قانداس مارتەبەسىن العاندارعا ۇكىمەتتەن قانداي قولداۋ بار

نۇر- سۇلتان. قازاقپارات - قازاقستان ۇكىمەتى ەتنيكالىق قازاقتاردى رەپاترياتسيالاۋ سالاسىندا بەلسەندى مەملەكەتتىك قولداۋ جۇرگىزەدى.

قونىس اۋدارۋعا جانە تۇرعىن ءۇيدى جالداۋ جونىندەگى شىعىستاردى جابۋعا ارنالعان سۋبسيديالارمەن قاتار، قانداستارعا جۇمىسپەن قامتۋعا جاردەمدەسۋ شارالارى جانە باسقا دا جەڭىلدىكتەر بەرىلەدى، دەپ حابارلايدى قازاقپارات ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.

قانداس مارتەبەسىن الۋعا نەمەسە ۇزارتۋعا، سونداي- اق قانداستار مەن قونىس اۋدارۋشىلاردى قابىلداۋدىڭ وڭىرلىك كۆوتاسىنا ەنگىزۋگە ءوتىنىشتى ەتنيكالىق قازاقتار جەرگىلىكتى اتقارۋشى ورگاندارعا، «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق- عا جانە قازاقستان رەسپۋبليكاسىنىڭ شەت ەلدەردەگى مەكەمەلەرىنە بەرە الادى.

قانداستار مەن قونىس اۋدارۋشىلاردى قابىلداۋدىڭ وڭىرلىك كۆوتاسى ق ر ۇكىمەتى قانداستاردى قونىستاندىرۋ ءۇشىن ايقىنداعان وڭىرلەرگە - اقمولا، اتىراۋ، شىعىس قازاقستان، باتىس قازاقستان، قوستاناي، پاۆلودار جانە سولتۇستىك قازاقستان وبلىستارىنا بولىنەدى.

بۇل رەتتە وڭىرلىك كۆوتاعا ەنگىزىلگەن قانداستارعا كوشۋگە (وتباسىنىڭ ءاربىر مۇشەسىنە 70 ا ە ك- تەن ءبىرجولعى تولەم) جانە 12 اي ىشىندە جالداۋ شىعىستارىن جابۋ مەن كوممۋنالدىق قىزمەتتەردى تولەۋگە (وتباسىنا 15 تەن 30 ا ە ك- كە دەيىنگى مولشەردە) سۋبسيديا تۇرىندە مەملەكەتتىك قولداۋ شارالارى قاراستىرىلعان.

سونىمەن قاتار، قانداس مارتەبەسىن العان ەتنيكالىق قازاققا كەلەسى قىزمەتتەر كورسەتىلەدى:

- ق ر اۋماعىنا كىرۋ كەزىندە كولىك قۇرالدارىن قوسا العاندا، جەكە پايدالانۋعا ارنالعان مۇلىككە كەدەندىك تولەمدەردى تولەۋدەن بوساتۋ؛

- قانداستاردى بەيىمدەۋ جانە ىقپالداستىرۋ ورتالىقتارىندا تەگىن بەيىمدەۋ جانە ىقپالداستىرۋ قىزمەتتەرىن قامتاماسىز ەتۋ؛

- تەحنيكالىق جانە كاسىپتىك، ورتا بىلىمنەن كەيىنگى جانە جوعارى ءبىلىم بەرەتىن وقۋ ۇيىمدارىنا وقۋعا تۇسۋگە كۆوتا شەڭبەرىندە ءبىلىم الۋ (قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامدار ءۇشىن كۆوتا %4مولشەرىندە بەلگىلەنگەن) ؛

- قازاقستان ازاماتتارىمەن تەڭ جاعدايدا جۇمىسپەن قامتۋعا جاردەمدەسۋ شارالارىمەن قامتاماسىز ەتۋ؛

- مەملەكەتتىك تۇرعىن ءۇي قورىنان تۇرعىن ءۇي الۋعا ءوتىنىش بەرۋ مۇمكىندىگى.

بۇدان باسقا ەلدە تۇراقتى تۇراتىن قانداستار جەڭىلدەتىلگەن تارتىپپەن (تىركەۋ تارتىبىمەن) قازاقستان رەسپۋبليكاسىنىڭ ازاماتتىعىن الا الادى.

ايتا كەتسەك، بيىلعى 1-تامىزداعى جاعداي بويىنشا 9077 ەتنيكالىق قازاق تاريحي وتانىنا ورالىپ، قانداس مارتەبەسىن الدى. 1991 -جىلدان باستاپ رەسپۋبليكاعا بارلىعى 1 ميلليون 96,9 مىڭ ەتنيكالىق قازاق ورالدى.

وسى جىلدىڭ باسىنان باستاپ قازاقستانعا كەلگەن قانداستاردىڭ جارتىسىنان استامى %69,9 وزبەكستاننان، %10,3 ق ح ر- دان، %7,1 تۇرىكمەنستاننان، %4,0 موڭعوليادان جانە %8,7 باسقا ەلدەردەن كەلگەن.