شايبالى حوككەيدەن ق ر پرەزيدەنتى كۋبوگىنىڭ بيىلعى جۇلدەگەرلەرى انىقتالدى

نۇر-سۇلتان. قازاقپارات - شايبالى حوككەيدەن قازاقستان پرەزيدەنتى كۋبوگىنىڭ بيىلعى جۇلدەگەرلەرى انىقتالدى، دەپ حابارلايدى قازاقپارات ءتىلشىسى.

بۇل ءۇشىنشى تۋرداعى «نەفتەحيميك» (نيجنەكامسك) جانە «اۆتوموبيليست» (ەكاتەرينبۋرگ) كەزدەسۋىنەن كەيىن بەلگىلى بولدى. نيجنەكامسك كلۋبى قارسىلاسىن 4:3 ەسەبىمەن تىزە بۇكتىردى. ناتيجەسىندە نەبارى 2 ۇپاي جيناعان ولار تۋرنير كەستەسىندە ءتورتىنشى ورىندى قاناعات تۇتتى.

ال «اۆتوموبيليست» 3 ۇپايمەن ازىرگە ەكىنشى ورىندا كەلەدى.

تۋرنير جەڭىمپازى بۇگىن ەلوردالىق «بارىس» جانە «مەتاللۋرگ» (ماگنيتوگورسك) كەزدەسۋىنەن كەيىن بەلگىلى بولادى. ويىن «Qazsport» تەلەارناسىنان تىكەلەي ەفيردە كورسەتىلەدى.

قازىرگە دەيىن «بارىس» ەكى ويىن وتكىزدى. الدىمەن «اۆتوموبيليستكە» 3:4 ەسەبىمەن جول بەرىپ، ودان كەيىن «نەفتەحيميكتى» 3:0 ەسەبىمەن تىزە بۇكتىردى.

ال ەكى مارتە جەڭىسكە جەتكەن «مەتاللۋرگ» 4 ۇپايمەن كوش باسىندا تۇر.

اتالعان تۋرنير 2010-جىلدان بەرى تۇراقتى وتكىزىلىپ كەلەدى.