قاسىم-جومارت توقايەۆ رەسەي پرەزيدەنتىن ت م د سامميتىنە شاقىردى

سوچي. قازاقپارات - قازاقستان پرەزيدەنتى قاسىم-جومارت توقايەۆ پەن ر ف پرەزيدەنتى ۆلاديمير پۋتين سوچيدە كەزدەسۋ وتكىزدى، دەپ حابارلايدى قازاقپارات ءتىلشىسى.

«شىنىندا دا، قازاقستان مەن رەسەيدىڭ ستراتەگيالىق سەرىكتەستىكتەگى قارىم-قاتىناسى بار. بيىل ءبىز 30 جىل بۇرىن ورناتىلعان ديپلوماتيالىق قاتىناستارىمىزدىڭ ۇلكەن مەرەيتويىن اتاپ وتەمىز. 30 جىل بۇرىن دوستىق، ىنتىماقتاستىق جانە ءوزارا كومەك تۋرالى العاشقى كەلىسىمگە قول قويىلدى. 2013-جىلى بۇل كەلىسىم ەكى ەل اراسىنداعى وداقتاستىق قارىم-قاتىناستار تۋرالى سىزبەن بىرگە قول قويعان جاڭا قۇجاتپەن تولىقتى. سوندىقتان مۇنىڭ نەگىزى وتە جاقسى»، - دەدى قاسىم-جومارت توقايەۆ كەزدەسۋ بارىسىندا.

«ساۋدا-ەكونوميكالىق ىنتىماقتاستىققا كەلسەك، ول دا تابىستى دامىپ كەلەدى. ونەركاسىپتىك كووپەراتسيا ەلەۋلى ناتيجەلەرگە قول جەتكىزۋدە. ءسىز اتاپ وتكەندەي، وڭ ساۋدا ديناميكاسى بايقالىپ وتىر»، - دەدى مەملەكەت باسشىسى.

وتكەن جىلى ەكى ەل اراسىنداعى ساۋدا كولەمى 24,5 ميلليارد دوللاردى قۇراعان. قازاقستان پرەزيدەنتى اتاپ وتكەندەي، رەسەي قازاقستاننىڭ تاۋار اينالىمىندا ءبىرىنشى ورىن الادى. بيىل دا ساۋدا ايتارلىقتاي تابىستى دامىپ كەلەدى.

«ءبىز ب ۇ ۇ- داعى، باسقا دا حالىقارالىق ينستيتۋتتارداعى نەگىزگى الاڭداردا بەلسەندى ءوزارا ءىس-قيمىل جاسايمىز. بيىل قازاقستان ت م د- عا ءتوراعالىق ەتەدى. قازان ايىندا تاۋەلسىز مەملەكەتتەر دوستاستىعىنىڭ سامميتى وتەدى. وعان ءسىزدىڭ كەلەتىنىڭىزگە ۇمىتتەنەمىز. ونىڭ ۇستىنە رەسەي تاۋەلسىز مەملەكەتتەر دوستاستىعىندا ماڭىزدى ءرول اتقارادى. بۇل شىن مانىندە ءبىزدىڭ حالىقارالىق فورماتتاعى ءوزارا ىنتىماقتاستىعىمىزدىڭ باسىم باعىتتارىنىڭ ءبىرى»، - دەدى قاسىم-جومارت توقايەۆ.

بۇعان دەيىن پرەزيدەنت قاسىم-جومارت توقايەۆ جۇمىس ساپارىمەن سوچي قالاسىنا بارعانى حابارلانعان بولاتىن.