بالاعا تاريح پەن ءداستۇردى تۇسىنىكتى تىلمەن جەتكىزۋدىڭ جولى قانداي؟

None
نۇر-سۇلتان. قازاقپارات - بالالارعا كىشكەنتاي جاسىنان تاريح پەن ءداستۇر تۋرالى ايتۋ ماڭىزدى. مۇنداي بالا ءوز ەلىنە، جەرىنە جاناشىر بولىپ كەلەدى.

ءبىراق وعان تاريحتى ساۋاتتى جەتكىزۋدە قيىندىقتار پايدا بولۋى مۇمكىن. IBalaqai YouTube-ارناسىنا قازاق ميفولوگياسىن زەرتتەۋشى، جازۋشى جانە كينوسەناريست زيرا ناۋرزبايەۆا بالاعا تاريح پەن ءداستۇردى تۇسىنىكتى تىلمەن جەتكىزۋدىڭ جولىن ايتتى.

زەرتتەۋشىنىڭ ايتۋىنشا، زاماناۋي باتىس ويشىلدارى قازىر ءداستۇر مەن تاريح قولدان جاسالاتىنىن العا تارتادى، ءتىپتى ۇلت قۇرۋدىڭ قۇرالدارى دا بار دەيدى. ول تاريحتى اسىرەسە ۇل بالاعا دۇرىس جەتكىزۋ ماڭىزدى ەكەنىن ايتادى.

«مۇحتار ماعاۋيننىڭ «قازاق تاريحىنىڭ الىپپەسى» كىتابىندا توعىم حان تۋرالى ايتىلعان. ول سانتاشتا بولعان شايقاستا موعولدىڭ ءبارىن قىردى، ءبىراق شايقاستا وزىمەن بىرگە 9 ۇلى قازا تاپتى. ولار وتاۋ قۇرماعان، جاسوسپىرىمدەر ەدى. ەشكىمنەن ۇرپاق قالمادى. بۇل تۋرالى قازىر ءبىر وقۋلىقتا ايتىلا ما؟

قازاقتا ۇلتتىق ەليتا - شايقاس الدىندا جۇرەتىندەر. بالالارىمەن، نەمەرەلەرىمەن ەلدى العا باستايدى. الاش وردا قايراتكەرلەرى دە سولاي ەتكەن. مۇنى كىشكەنتاي بالاعا ايتۋدىڭ كەرەگى جوق. بالاعا اسەر ەتۋى مۇمكىن ارينە، ءبىراق ءبىز بۇل تۋرالى ايتۋىمىز كەرەك. ارتىق كەتۋدىڭ قاجەتى جوق. بالاعا تاريحىمىز ەرلىككە دە، قايعىعا دا، باقىتقا دا تولى ەكەنىن ايتۋ كەرەك. تاريحىمىز ارتتا قالعانى راس. ءبىراق جاڭگىر حاننىڭ ارمانىن، ءاليحاننىڭ قالاۋىن ءبىلۋ كەرەك. سولاي عانا بالا ەلىن العا باستاۋعا ۇمتىلادى»، - دەيدى زيرا ناۋرىزبايەۆا.

سوڭعى جاڭالىقتار