اقتوبەدە ءىرى قارادان ۆيرۋستى ديارەيا انىقتالدى

اقتوبە. قازاقپارات - اقتوبەدە ءىرى قارادان ۆيرۋستى ديارەيا انىقتالىپ، قازىر اۋىلعا شەكتەۋ شاراسى ەنگىزىلىپ جاتىر، دەپ حابارلايدى قازاقپارات ءتىلشىسى.

اقتوبە وبلىسى قوبدا اۋدانى سۇگالى اۋىلدىق وكرۋگىنە قاراستى كوپۇي اۋىلىندا مالدان اۋرۋ شىقتى. ماسەلەمەن ۆەتەرينار دارىگەرلەر اينالىسىپ جاتىر.

«ءبىر مال ءولدى. سىناماسى وبلىستىق ۆەتەريناريا زەرتحاناسىنا تاپسىرىلىپ، ۆيرۋستى ديارەيا دەگەن دياگنوز قويىلدى. ينفەكسيالىق اۋرۋ. قىزۋى كوتەرىلەدى، اسقازانى اۋىرىپ، ءىشى وتەدى. كەيىن ولەدى. بۇگىنگى كۇنى ۆەتەرينار دارىگەردىڭ باستاماسىمەن شەكتەۋ قويىلدى. مال قوزعالىسى توقتايدى. اكىم شەشىمى كۇشىنە ەنگەننەن كەيىن رەسپۋبليكالىق جۇمىس توبى قىزمەت ەتەدى. زالالسىزداندىرۋ، ۆاكسينا سالدىرۋ جۇمىسى جۇرەدى. ينفەكسيالىق اۋرۋ بولعان سوڭ تارالۋ قاۋپى بار. شەكتەۋ ەنگىزىلگەن سوڭ توقتايدى دەپ ويلايمىز»، - دەدى اقتوبە وبلىستىق ۆەتەريناريا باسقارماسى باسشىسىنىڭ ورىنباسارى يسا بازاروۆ.

بۇل اۋىلدا 1400 ءىرى قارا بار. وبلىستىق ۆەتەريناريا باسقارماسى باسشىسى ورىنباسارىنىڭ ايتۋىنشا، ۆيرۋستى ديارەيا وڭىردە العاش رەت تىركەلىپ تۇر.

ەسكە سالساق، بىلتىر بەستاماق اۋىلدىق وكرۋگىنىڭ بەسقوسپا اۋىلىندا 6 ءىرى قارا مالدان بەلگىسىز اۋرۋ انىقتالدى. ارىز- شاعىمعا بايلانىستى اۋداندىق ۆەتەريناريا ماماندارى سىناما الىپ، نۇر- سۇلتان قالاسىنداعى زەرتحاناعا جىبەردى. رەنوتراحەيت اۋرۋى ناقتىلاندى. رەسپۋبليكالىق ەپيزوتيا جاساعىنىڭ ماماندارى شەكتەۋ قويىلعان ايماقتا ەكپە جانە دەزينفەكتسيا شاراسىن جۇرگىزدى.