قوعامدىق ورىنداعى ۋرناعا تۇكىرۋ زاڭدى ما

نۇر-سۇلتان. قازاقپارات - نۇر- سۇلتان قالاسى پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ باستىعى ارمان ايتماعامەتوۆ ب ا ق وكىلدەرىنە قوعامدىق ورىندا تۇكىرۋ ماسەلەسى زاڭمەن قالاي رەتتەلگەنىن ءتۇسىندىردى، دەپ حابارلايدى قازاقپارات ءتىلشىسى.

«17-قىركۇيەكتە قالالىق ءماسليحات دەپۋتاتتارى قوعامدىق ورىندا تۇكىرگەنى ءۇشىن قولدانىلاتىن اكىمشىلىك جاۋاپكەرشىلىكتى كۇشەيتۋ تۋرالى ماسەلە كوتەرگەن بولاتىن. ونىڭ ىشىندە كولىكتە كەتىپ بارا جاتىپ تۇكىرۋشىلەرگە دە شارانى كۇشەيتۋ ۇسىنىلعان. قوعامدىق ءتارتىپتى بۇزۋدىڭ اتالعان ءتۇرى ءۇشىن ق ر اكىمشىلىك قۇقىق بۇزۋ تۋرالى كودەكستىڭ 434-بابىنىڭ 2-قوسىمشاسى بويىنشا 5 ايلىق ەسەپتىك كورسەتكىش (15900 تەڭگە - رەد.) ايىپپۇل كوزدەلگەن. اتالعان ارەكەت قايتالانسا، ايىپپۇل ەكى ەسە ارتادى، ياعني 31800 تەڭگە ارقالايدى. حابارلاما العاننان كەيىن 7 كۇننىڭ ىشىندە ايىپپۇل تولەنسە، سوماسى 50 پايىز قىسقارادى. بۇل باپ اكىمشىلىك قۇقىق بۇزۋ تۋرالى كودەكسكە 2019 -جىلدىڭ اياعىندا ەنگىزىلگەن بولاتىن. الايدا، قوعامدىق ورىندا تۇكىرگەنى ءۇشىن جازا قولدانۋ تاجىريبەسى وعان دەيىن دە بولعان»، - دەدى دەپارتامەنت وكىلى.

سونداي-اق، قوعامدىق ورىندا تەك ۋرناعا تۇكىرۋگە بولاتىنىن ەسكە سالدى.

«قوعامدىق ورىندارداعى ۋرنالار وسىنداي ساتتەر ءۇشىن ارنالعان. ۋرناعا تۇكىرۋ - ءتارتىپ بۇزۋ بولىپ سانالمايدى.

«ۋرناعا تۇكىرگەن ەدىم، قيىس كەتىپ قالدى» دەپ اقتالاتىندار بولۋى مۇمكىن. زاڭدا «نولدىك توزبەۋشىلىك» دەگەن ۇعىم بار. «قيىس كەتتى»، « ءدال ءتۇستى» دەپ ءسوزبۇيداعا سالۋ - قۇقىققا تومپاق. سوندىقتان، ۋرنادان تىس تۇكىرۋدىڭ ءبارى زاڭدى بۇزۋ بولىپ ەسەپتەلەدى. سايكەسىنشە ايىپپۇل سالىنادى»، - دەپ جاۋاپ بەردى باسقارما باستىعى.

ب ا ق وكىلدەرى قوعامدىق ورىندا جۇرەگى اينىپ، قۇسۋعا ءماجبۇر بولعان ادامدار جاقىننان ۋرنا تابىلماسا نە ىستەيتىنىن سۇرادى.

«جۇرەك اينىپ قۇسۋ، تۇكىرۋ ەمەس قوي. ادام قاساقانا قۇسپايدى. سوندىقتان، ادام فاكتورىن، ونداي جايتتاردى سول كەزدە قاراستىرامىز. جەكەلەگەن جاعدايلار بار ەكەنىن تۇسىنەمىز. ءبىراق، ونداي جاعدايدىڭ وزىندە اركىم ءوزى بىلعاعان جەردى تازالاپ كەتىپ وتىرۋى كەرەك»، - دەدى ارمان ايتماعامەتوۆ.