سارالانعان گرانت مودەلىن زەرتتەپ جاتىرمىز - ساياسات نۇربەك
«قازىرگى ءبىلىم سالاسىنا قىسىم جاساپ وتىرعان ەڭ ءبىرىنشى ماسەلە - دەموگرافيالىق احۋال. 2020-جىلدىڭ قورىتىندىسىندا قازاقستاندا 425 مىڭ بالا دۇنيەگە كەلدى. ال 2021-جىلى 450 مىڭنان استام بالا تۋدى. سوڭعى رەت بۇل رەكورد ⅩⅩ عاسىردا 1987-جىلى 417 مىڭ بالا بولعان ەدى. ياعني ⅩⅩ عاسىردا قازاق حالقىنىڭ ءبىر عانا رەكوردى 417 مىڭ بولعان ەدى. ال XXI عاسىردىڭ ەكى جىلىندا قاتار رەكورد جاڭارتىلدى. بيىل ەلىمىزدە 400 مىڭعا جۋىق بالا ءبىرىنشى سىنىپقا باردى. ال، 170 مىڭ وقۋشى مەكتەپ ءبىتىردى. ياعني، 10 جىلدان كەيىن مەكتەپ بىتىرۋشىلەر سانى ەكى جارىم ەسە ارتادى دەگەن ءسوز. جوعارى ءبىلىم العىسى كەلەتىن جاستاردىڭ قاتارى دا كوبەيەتىنى تۇسىنىكتى. قىركۇيەكتە 177 مىڭعا جۋىق بالا جوعارى وقۋ ورنىنىڭ ستۋدەنتى اتاندى. ال، جالپى ستۋدەنتتەر كونتينگەنتى 609 مىڭنان استى»، - دەدى س. نۇربەك ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ءمينيستردىڭ ايتۋىنشا، سوڭعى جىلدارى گرانت سانى ارتقان. بيىل 88 مىڭنان استام گرانت ءبولىندى. بۇل بىلتىرعى جىلمەن سالىستىرعاندا 19 پايىزعا كوپ.
2025-جىلعا دەيىن جىل سايىن مەملەكەتتىك گرانت سانى 10 پروتسەنتكە ارتىپ وتىرادى.
«دەگەنمەن، جوعارى بىلىمگە قولجەتىمدىلىك تەتىكتەرى كەڭەيتىلۋى كەرەك. وسى رەتتە مەملەكەت باسشىسىنىڭ تاپسىرماسىمەن سارالانعان گرانتتاردى (30 پايىزدان 100 پايىزعا دەيىن) ەنگىزەمىز. بۇل نەلىكتەن ماڭىزدى؟ ءبىر جاعىنان ءبىز تولىققاندى دارىندى نەمەسە الەۋمەتتىك وسال توپتان شىققان بالالاردى، اۋىل بالالارىن تۇگەل قامتاماسىز ەتە المايمىز. ەكىنشىدەن، 120 بال العان، 75 نەمەسە كەي ماماندىقتاردا 50 بال العان تالاپكەرلەرگە بىركەلكى گرانت بەرىلەدى»، - دەدى عىلىم جانە جوعارى ءبىلىم ءمينيسترى.
قازىرگى ۋاقىتتا جۇمىس توبى قۇرىلعان. سارالانعان گرانت مودەلىن پىسىقتاۋ، شەتەلدىك تاجىريبەلەردى زەرتتەۋ جۇمىستارى ءجۇرىپ جاتىر.
«ماسەلەن، ا ق ش نەمەسە ەۋروپا سىندى دامىعان ەلدەردە دارىندى بالا گرانتتى ءسوزسىز 100 پايىز يەلەنەدى، الايدا ءار وتباسىنىڭ الەۋمەتتىك جاعدايىنا زەر سالىپ، ۇزدىك جوعارى وقۋ ورىندارى جەڭىلدىك بەرىپ جاتادى. ياعني، گرانتتى سارالاپ، بولشەكتەپ بەرەدى. ولاردى 30-40 پايىزعا ءبولىپ بەرەدى. وسى مودەلدى مۇقيات قاراستىرىپ جاتىرمىز. ونىڭ نەگىزگى ماقساتى - دەموگرافيالىق تولقىندى الدىن الا ەسكەرىپ، جوعارى بىلىمگە قولجەتىمدى تەتىكتەردى پىسىقتاۋ»، - دەدى س. نۇربەك.