ەرالى توعجانوۆ وقۋ- اعارتۋ سالاسىنىڭ باستى مىندەتىن اتادى
بۇل تۋرالى پرەمەر- ءمينيستردىڭ ورىنباسارى ەرالى توعجانوۆ ءمالىم ەتتى، دەپ حابارلايدى قازاقپارات ءتىلشىسى.
«بۇگىندە مەملەكەت باسشىسىنىڭ «جاڭا قازاقستاندى» قۇرۋ يدەياسىن ىسكە اسىرۋ مىندەتتەرى ءبىلىم بەرۋ جۇيەسىنىڭ ماڭىزدىلىعىن ەرەكشە ارتتىرادى. سوعان وراي جاڭا تالاپتار جۇكتەلدىپ وتىر. ەلىمىزدە 6,7 ميلليوننان استام بالا بار، بۇل - قازاقستان حالقىنىڭ 35 پايىزى. ءبىز مەملەكەتىمىزدىڭ ءوسىپ، وركەندەۋىنىڭ تىرەگى بولاتىن وسى جاس ۇرپاقتىڭ جان- جاقتى دامۋىنا بارلىق جاعدايدى جاساۋعا ءتيىسپىز. «جاڭا قازاقستاندى» قۇرۋ - ەڭ الدىمەن بىلىمگە قۇشتار، ەڭبەككە ادال، قوعامعا جاۋاپتى ازاماتتاردى قالىپتاستىرۋ، وسى ارقىلى قوعامدىق قۇندىلىقتاردى دا جاڭارتۋ. «جاڭا قازاقستاننىڭ» ازاماتتارىن قالىپتاستىرۋ بالاباقشا، مەكتەپ قابىرعاسىنان باستالۋى ءتيىس. بۇل - وقۋ- اعارتۋ سالاسىنىڭ باستى مىندەتى»، - دەدى ە. توعجانوۆ پەداگوگتەردىڭ رەسپۋبليكالىق تامىز كونفەرەنسياسى.
وسى ورايدا ول مەملەكەت باسشىسى ءبىلىم بەرۋ سالاسىنداعى ۇيلەستىرۋدى كۇشەيتۋ ماقساتىندا وقۋ- اعارتۋ مينيسترلىگىن قۇرعانىن ەسكە سالدى.
«جاڭا وقۋ جىلىنان باستاپ مينيسترلىك، وبلىستىق ءبىلىم باسقارمالارى وقۋ اعارتۋ سالاسىنىڭ، ۇستازداردىڭ بارلىق پوتەنتسيالىن الدىمىزعا قويىلعان مىندەتتەردى ىسكە اسىرۋعا جۇمىلدىرۋى ءتيىس. بىرىنشىدەن، ءبىلىم بەرۋ ۇيىمدارىندا تاربيە جۇمىستارىن ۇىمداستىرۋ. تاربيە جۇمىستارى ءبىلىم بەرۋ پروتسەسىنىڭ نەگىزى كومپونەنتى. تاربيە ءىسىن قامتىماعان ءبىلىم - وقۋشىنىڭ رۋحاني دامۋىن قامتاماسىز ەتپەيدى، قاجەتتى ادامدىق قۇندىلىقتاردى قالىپتاستىرمايدى. سوندىقتان وقۋشىلاردى تاربيەلەۋ ءاربىر ءبىلىم بەرۋ ۇيىمدارى مەن مۇعالىمنىڭ باستى جۇمىسى بولۋى كەرەك. بۇل ءىس- شارالار وتكىزۋ عانا ەمەس، كۇندەلىكتى وقۋ پروتسەسىنىڭ نەگىزىندە جۇرگىزىلەتىن جۇيەلى جۇمىس. وسى جۇمىستىڭ وزەگى، ەڭ الدىمەن، ءبىزدىڭ سالت- داستۇرلەرىمىز، رۋحاني قۇندىلىقتارىمىز بولۋى ءتيىس. تۇپتەپ كەلگەندە بالاباقشا، مەكتەپ قابىرعاسىنداعى بەرىلگەن تاربيە ەلىمىزدىڭ بولاشاعىنا تىكەلەي اسەر ەتەدى»، - دەدى ۇكىمەت باسشىسىنىڭ ورىنباسارى.
« ءبىز ءبارىمىز بۇعان مۇددەلىمىز، وتباسى دا، جالپى قوعام دا. وسى ماقساتتا بيىلدان باستاپ مەكتەپ پەن اتا- انانىڭ تاربيە پروتسەسىندەگى ءوزارا جاۋاپكەرشىلىگىنە ارنالعان «وقۋشى - مەكتەپ - اتا-انا» بىرلەسكەن جۇمىس فورماتى ەنگىزىلدى. بۇل اتا- انالار قاۋىمداستىعىن مەكتەپتەگى تاربيە ىسىنە كوپتەپ تارتۋعا باعىتتالعان (اتا- انالار كونسيليۋمى). وسى جۇمىستاردى جالعاستىرۋ ماڭىزدى»، - دەدى ە. توعجانوۆ.