ءبىر تامشى قان ءاناليزى ارقىلى اۋرۋدىڭ الدىن الۋعا بولادى
19 تامىز 18:31

ءبىر تامشى قان ءاناليزى ارقىلى اۋرۋدىڭ الدىن الۋعا بولادى

نۇر-سۇلتان.قازاقپارات - عالىم كەز كەلگەن ادامنىڭ يممۋندىق جۇيەسى ارقىلى اعزاسى اۋرۋعا قانشالىقتى قاۋقارلى ەكەنىن انىقتاپ بەرەتىنىن ايتادى.

قان تالداۋلارىنىڭ قورىتىندىسىمەن ادام اعزاسىنداعى سوزىلمالى اۋرۋدى انىقتايدى. ارنايى، وتە كۇردەلى وڭدەۋ ارقىلى بەلگىلى ءبىر ادامنىڭ يممۋندىق جۇيەسى جايلى اقپارات الىنىپ، قورىتىندى شىعارىلادى. ءارى بويىندا قانداي جاسىرىن ينفەكسيا بارىن ايقىنداپ بەرەدى.

نۇرلىبەك ۇدەربايەۆ، دارىگەر- حيرۋرگ:

- ادامنىڭ اعزاسىن اۋرۋعا قاۋقارلى ەتەرلىك ەم- دوم جاساۋعا مۇمكىندىگىمىز بار. بىزدە ادەتتە قاتەرلى ىسىكتىڭ سوڭعى ساتىسىنداعى ناۋقاستار كەلىپ ەمدەلەدى. جاپونيا، وڭتۇستىك كورەيا، يزرايل، گەرمانيادا قوماقتى قاراجاتقا قارالسا دە، بىزگە كەلەتىندەر بار. سولاردىڭ كەيبىرىن ەمدەپ الىپ جاتىرمىز. ادام اعزاسىندا بەلگىلى ءبىر قور بولسا، ونى جەتىلدىرىپ، اعزانى قورعاي الاتىنداي دارەجەگە جەتكىزۋگە بولادى.

جۇيە اۆتورلارى ونكولوگيالىق ناۋقاستاردىڭ جاي- كۇيىن زەرتتەي كەلە ادامنىڭ يممۋندىق جۇيەسىنىڭ جاعدايىن انىقتاۋدى ۇيرەنگەندەرىن ايتادى. عالىم بۇل جۇيەنى پاتەنتتەپ، اۆتورلىق قۇقىقتى دا العان. ءتىپتى وسى ارقىلى ادامنىڭ بيولوگيالىق پورترەتىن جاساپ، ءوز دەنەسىنىڭ تولىق ەسەبىن بىلە الاتىن ارنايى سايت تا اشىپ قويعان.

عالىمنىڭ ارىپتەستەرى يننوۆاتسيالىق جۇيەنىڭ ابدەن جەتىلگەنىن ايتادى. ازىرگە تەك ەلوردادا ءبىر عانا كلينيكادا جۇمىس ىستەپ تۇر. ال، ونى ەلىمىزدىڭ تۇكپىر- تۇكپىرىندەگى اۋرۋحانالارىنا ەنگىزۋ ءۇشىن قوماقتى قاراجات قاجەت. الايدا ۇكىمەتتەن قولداۋ بولماپتى.

يگور پانوماريەۆ، ونكولوگ دارىگەر:

- قازىر ءبىز سول جۇيەنى ودان ارى جەتىلدىرىپ، تولىققاندى ىسكە قوستىق. ونىڭ يگىلىگىن بۇكىل قازاقستاندىق كورسە دەيمىز. سول ارقىلى پاتولوگيالىق كەمشىلىكتەرى بولسا الدىن الا ەم الا الادى. بۇل كۇردەلى ونكولوگيا نەمەسە ينفاركتقا اينالىپ كەتپەس ءۇشىن تاپتىرماس ەمدىك جۇيە.

ءشاربات بالمانوۆا عالىمنىڭ تىڭ جۇيەسىمەن ەمدەلۋ ءۇشىن اقتوبەدەن ارنايى كەلىپتى. دەرتى - ءسۇت بەزى وبىرىنىڭ ەكىنشى ساتىسى. حيميالىق تەراپيادان كەيىن السىرەپ قالعانىن ايتادى. ال، بۇل ورتالىققا كەلگەلى جاعدايى ەداۋىر جاقسارعان. قاتەرلى دەرتتى جەڭەتىنىنە سەنىمدى.

ءشاربات بالمانوۆا، اقتوبە قالاسىنىڭ تۇرعىنى:

- وسى كىسىگە كەلىپ ەم الىپ جاتىرمىن. اقتوبەدەن قانداي بولىپ كەلىپ ەم. ەكى اپتا بولدى ەم الىپ جاتىرمىن. وتە جاقسى. بۇل كىسى ەندى الاتىن حيميامىز جەڭىل بولادى دەپ دايىنداپ جاتىر.

بۇل بىرەگەي تەحنولوگيانى قازاقستاننىڭ بۇكىل ايماعىنا تاراتۋعا بولادى دەيدى عالىم. تەك ۇكىمەتتەن قولداۋ بولسا دەيدى. ءتىپتى، ساناۋلى كۇننىڭ ىشىندە 18 ميلليون ادامنىڭ يممۋندىق جۇيەسىن انىقتاپ الۋعا بولاتىنىن ايتادى.


www.24.kz

جاڭالىقتار