عالىمدار جول قۇرىلىسىندا جاڭا ءتاسىل قولدانباق - ق ر ي ي د م

استانا. قازاقپارات - «قازاقستان جول عىلىمي- زەرتتەۋ ينستيتۋتى» ا ق عالىمدارى اتىراۋ وبلىسىنداعى ايماقتىق ماڭىزى بار جولداردىڭ قۇرىلىسىندا جەرگىلىكتى ماتەريالداردى پايدالانۋدىڭ جاڭا تەحنولوگياسىن قولداناتىن بولادى، دەپ حابارلايدى ق ر ي ي د م باسپا ءسوز قىزمەتى.

سونداي- اق جول توسەمىنىڭ تابيعي بەرىكتىگىن ارتتىرۋ ءۇشىن جەرگىلىكتى كليماتتىق جاعدايلار مەن جەر قىرتىسىنىڭ قۇرىلىمى دا نازارعا الىنادى.

بۇعان دەيىن يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ اتىراۋ وبلىسىنا ءىس- ساپارمەن بارعان كەزدە شالعايداعى ەلدىمەكەن تۇرعىندارى جولدىڭ سىن كوتەرمەيتىنى تۋرالى ارىز- شاعىمىن جەتكىزگەن بولاتىن. اتاپ ايتقاندا، ازعىر وڭىرىندەگى جەرگىلىكتى ماڭىزى بار جولدىڭ احۋالى توڭىرەگىندە ءسوز قوزعاعان ازاماتتار مينيسترگە جولدىڭ ساپالى سالىنۋى ءۇشىن ءتيىستى شارا قابىلداۋ قاجەتتىگىن تاپسىرعان ەدى. قايىربەك ايتباي ۇلى اتالعان ماسەلەنى جەكە باقىلاۋىنا الاتىنىن ايتىپ، عالىمدارمەن بىرلەسە عىلىمي تۇرعىدا كليماتتىق ەرەكشەلىكتى ەسكەرە وتىرىپ، جول سالۋ تەحنولوگياسىن قايتا قارايتىنىن ۋادە ەتكەن.

ەندى مىنە، يننوۆاتسيالىق تەحنولوگيا العاش رەت اتىراۋ وبلىسىنىڭ ازعىر وڭىرىندەگى اۆتوموبيل جولىن ورتاشا جوندەۋ جۇمىستارىندا قولدانىلماق. قۇرمانعازى اۋدانىندا وتكەن قوعامدىق تىڭداۋدا وسى ماسەلە ەگجەي- تەگجەيلى تالقىلاندى. باسقوسۋعا ءمينيستردىڭ تىكەلەي تاپسىرماسىمەن قۇرىلعان توپ، ياعني، قازاقستان جول عىلىمي- زەرتتەۋ ينستيتۋتىنىڭ عالىمدارى، سونداي- اق جەرگىلىكتى اتقارۋشى ورگان وكىلدەرى مەن اۋداندىق قوعامدىق كەڭەس مۇشەلەرى قاتىستى.

جيىندا «قازاقستان جول عىلىمي- زەرتتەۋ ينستيتۋتى» ا ق اۆتوموبيل جولدارى جانە كوپىر قۇرىلىمدارى دەپارتامەنتىنىڭ ديرەكتورى اسحات بايباتىروۆ ازعىر وڭىرىندەگى جەر بەدەرىنىڭ ەرەكشەلىگىنە نازار اۋدارىپ، جول قۇرىلىمىنا زياندى پروتسەستىڭ الدىن الاتىن جاڭا تەحنولوگيالاردىڭ زەردەلەنىپ جاتقانىن اتاپ ءوتتى.

«بۇل اۆتوموبيل جولى بەسىنشى كاتەگورياعا جاتادى. ازعىر ايماعى نارىن قۇمىندا ورنالاسقاندىقتان، مۇنداعى جول ۋچاسكەلەرىندە قۇم، ساز جانە سور كەزدەسەدى. سوندىقتان دا جوندەۋ جۇمىستارىن ءبىر جوبامەن جۇرگىزۋ مۇمكىن ەمەس. وسى ماسەلەنى شەشۋ ءۇشىن مينيسترلىك جول ۋچاسكەسىندە جاڭا تەحنولوگيالاردى ەنگىزۋدى تاپسىردى. ول وڭ ناتيجەسىن بەرسە، يننوۆاتسيالىق شەشىم وڭىردەگى وزگە دە جول جوندەۋ جۇمىستارىندا قولدانىلاتىن بولادى»، - دەپ اتاپ ءوتتى اسحات بايباتىروۆ.

اتالعان ايماقتاعى اۆتوموبيل جولىن جوندەۋ جۇمىستارى وتكەن جىلى باستالعان بولاتىن. بۇعان دەيىن 36 شاقىرىمنان استام جول توسەمى توسەلدى. ال بيىل جول ۋچاسكەسىنىڭ قالعان بولىگىنىڭ جوباسى جاسالىپ، جوندەۋ جۇمىستارى جۇرگىزىلۋدە. عالىمدار رەكونسترۋكتسيالاۋ جۇمىستارىنا جەرگىلىكتى قۇرىلىس ماتەريالدارىن قولدانۋدى دا قاراستىرۋدا.

«جول سالاسىندا جەرگىلىكتى ماتەريالدارعا باسىمدىق بەرۋ - ەل ەكونوميكاسىنا وڭ اسەر تيگىزەتىنى بەلگىلى. ياعني، ونى تاسىمالداۋ كەزىندەگى قىرۋار شىعىندار ازايادى»، - دەيدى ماماندار.