دەپۋتاتتار تۇڭعىش پرەزيدەنت كۇنىن مەملەكەتتىك مەرەكە قاتارىنان الىپ تاستاۋدى تالقىلايدى

نۇر-سۇلتان. قازاقپارات – ق ر پارلامەنت ماجىلىسىنە تۇڭعىش پرەزيدەنت كۇنىن مەملەكەتتىك مەرەكەلەر قاتارىنان الىپ تاستاۋعا باعىتتالعان زاڭ جوباسى ۇسىنىلدى، دەپ حابارلايدى قازاقپارات ءتىلشىسى.

مۇنداي باستاما «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كينەماتوگرافيا جانە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ قورىتىندىسىندا كورىنىس تاپقان.

قورىتىندى ماتىنىندە مۇنداي وزگەرىس مەملەكەت باسشىسى قاسىم-جومارت توقايەۆتىڭ 16-ماۋسىمداعى ۇلتتىق قۇرىلتاي وتىرىسىندا بەرگەن تاپسىرماسىن ورىنداۋ ءۇشىن ەنگىزىلەتىنى ايتىلعان.

سونىمەن، اتالمىش زاڭ جوباسىنا مىناداي نورمالار ۇسىنىلىپ وتىر.

- 25-قازاندى ۇلتتىق مەرەكە - رەسپۋبليكا كۇنى رەتىندە ايقىنداۋ؛

- 16-جەلتوقسان - تاۋەلسىزدىك كۇنىن مەملەكەتتىك مەرەكە رەتىندە بەلگىلەۋ.

- 1-جەلتوقسان - تۇڭعىش پرەزيدەنت كۇنىن مەملەكەتتىك مەرەكەلەر قاتارىنان الىپ تاستاۋ.

زاڭ جوباسى ماقۇلدانسا، اتالعان داتا مەملەكەتتىك رامىزدەر كۇنى، العىس ايتۋ كۇنى سياقتى قوعامدىق ماڭىزى جوعارى ايتۋلى كۇن رەتىندە مەرەكەلەنبەك.

اۆتور ەسىمجان ناقتىباي