇقسات بەردى. جاقىپوۆ ونىڭ ۇيىنە ماس كۇيىندە كەلگەن. ول بۇرىنعى ايەلىن زورلاپ، كەيىن التى جاستاعى قىزىن دا زورلاماق بولعان. اناسى قىزىن قۇتقارۋ ءۇشىن، بۇرىنعى كۇيەۋىنە پىشاق سۇعىپ الدى»، - دەلىنگەن جازبادا.

قالالىق پوليتسيا دەپارتامەنتى 12- قىركۇيەك كۇنى ساعات 22:00 دە گاگارين كوشەسىندەگى ۇيلەردىڭ بىرىندە ەر ادامنىڭ پىشاق جاراقاتىن العانى تۋرالى قوڭىراۋ تۇسكەنىن اتاپ ءوتتى.

پوليتسەيلەر كەلگەن كەزدە جابىرلەنۋشى جەردە جاتقان. جەدەل جاردەم بريگاداسى كوپتەگەن پىشاق جاراقاتىمەن ونى قالاداعى اۋرۋحانالاردىڭ بىرىنە جاتقىزدى.

اتالعان دەرەك قازاقستان رەسپۋبليكاسى قىلمىستىق كودەكسىنىڭ 106-بابىنىڭ 1-بولىگى (دەنساۋلىققا قاساقانا اۋىر زيان كەلتىرۋ) بويىنشا سوتقا دەيىنگى تەرگەپ-تەكسەرۋدىڭ ءبىرىڭعاي تىزىلىمىنە تىركەلدى.

«ازاماتشا ۋ. ءوزىنىڭ تۇسىنىكتەمەسىندە ماس كۇيدە بولعان بۇرىنعى كۇيەۋىمەن جانجالداسىپ، ارتىنشا پىشاق سالعانىن ايتتى. سونداي-اق ول ازامات ج. -نىڭ بالالاردى باستاپقىدا باسقا بولمەگە قاماپ قويعانىن دا ناقتىلادى. ونىڭ تاراپىنان بالاعا زورلىق-زومبىلىق كورسەتكەنى تۋرالى مالىمدەمە بولعان جوق. تەرگەۋ سوتىنىڭ سانكسياسىمەن ايەلگە ءۇي قاماق تۇرىندەگى بۇلتارتپاۋ شاراسى تاڭدالدى. كۇدىكتىنىڭ ۋاجدەرىن تەكسەرۋ جانە وبەكتيۆتى دەرەكتەردى انىقتاۋ ماقساتىندا ءىس بويىنشا ءبىرقاتار تەرگەۋ ارەكەتتەرى جۇرگىزىلۋدە. ءتيىستى ساراپتامالار تاعايىندالدى»، - دەپ حابارلادى قالالىق پوليتسيانىڭ باسپا ءسوز قىزمەتى.

كەشەندى تەرگەۋ ارەكەتتەرىنىڭ قورىتىندىسى بويىنشا كۇدىكتىنىڭ ءىس-ارەكەتىنە ءتيىستى پروتسەسسۋالدىق شەشىم قابىلدانىپ، قۇقىقتىق باعا بەرىلەدى.

پوليتسەيلەر ازاماتتاردى قازاقستان رەسپۋبليكاسى قىلمىستىق كودەكسىنىڭ 274-بابىنىڭ 2-بولىگىنىڭ تالاپتارىن ساقتاۋعا شاقىرادى. بۇل ەرەجە كورىنەۋ جالعان اقپاراتتى تاراتۋعا تىيىم سالادى.

قازاقستان رەسپۋبليكاسى قىلمىستىق-پروتسەستىك كودەكسىنىڭ 201-بابىنا سايكەس قىلمىستىق ءىس بويىنشا وزگە دە مالىمەتتەر جاريا ەتۋگە جاتپايدى.