مۇمكىندىگى شەكتەۋلى بالالاردى وقىتاتىن مەكتەپتەر ەكى ەسە كوپ قارجى الۋى كەرەك - مينيستر

نۇر-سۇلتان. قازاقپارات - اپپارات جينالىسىن وتكىزگەن وقۋ-اعارتۋ ءمينيسترى اسحات ايماعامبەتوۆ مۇمكىندىگى شەكتەۋلى بالالاردى وقىتۋدا وڭىرلەردە ءجيى كەزدەسەتىن ماسەلەلەردى اتادى.

ونىڭ ايتۋىنشا، ينكليۋزيۆتى سىنىپتاردا وقيتىن بالالاردى جان باسىنا قارجىلاندىرۋ ءۇشىن مەكتەپتەر ەكى ەسە قاراجات الۋى كەرەك، دەپ حابارلايدى قازاقپارات ءتىلشىسى.

«جان باسىنا قارجىلاندىرۋ ماسەلەسى وتە ماڭىزدى. ءبىز ەرەكشە ءبىلىمدى قاجەت ەتەتىن بالالاردى جان باسىنا قارجىلاندىرۋ كوەففيتسيەنتىن بەلگىلەدىك. ول 2 كوەففيتسيەنتكە تەڭ. ەگەر بىزدە جالپى مەكتەپكە باراتىن بالالاردى جان باسىنا قارجىلاندىرۋ 500 مىڭ بولسا، ال ينكليۋزيۆتى سىنىپتاردا وقيتىن بالالار ءۇشىن سىزدەر ەكى ەسە قارجى الۋلارىڭىز كەرەك. ءبىراق وڭىرلەرگە بارعاندا وسى قاعيدانىڭ تولىق ورىندالماي جاتقانىن كورىپ جاتىرمىز. سوندىقتان ءبىلىم باسقارمالارى جانە بولىمدەرى وسى ماسەلەنى باقىلاۋعا الىپ، ءتيىستى شەشىم قابىلداۋى كەرەك. سىزدەر ونى قالايسىزدار ما، قالامايسىزدار ما، زاڭ بويىنشا سولاي بولۋى ءتيىس. ەگەر ەرەكشە ءبىلىمدى قاجەت ەتەتىن بالا مەكتەپكە كەلەتىن بولسا، سول بالا ءۇشىن قارجىنى ەكى ەسە كوپ الۋ كەرەك. ويتكەنى ول بالاعا قوسىمشا تيۋتورلار كەرەك، ءتيستى ورتا قالىپتاستىرۋ قاجەت. ءبىز وسى ويمەن وسىنداي شەشىم قابىلداعان بولاتىنبىز»، - دەپ اتاپ ءوتتى مينيستر.

اپپارات جيىنالىسىندا اسحات ايماعامبەتوۆ مۇمكىندىگى شەكتەۋلى بالالاردى بالاباقشالارعا ورنالاستىرۋ ماسەلەسىنە دە توقتالدى.

«ەگەر بالاباقشاعا ەرەكشە بالا كەلسە، وندا سول توپتاعى ءۇش بالا قىسقارۋى كەرەك دەگەن قاعيدا بار. ماعان ارىپتەستەرىم جازىپ جاتقانداي، وسى قاعيدانى ورىنداۋ وتە قيىن. نەگە؟ ويتكەنى، 25 بالا بالاباقشاعا الىنىپ قويادى. كەيىن ەرەكشە ءبىلىمدى قاجەت ەتەتىن 3 بالا كەلسە، توپتاعى 9 بالا ازايۋى كەرەك. ءبىراق ونى قىسقارتۋ قيىن. سوندىقتان وسى ماسەلەنىڭ شەشىمىن تاۋىپ، الدىن الا ءبىر ۇسىنىس بەرىڭىزدەر»، - دەپ جەرگىلىكتى ءبىلىم باسقارمالارى مەن بولىمدەرىنە مىندەت جۇكتەدى مينيستر.

بۇرىن حابارلاعانىمىزداي، وقۋ-اعارتۋ ۆيتسە-ءمينيسترى عاني بەيسەمبايەۆ ۆەدومستۆودا وتكەن اپپارات جينالىسىندا 2026-جىلعا دەيىن مەكتەپتەردەگى تاپشىلىق 1 ميلليون 117 مىڭ 900 ورىندى قۇراۋى مۇمكىن ەكەنىن ايتقان ەدى.

سونىمەن قاتار، ول مەكتەپتكەردىڭ ساپاسىز سالىنۋىنا قاتىستى پىكىر ءبىلدىردى.

ايتۋىنشا، مەردىگەرلەر بارىنشا پايدا تابۋ ماقساتىندا ساپاسىز، ارزان قۇرىلىس ماتەريالدارىن پايدالانادى. سالدارىنان 3-5 جىلدان كەيىن ساپاسىز قۇرىلىس قايتا كۇردەلى جوندەۋ جۇمىستارىن تالاپ ەتەدى.