ريم پاپاسى ەلىمىزگە ساپارى قارساڭىندا دومبىرا جايىندا مالىمەتتەرمەن تانىسقان

نۇر-سۇلتان. قازاقپارات - بۇگىن ەلىمىزگە مەملەكەتتىك ساپارمەن كەلگەن ريم پاپاسى فرانسيسك ۇلتتىق اسپابىمىز دومبىرا تۋرالى كوپ مالىمەتپەن تانىسقان.

بۇل تۋرالى «Jibek Joly» تەلەارناسىنداعى «جاڭا ۋاقىت» باعدارلاماسىنا سۇحبات بەرگەن ق ر پارلامەنتى ءماجىلىسىنىڭ دەپۋتاتى ايگۇل قاپباروۆا مالىمدەدى، دەپ حابارلايدى قازاقپارات ءتىلشىسى.

«بۇگىن مەملەكەت باسشىسىنىڭ قاتىسۋىمەن جيىن ءوتتى. وندا ريم پاپاسى قازاقستاندىقتارعا ءسوز ارناۋىن ايتتى. ول ءوز سوزىندە قازاقتىڭ ءداستۇرى مەن مادەنيەتىنە توقتالدى. اسىرەسە، ءبىزدىڭ ۇلتتىق اسپابىمىز دومبىرا تۋرالى كوپ مالىمەتپەن تانىسىپتى. قازاقستانعا ات باسىن بۇرعاسىن، ونىڭ مادەنيەتى مەن ادامگەرشىلىك قاعيدالارىن ابدەن زەرتتەگەن بولۋى كەرەك. 2000-جىلداردان بەرى قازاقستان رۋحاني پىكىرالماسۋ الاڭى بولىپ وتىر. بۇل باعىتتا ەلىمىز الەمدىك جاعدايدى جاقسارتۋدا گۋمانيستىك قادام جاساپ كەلەدى. العاشقى سەزگە الەمنىڭ 13 ەلىنەن كەلگەن دەلەگاتسيا قاتىسقان بولسا، بيىل 50 مەملەكەتتەن 100-دەن اسا دەلەگاتتار قاتىسىپ وتىر»، - دەدى ايگۇل قاپباروۆا.

سۇحبات بارىسىندا ءماجىلىس دەپۋتاتى الەمدىك جانە ءداستۇرلى دىندەر ليدەرلەرىنىڭ VII سەزىنە وراي، قازىر الەم ەلدەرىنىڭ نازارى قازاقستاندا ەكەنىن اتاپ ءوتتى.

«مۇنداي سەزدى وتكىزۋ - قازاقستاننىڭ سىرتقى ساياساتتاعى ۇلكەن جەڭىسى. ويتكەنى، قازىرگى كەزەڭدە كوپتەگەن ەلدەردە شيەلەنىس بولىپ جاتىر. سوندىقتان ريم پاپاسى مەملەكەت باسشىسىنىڭ شاقىرتۋىن قابىل الىپ، سەزگە ارنايى كەلدى. بەلدى ءدىن ليدەرلەرى قاقتىعىستار مەن شيەلەنىستەردى بەيبىت جولمەن شەشۋ ءۇشىن باس قوسۋدا»، - دەپ ءمالىم ەتتى دەپۋتات.

ايگۇل قاپباروۆانىڭ مالىمەتىنشە، سەزد قورىتىندىسى بويىنشا قابىلداناتىن دەكلاراتسيا بىرىككەن ۇلتتار اسسامبلەياسىندا رەسمي قۇجات رەتىندە بەكىتىلەدى.