پوليتسەيلەر ينتەرنەت- الاياقتىقتىڭ جاڭا ءادىسى تۋرالى ەسكەرتەدى
قازاقستان تۇرعىندارى ءۇشىن ينتەرنەت- الاياقتىقتىڭ جاڭا ءتاسىلىنىڭ قاۋپى ءتونىپ تۇر. قاسكويلەر ءىرى بانكتىڭ بەلگىلى ءموبيلدى قوسىمشاسىن پايدالانۋدا. جابىرلەنۋشىلەردىڭ بارلىعى ءموبيلدى قوسىمشاى ارقىلى سالىق بويىنشا نەمەسە كوممۋنالدىق قىزمەت تولەمى ءۇشىن ەسەپ شوتتارى تۋرالى حابارلامالار العان جانە ولاردى تولەگەن. اقشا جالعان كاسىپكەر رەتىندە شوتقا شىعارعان كيبەرقىلمىسكەرلەردىڭ قالتاسىنا ءتۇسىپ وتىرعان.
پوليسەيلەردىڭ ايتۋىنشا فەيك حابارلامالاردى اجىراتۋ قيىن ەمەس. جالعان حابارلامالاردا «ساتۋشى» دەگەن ءسوز بار، ال سالىق نەمەسە كوممۋنالدىق قىزمەت تولەمدەرىن الۋ قۇقىعى بار ۇيىمداردان كەلەتىن حابارلامالاردا ول ءسوز بولمايدى. شىنايى حابارلامانىڭ سول جاعىندا ۇيىمنىڭ لوگوتيپى ورنالاسقان - الاياقتاردا لوگوتيپتىڭ ورنىنا ەسىمنىڭ نە تەگىنىڭ ءبىرىنشى ءارپى بولادى. الاياقتار كورسەتەتىن «ق ر سالىق ا ق»، «KAZtransGAZ ا ق» جانە ت. ب. سياقتى ۇيىم اتاۋلارى ناقتى ۇيىمداردىڭ اتاۋلارىنا ۇقساس كورىنگەنىمەن، تولىق سايكەس كەلمەيدى.
قىلمىسكەرلەردىڭ ەسەبى - ادامداردىڭ باسىم بولىگى تولەمدى اۆتوماتتى تۇردە جاساۋىنا كوزدەلگەن. قاسكويلەر سولتۇستىكقازاقستاندىقتاردان 12 ميلليوننان استام تەڭگەنى ولجالاعان.
«قازىرگى ۋاقىتتا س ق و پوليسيا دەپارتامەنتى وبلىستىق بانك فيليالى اتىنا اقپاراتتىق حات جولدادى. حاتتا الاياقتاردىڭ بانكتە تىركەلۋ مۇمكىندىگىن ازايتۋ بويىنشا ۇسىنىمدار كورسەتىلگەن. وبلىس تۇرعىندارىن ساق بولۋعا شاقىرامىز. تولەم جاساۋ تۋرالى حابارلاما الا قالعان جاعدايدا، شىن تۇبىرتەكتەرمەن سالىستىرىڭىز. كۇماندانساڭىز، ۇيىمعا حابارلاسىڭىز جانە حابارلاما جولداعانى نە جولداماعانى تۋرالى ناقتىلاپ سۇراڭىز»، - دەيدى س ق و پد كريمينالدىق پوليسيا باسقارماسىنىڭ باستىعى مارات جۇماليەۆ.