ەلوردادا تۇرعىن ءۇي قۇرىلىسىنىڭ قارقىنى باسەڭدەي مە
بۇل تۋرالى استانا قالاسى كاسىپكەرلەر پالاتاسىنىڭ ديرەكتورى بەيسەن جولبولديەۆ ايتتى، دەپ حابارلايدى قازاقپارات ءتىلشىسى.
«استانا قالاسىنىڭ ەكونوميكاسىن ەسكەرەتىن بولساق، باسىم بولىگى سەرۆيستىك قىزمەت تۇرىنە جاتادى، ياعني قىزمەت كورسەتۋ مەن ساۋدا-ساتتىق سالالارى جاقسى دامىعان. دەگەنمەن، قۇرىلىس سالاسىن ەكونوميكانىڭ باستى درايۆەرى رەتىندە قاراستىرۋعا بولادى. ويتكەنى بۇل سالادا قالا بويىنشا 100 مىڭعا جۋىق ادام جۇمىسپەن قامتىلعان. ءى ج ءو- ءنىڭ 8-9 پايىزىن قۇرىلىس سالاسى قۇراپ وتىر. جاناما سالالاردى الاتىن بولساق، بۇل كورسەتكىش الدەقايدا جوعارى. وسى ورايدا جيھاز ءوندىرىسى، قۇرىلىس زاتتارى، بازارلار، لوگيستيكا كومپانيالارى قۇرىلىس سالاسىنىڭ اينالاسىندا قىزمەت ەتىپ وتىر»، - دەدى ب. جولبولديەۆ قۇرىلىس سالاسىن تاقىلاۋ ءۇشىن سەنات دەپۋتاتتارىمەن كەزدەسۋ كەزىندە.
ونىڭ ايتۋىنشا، سوڭعى ەكى جىلدا ەلوردا بويىنشا جىل سايىن 3 ميلليون شارشى مەتر كولەمىندە تۇرعىن ءۇي پايدالانۋعا بەرىلىپ جاتىر. بۇل تۇرعىدا بيزنەس جانە باسقا دا عيماراتتاردىڭ قۇرىلىسى ەسەپكە الىنباي وتىر.
«قالا اۋماعىندا ينفراقۇرلىم جەلىلەرىن تارتىپ ۇلگەرمەي جاتىر. سوندىقتان الداعى جىلدارى 2 ميلليون شارى مەترگە دەيىن تومەندەتۋ بويىنشا شەشىم قابىلدانىپ وتىر»، - دەدى بەيسەن جولبولديەۆ.
قالالىق كاسىپكەرلەر پالاتاسىنىڭ مالىمەتىنشە، 3 جىل ىشىندە ەلوردادا 6,135 ميلليون شارشى مەتر تۇرعىن ءۇي سالۋ جوسپارلانعان.
بۇدان بۇرىن حابارلانعانداي، بيىل تامىز ايىندا استانا اكىمى التاي كولگىنوۆ ەلورداداعى تۇرعىن ءۇي قۇرىلىسىنىڭ قارقىنىن باسەڭدەتۋدى ۇسىندى.