مەكتەپ ديرەكتورلارىنىڭ جالاقىسىن كوتەرۋ ماسەلەسى شەشىلەدى - مينيستر

None
نۇر- سۇلتان. قازاقپارات - مەكتەپ پەن كوللەدجدەردە ديرەكتورلاردىڭ تاپشىلىعى بايقالىپ وتىر.

بۇل تۋرالى پەداگوگتەردىڭ رەسپۋبليكالىق تامىز كونفەرەنسياسىندا وقۋ- اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.

«مەكتەپ پەن كوللەدجگە، بالاباقشالارعا كەرەك بىلىكتى ديرەكتورلاردىڭ تاپشىلىعى بايقالىپ وتىر. قازىرگى كەزدە ءبىراز بوس ورىن تولتىرىلماي تۇر. ارينە، ءمۇعالىمنىڭ ەڭبەگى مەن بىلىكتىلىگى وتە ماڭىزدى. ءبىراق بارلىق ماسەلەنى شەشكەنىمەن، بىلىكتى ءارى ءبىلىمدى ديرەكتور بولماسا، وندا باسقا جاسالىپ جاتقان جۇمىستار ءتيىستى ناتيجەسىن بەرمەيتىنى انىق. ديرەكتورلاردىڭ جالاقىسى مۇعالىمدەرمەن سالىستىرعاندا از ەكەنى بەلگىلى»، - دەدى ا. ايماعامبەتوۆ.

وسى ورايدا مينيستر ديرەكتورلارعا ۇلكەن جاۋاپكەرشىلىك جۇكتەلەتىنىن ەسكە سالدى.

«ولارعا ءتۇرلى ايىپپۇلدار سالىپ كەتەدى. اتا- انالارمەن جانە مۇعالىمدەرمەن جۇمىس ىستەۋ كەرەك. الايدا ديرەكتورلاردىڭ الاتىن جالاقىسى وتە تومەن. سوندىقتان وسى باعىتتا جاڭا وقۋ جىلىندا بۇل ماسەلەنى شەشۋ تۇرعىسىندا ءتيىستى جۇمىستاردى اتقارامىز»، - دەدى ۆەدومستۆو باسشىسى.

روتاتسيا تەتىگى ارى قاراي جالعاساتىنىنا توقتالعان ا. ايماعامبەتوۆ: «قازىر 400 دەن استام ديرەكتور جاڭا وقۋ ورىندارىنا بارىپ، جۇمىسىن جالعاستىرىپ جاتىر. وسى ارىپتەستەرىمىزگە ۇلكەن العىسىمدى ايتقىم كەلەدى»، - دەدى.

بۇدان بۇرىن حابارلانعانداي، قازاقستاندا وقۋ ۇلگەرىمى تومەن وقۋشىلار ءۇشىن ارنايى جوبا ىسكە قوسىلادى.

سوڭعى جاڭالىقتار