مەكتەپتە جاس مۇعالىمدەردى قولداۋدىڭ جاڭا فورماتى ەنگىزىلمەك
بۇل تۋرالى پەداگوگتەردىڭ رەسپۋبليكالىق تامىز كونفەرەنسياسىندا وقۋ- اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«الداعى ۋاقىتتا ماماندىعى بويىنشا جۇمىس باستايتىندارعا ارنالعان جاڭا جوبا ىسكە قوسىلادى. ياعني، مەكتەپكە جاڭادان كەلگەن ارىپتەستەرىمىز ءۇشىن جىل بويى ماماندىقتى مەڭگەرۋ باعىتىندا جەكە باعدارلاما بولادى. ولاردىڭ ءارقايسىسىنا جەتەكشىسى بەكىتىلەدى. وسى ورايدا وقۋ جىلى بارىسىندا جاس مامانعا قولداۋ كورسەتىلەدى. جىل قورىتىندىسى بويىنشا ارى قاراي جۇرگىزىلەتىن جۇمىس جايىندا شەشىم قابىلدايمىز. ياعني، جاس مامان جۇكتەلەتىن قىزمەتتى تولىقتاي ورىنداۋى ءۇشىن ءتيىستى كومەك كورسەتىلەدى»، - دەدى ا. ايماعامبەتوۆ.
ونىڭ ايتۋىنشا، وسى باعىتتا شەتەل تاجىريبەسى نازارعا الىناتىن بولادى.
«شەتەلدە جاس مامان كەلسە، وعان ساباقتار بويىنشا تولىق جۇكتەمە بەرىلمەيدى. ونىڭ بىلىكتىلىگىن ارتتىرۋعا كوبىرەك ءمان بەرىلەدى جانە جاس مامان وقۋ ورنىنداعى ارىپتەستەرىنىڭ ساباعىنا قاتىسادى. دەگەنمەن، وسى جاس مۇعالىمگە تولىق جالاقى تولەنەدى. الداعى جىلدان باستاپ وسى تەكتەس جۇيەنى ەلىمىزدە ەنگىزبەكپىز ، - دەدى ۆەدومستۆو باسشىسى.
بۇدان بۇرىن حابارلانعانداي، قازاقستاندا وقۋ ۇلگەرىمى تومەن وقۋشىلار ءۇشىن ارنايى جوبا ىسكە قوسىلادى.