ش ى ۇ مۇشە- مەملەكەتتەرى قاۋىپسىزدىك كەڭەستەرىنىڭ حاتشىلارى كەزدەستى
19 تامىز 18:13

ش ى ۇ مۇشە- مەملەكەتتەرى قاۋىپسىزدىك كەڭەستەرىنىڭ حاتشىلارى كەزدەستى

نۇر- سۇلتان. قازاقپارات – ش ى ۇ مۇشە- مەملەكەتتەرى قاۋىپسىزدىك كەڭەستەرىنىڭ حاتشىلارى كەزدەستى، دەپ حابارلايدى اقوردا.

2022 -جىلعى 19-تامىزدا تاشكەنتتە شانحاي ىنتىماقتاستىق ۇيىمىنا مۇشە مەملەكەتتەردىڭ قاۋىپسىزدىك كەڭەستەرى حاتشىلارىنىڭ ون جەتىنشى كەزدەسۋى ءوتتى، وعان قازاقستان رەسپۋبليكاسى پرەزيدەنتىنىڭ كومەكشىسى - قاۋىپسىزدىك كەڭەسىنىڭ حاتشىسى عيزات نۇرداۋلەتوۆ قاتىستى.

ءىس- شارا بارىسىندا ش ى ۇ كەڭىستىگىندە قاۋىپسىزدىك پەن تۇراقتىلىقتى قامتاماسىز ەتۋ سالاسىنداعى احۋالعا بايلانىستى كوپتەگەن ماسەلەلەر تالقىلاندى.

تاراپتار تەرروريزمگە، سەپاراتيزم مەن ەكسترەميزمگە، قارۋ- جاراق پەن ەسىرتكىنىڭ زاڭسىز اينالىمىنا، ترانسۇلتتىق ۇيىمداسقان قىلمىسقا قارسى ءىس- قيمىل، حالىقارالىق اقپاراتتىق قاۋىپسىزدىكتى قامتاماسىز ەتۋ سياقتى سالالارداعى ىنتىماقتاستىقتى ودان ءارى دامىتۋدىڭ نەگىزگى اسپەكتىلەرى بويىنشا پىكىر الماستى.

كەزدەسۋ بارىسىندا اۋعانستانداعى احۋالدى تەزىرەك رەتتەۋ – ش ى ۇ ايماعىندا بەيبىتشىلىك پەن قاۋىپسىزدىكتى ساقتاۋدىڭ نەگىزگى فاكتورلارىنىڭ ءبىرى ەكەنى اتاپ ءوتىلدى. تاراپتار بۇل ەلدىڭ تاۋەلسىز، ءبىرتۇتاس، دەموكراتيالىق، بەيبىت جانە تەرروريزمنەن، سوعىستان، ەسىرتكىدەن ادا مەملەكەت رەتىندە قالىپتاسۋىن قولدادى.

عيزات نۇرداۋلەتوۆ ارىپتەستەرىنە ش ى ۇ قىزمەتىنىڭ ماڭىزدى باعىتتارى بويىنشا قازاقستاننىڭ ۇستانىمىن جەتكىزدى جانە ەلىمىزدىڭ مۇددەلەرىن ەسكەرە وتىرىپ، ۇيىمنىڭ ودان ءارى ۇيلەسىمدى دامۋى جونىندە ءبىرقاتار ۇسىنىستار ايتتى.

قازاقستان رەسپۋبليكاسى پرەزيدەنتىنىڭ كومەكشىسى - قاۋىپسىزدىك كەڭەسىنىڭ حاتشىسى ب ۇ ۇ ماقۇلداعان ورتالىق ازيا مەن اۋعانستان ءۇشىن ورنىقتى دامۋ ماقساتتارى بويىنشا الماتىدا بۇۇ ورتالىعىن قۇرۋ جونىندەگى قازاقستاننىڭ باستاماسىن بىرلەسكەن قولداۋدىڭ ەرەكشە وزەكتىلىگىن اتاپ ءوتتى.

وتىرىس قورىتىندىسى بويىنشا ءىس- شاراعا قاتىسۋشىلار ءتيىستى حاتتاماعا قول قويدى. ش ى ۇ- عا مۇشە مەملەكەتتەردىڭ قاۋىپسىزدىك كەڭەسى حاتشىلارىنىڭ كەلەسى كەزدەسۋىن ءۇندىستان رەسپۋبليكاسىندا وتكىزۋ جونىندە شەشىم قابىلداندى.

سونىمەن قاتار، كەزدەسۋ بارىسىندا عيزات نۇرداۋلەتوۆ وزبەكستان رەسپۋبليكاسى پرەزيدەنتى جانىنداعى قاۋىپسىزدىك كەڭەسىنىڭ حاتشىسى ۆيكتور ماحمۋدوۆپەن، رەسەي فەدەراتسياسى قاۋىپسىزدىك كەڭەسىنىڭ حاتشىسى نيكولاي پاترۋشيەۆپەن، پاكىستان يسلام رەسپۋبليكاسى ۇلتتىق قاۋىپسىزدىك ءبولىمىنىڭ حاتشىسى اامير حاسانمەن جانە موڭعوليا ۇلتتىق قاۋىپسىزدىك كەڭەسىنىڭ حاتشىسى جادامبىن ەنحبايارمەن كەلىسسوزدەر جۇرگىزدى. وڭىرلىك قاۋىپسىزدىك سالاسىنداعى ءوزارا ءىس- قيمىل مەن ىنتىماقتاستىقتى كەڭەيتۋدىڭ وزەكتى ماسەلەلەرى قاراستىرىلدى.

جاڭالىقتار