جەر بەتىنە تارىداي شاشىراعان قازاق تاعدىرى تۋرالى تەلەجوبا ەكرانعا شىعادى
ⅩⅩ عاسىردىڭ باسىنداعى قازاق تاريحى تۋرالى اڭگىمە بولا قالسا، «جەر بەتىنە تارىداي شاشىلعان قازاق» دەگەن تىركەس ايتىلاتىنى بار. سول تاريحتى جاساۋشىلاردىڭ كوبىنىڭ ۇرپاعى قازىر التى قۇرلىقتىڭ ءار قيىرىن مەكەن ەتىپ جاتىر. اتا مەكەنىنەن، قازاقي ورتادان اجىراعاندارىنا عاسىرعا جۋىق ۋاقىت بولسا دا، ەرەسەكتەرى ءتىلى مەن ءدىنىن ساقتاپ، ۇرپاق بويىنا ۇلتتىق بولمىستى دارىتۋدان جاڭىلماي كەلەدى.
«Jibek joly» تەلەارناسىنىڭ «قيانداعى قانداستار» اتتى جوباسى شەت جۇرتتا قالعان، تاعدىرى تالايلى قانداستارىمىزدىڭ بۇگىنگى تۇرمىسى مەن قازىرگى جاعدايى، كەشەگى قيىندىقتارىن ارقاۋ ەتەدى. جوبا كورەرمەنگە 24-قىركۇيەكتە جول تارتپاق. ءار اپتانىڭ سەنبىسى كۇنى، ساعات 14:30 دا ەفيرگە شىعادى.
«باعدارلاما 10 سەريادان تۇرادى. ءبىز يتاليا، يسپانيا، گەرمانيا، فرانسيا، نيدەرلاند، بەلگيادا تۇراتىن قازاقتار تۋرالى تۇسىردىك. وسى ەلدەردەگى باۋىرلارىمىز تۋرالى ۇلكەن سيكلدى فيلمدەر ۇسىناتىن بولامىز»، - دەيدى جوبانىڭ پروديۋسەرى الپامىس شاريموۆ.