قازاقستاندىق بوكسشىلار وليمپياداعا قاتىسپاي قالۋى مۇمكىن
ح و ك حالىقارالىق بوكس فەدەراتسياسىنداعى (IBA) جاعدايعا الاڭداۋشىلىق ءبىلدىرىپ، فەدەراتسيانى رەفورمالاۋ پروتسەسىن باقىلاۋدى جالعاستىرادى، دەپ حابارلايدى قازاقپارات Sports.kz-كە سىلتەمە جاساپ.
بۇعان دەيىن، ءساۋىر ايىندا ح و ك IBA ازىرلەگەن پاريجدەگى ويىندارعا ىرىكتەۋ باعدارلاماسىن بەكىتكەن بولاتىن، الايدا ماۋسىم ايىندا فەدەراتسيانى وليمپيادا ويىندارىنا ىرىكتەۋ شارالارىنان تاعى دا شەتتەتتى.
Allboxing.ru سايتىنىڭ حابارلاۋىنشا، جاڭا ەرەجە بويىنشا پاريج وليمپياداسىنا ىرىكتەۋ 2023-جىلى وتەتىن بەس ايماقتىق حالىقارالىق تۋرنيردىڭ قورىتىندىسى بويىنشا جۇرگىزىلەدى. بۇل سانتياگوداعى پانامەريكالىق ويىندار، كراكوۆتاعى ەۋروپا ويىندارى، سولومون ارالىنداعى تىنىق مۇحيتى ويىندارى جانە گۋانجوۋداعى ازيا ويىندارى. افريكا ەلدەرى مەن ح و ك قاۋىمداستىعى اراسىندا اككراداعى افريكا ويىندارىن دا ىرىكتەۋ تۋرنيرى رەتىندە ەسەپتەۋ تۋرالى كەلىسسوزدەر جالعاسۋدا.
2024-جىلى ح و ك قالعان وليمپيادا ليتسەنزيالارى تاراتىلاتىن ەكى دۇنيەجۇزىلىك ىرىكتەۋ تۋرنيرىن وتكىزۋدى جوسپارلاپ وتىر.
ح و ك سپورت ديرەكتورى كيت ماكدوننەلل ۇلتتىق فەدەراتسيالار، بوكسشىلار، جاتتىقتىرۋشىلار مەن تەحنيكالىق مامانداردىڭ بۇرىنعى ىرىكتەۋ ۇلگىسىنە قاتىستى سۇراقتارى بار ەكەنىن، سونىمەن قاتار جاڭا مودەل جەڭىلىرەك ءارى سپورتشىلاردىڭ مۇددەسىن قورعايتىنىن اتاپ ءوتتى.
سونداي-اق IBA پرەزيدەنتى ۋمار كرەمليەۆكە جولداعان حاتىندا ح و ك فەدەراتسيانى رەفورمالاۋعا قاتىستى كۇش-جىگەر جەتكىلىكسىز دەڭگەيدە جۇمسالىپ جاتقانىنا الاڭداۋشىلىق ءبىلدىرىپ، بوكستىڭ 2028-جىلعى وليمپيادا باعدارلاماسىنا ءالى ەنگىزىلمەگەنى باسا ايتىلعان.
25- قىركۇيەكتە ەريەۆاندا IBA- نىڭ كەزەكتەن تىس كونگرەسى وتەدى، وندا فەدەراتسيا پرەزيدەنتى قايتا سايلانادى.