ۋكرايناداعى اسكەري قاقتىعىستى تەك كەلىسسوز ارقىلى شەشۋدىڭ جولىن ىزدەۋ كەرەك - ماۋلەن اشىمبايەۆ
22 قىركۇيەك 14:19

ۋكرايناداعى اسكەري قاقتىعىستى تەك كەلىسسوز ارقىلى شەشۋدىڭ جولىن ىزدەۋ كەرەك - ماۋلەن اشىمبايەۆ

استانا. قازاقپارات - ۋكرايناداعى اسكەري قاقتىعىستى تەك بەيبىت جولمەن توقتاتۋ كەرەك. بۇل تۋرالى سەنات ءتوراعاسى ماۋلەن اشىمبايەۆ ايتتى، دەپ حابارلايدى قازاقپارات ءتىلشىسى.

«رەسەيدە ءىشىنارا موبيليزاتسيا جاريالانعانى بەلگىلى. وسى ورايدا ءتۇرلى سۇراقتار قويىلىپ جاتىر. بۇل تۇرعىداعى ءبىزدىڭ ۇستانىمىزعا توقتالساق، قاقتىعىستى تەك كەلىسسوز ارقىلى شەشۋگە بولادى. قاقتىعىستى اسكەري جولمەن شەشۋدىڭ مۇمكىندىكتەرى جوق دەپ ەسەپتەيمىز. سوندىقتان اتالعان قاقتىعىس باستالعان ءبىرىنشى كۇننەن باستاپ قازاقستاننىڭ ۇستانىمىن جاريالاپ، وندا كەلىسسوز ارقىلى بەيبىت جولمەن توقتاتۋ ۇستانىمىن ايتىپ كەلەمىز. اتاپ ايتقاندا، بۇل ماسەلەگە قاتىستى ءبىزدىڭ ۇستانىم وزگەرمەدى. قانداي قيىن جاعداي بولىپ جاتسا دا، بۇكىل ەموتسيانى قويىپ، قاقتىعىستى ساياسي جولمەن شەشۋدىڭ قادامدارىن ىزدەۋ كەرەك»، - دەدى م. اشىمبايەۆ سەناتتىڭ جالپى وتىرىسىنان كەيىن تىلشىلەر ساۋالىنا جاۋاپ بەرە وتىرىپ.

سونىمەن قاتار ول رەسەيدەگى ءىشىنارا موبيليزاتسيا وسى ەلدىڭ ىشكى پروتسەسى ەكەنىن ايتا كەلە، قاقتىعىسقا قاتىسىپ جاتقان تاراپتار ءبىر مامىلەگە، شەشىمگە كەلەتىنىنە سەنىم ءبىلدىردى.

بۇدان بولەك قازاقستان مەن رەسەي اراسىنداعى شارتتارعا قاتىستى توقتالعان سەنات ءتوراعاسى: «وسى ورايدا قازاقستانعا قاتىستى ايتاتىن بولساق، بۇل جاعدايعا بويىنشا ءتيىستى مەملەكەتتىك ورگاندار بولىپ جاتقان ۇردىستەردى قاراپ وتىر. ارى قاراي جاعدايعا بايلانىستى اقىلداسا وتىرىپ، ءتيىستى ماسەلەلەر قارالاتىن بولادى. جالپى، قازاقستان مەن رەسەي ەۋرازيالىق ەكونوميكالىق وداق قۇرامىندا. ءبىزدىڭ ارامىزدا كەلىسىمدەر مەن شارتتار بار. قۇجاتتارعا سايكەس رەسەي ازاماتتارى ەلىمىزدىڭ اۋماعىنا ساپارلاپ كەلسە، ولارعا قاتىستى شەكتەۋ جوق»، - دەدى.

اۆتور

رۋسلان عابباسوۆ


جاڭالىقتار