داۋرەن ابايەۆ سپورت سالاسى قىزمەتكەرلەرىن ماراپاتتادى
كاسىبي مەرەكە قارساڭىندا مادەنيەت جانە سپورت ءمينيسترى داۋرەن ابايەۆ سالا قىزمەتكەرلەرىن ماراپاتتادى، دەپ حابارلايدى قازاقپارات.
«ەلىمىزدە سپورت ءارتۇرلى جاستاعى، ۇلت پەن كاسىپتەگى كوپتەگەن ادامداردىڭ باسىن بىرىكتىرەدى. سپورتتا الەۋمەتتىك مارتەبەگە نەمەسە گەوگرافياعا ەشقانداي شەكتەۋلەر جوق. شىنتۋايتىنا كەلگەندە سپورت ماڭىزدى ادامي قۇندىلىقتارعا يە جانە دە سپورت جالپى ۇلتتىڭ فيزيكالىق دەنساۋلىعىن نىعايتۋعا ىقپال ەتەدى. جىلدان جىلعا سپورت قاۋىمداستىقتارى مەن سەكسيالارىنىڭ سانى ارتىپ، سپورتپەن ۇنەمى اينالىساتىن ازاماتتاردىڭ سانى ارتىپ كەلەدى. ارينە، بۇل جەردە جاتتىقتىرۋشىلاردىڭ، تورەشىلەردىڭ جانە سپورت مەنەدجەرلەرىنىڭ ەڭبەگى زور. مۇنىڭ ءبارى ولاردىڭ تاڭداعان ماماندىعىنا دەگەن ىنتاسى مەن ادالدىعىنا تىكەلەي بايلانىستى»، - دەدى داۋرەن ابايەۆ.
سالتاناتتى ءىس-شارا وليمپيادا رەزەرۆىنىڭ وبلىستىق جانە رەسپۋبليكالىق مامانداندىرىلعان مەكتەپ-ينتەرنات-كوللەدجدەرىنىڭ جۇمىسى ماسەلەلەرى جونىندەگى كەڭەس شەڭبەرىندە ءوتتى.
«قازىر مەكتەپ-ينتەرنات-كوللەدجدەردە تاياۋ جىلدارى وتەتىن ءىرى جارىستاردا ەل نامىسىن قورعايتىندار وقىپ ءجۇر. ءبىر سوزبەن ايتقاندا سىزدەر قازاقستاننىڭ سپورت ەليتاسىن دايىنداپ جاتىرسىزدار. ءبىراق، وكىنىشكە قاراي، دايىنداعان شاكىرتتەردىڭ قازىرگى ناتيجەلەرى الاڭداۋشىلىق تۋدىرادى. كوپتەگەن پارامەترلەر بويىنشا ءبىرقاتار مەكتەپ-كوللەدج-ينتەرناتتاردىڭ كورسەتكىشتەرى كادىمگى سپورت مەكتەپتەرىنەن تومەن. بۇل جاتتىعۋ پروتسەسىندە، پسيحولوگيالىق دايارلىقتا، وقىتۋ ءادىسناماسىندا ولقىلىقتاردىڭ بار ەكەنىن بىلدىرەدى»، - دەدى مينيستر.
ونىڭ ايتۋىنشا، مەكتەپتەردەگى كادر ماسەلەسىنە ەرەكشە نازار اۋدارۋ قاجەت. مەكتەپ-ينتەرنات-كوللەدجدەردە ۇزدىك جاتتىقتىرۋشىلار مەن ادىسكەرلەر جۇمىس ىستەۋى ءتيىس.
داۋرەن ابايەۆ سونداي-اق مەكتەپ- ينتەرنات-كوللەدجدەرگە وقۋشىلاردى قابىلداۋ كەزىندە باقىلاۋدى كۇشەيتۋدى، جوعارى سىنىپ جانە كوللەدج سپورتشىلارىنىڭ ناتيجەلەرىنە جۇيەلى تالداۋ جاساۋدى، سونداي-اق قارجىلىق جاعداي مەن بىلىكتى مامانداردىڭ بولۋىن ەسكەرە وتىرىپ، سپورت تۇرلەرىن وڭتايلاندىرۋدى قاراستىرۋدى تاپسىردى.