ناۋقاس بالانىڭ «ەمىنە» اقشا جينايتىن الاياقتار كوبەيىپ كەتتى

نۇر-سۇلتان. قازاقپارات – ەلوردادا بالاسىن قىدىرتىپ جۇرگەن انا قايىرىمدىلىق كورسەتۋدى سۇراعان جاس ءوسپىرىمنىڭ قولىنان ءوز بالاسىنىڭ سۋرەتىن كورگەن.

بۇعان دەيىن انەل جۇمابايەۆا بالاسىنىڭ ەمىنە قاراجات سۇراپ، كەيىن ەسەپ-شوتىن جاپقان. ال الاياقتار سونداعى سۋرەتتى پايدالانىپ، اقشا جيناۋعا كىرىسكەن. ءيا، وسىلاي ەلدى الداپ جۇرگەندەر كوپ. ادەتتە ولار وزدەرىن قايىرىمدىلىق قورىنىڭ وكىلىمىن دەپ تانىستىرادى. ەندى ولار شىن جاناشىر ما، الدە الاياق پا؟ ونى قايدان بىلەمىز؟ انەل جۇمابايەۆانىڭ ءبىر جاستان اسقان قىزى بار. وكىنىشكە قاراي، ءسابيدىڭ دامۋى باياۋ ءجۇرىپ جاتىر. ەم-دومىنا قاجەتتى قاراجات جيناۋ ءۇشىن بيىل ءساۋىر ايىندا بانك كارتوچكاسى ارقىلى ەسەپشوت اشقان. الايدا كومەگىن ۇسىناتىن جالعان قايىرىمدىلىق قور وكىلدەرى كوبەيگەن سوڭ، ەسەپشوتتى جاۋىپ تاستاۋعا ءماجبۇر بولعان. اككىلەر انەلگە قايتا-قايتا قوڭىراۋ شالىپ مازاسىن العان. قولى اشىق جانداردىڭ ايانىش سەزىمىن تۋدىرىپ، وزدەرىنىڭ قالتاسىن قامپايتقىسى كەلگەن.

«سوراقىسى سول، ساياباقتا وتباسىممەن بىرگە سەرۋەندەپ جۇرگەنىمدە جانىما بەيتانىس بوزبالا كەلىپ، ناۋقاس بالانىڭ ەمىنە اقشا جيناپ جاتقانىن ايتتى. فوتوسۋرەتتەن ءوز قىزىمدى كورىپ، جاعامدى ۇستادىم. باستاپقىدا سىر بىلدىرمەي، اقشانىڭ كىمگە تۇسەتىنىن سۇرادىم. انىقتالعانداي، ماعان بىرنەشە مارتە قوڭىراۋ شالىپ، قايىرىمدىلىق قور اتىنا ەسەپشوت اشۋ تۋرالى ۇگىتتەگەن جىگىتتىڭ نومەرى شىقتى. ول مەنىڭ رۇقساتىمسىز، بالامنىڭ فوتوسۋرەتىن ءوز پايداسىنا قولدانعان»، دەيدى قالا تۇرعىنى انەل جۇمابايەۆا.

بۇل قىلمىس بويىنشا كەلىنشەك پوليتسياعا ارىزدانعان. ءبىراق بۇل ىسكە جەتكىلىكتى دەڭگەيدە ماڭىز بەرمەپتى. الاياقتىق ەمەس، جاي اكىمشىلىك قۇقىق بۇزۋشىلىق دەپ جىلى جاۋىپتى.

«الگى جىگىتتىڭ بۇل ءىسى بارىپ تۇرعان الاياقتىق. بىرىنشىدەن قىزىمنىڭ فوتوسۋرەتىن زاڭسىز پايدالاندى. ارباۋدان تۇسكەن اقشانى قالتاسىنا باستى. وسىنىڭ ءبارىن پوليتسيا قىزمەتكەرلەرىنە ايتقاندا، ولار بۇنى قوعامدىق ورىندا مازانۋ الۋ دەگەن قۇقىق بۇزۋشىلىققا بالادى. ناقتىراق ايتسام، ق ر اكىمشىلىك قۇقىق بۇزۋشىلىق تۋرالى كودەكستىڭ 449-بابى»، دەيدى قالا تۇرعىنى انەل جۇمابايەۆا.

سەنىم ۇيالاتپايتىن قايىرىمدىلىق قورلاردىڭ بىرىنە ۆولونتەر بولىپ كوردىك. تابىسى كوپ جۇمىس ەكەن.

«ءبىز رەسمي قورعا جاتامىز. باس كەڭسەمىز قاراعاندى قالاسىندا اشىلدى. جۇمىس ىستەگەنىمىزگە ءبىر جىل. قىزمەتىمىز زاڭسىز بولعاندا باياعىدا-اق جاۋىپ تاستار ەدى. العاشىندا 4 ساعات ىشىندە 3 مىڭ ت گ تابۋىڭىزعا بولادى. كانىگى قىزمەتكەرلەرىمىز كۇنىنە 11 مىڭ تەڭگەگە دەيىن جالاقى الادى»، دەيدى قايىرىمدىلىق قور وكىلى.

جالعان قايىرىمدىلىقپەن اينالىسۋ ۇساق قىلمىسقا جاتپايدى. بۇل الاياقتىققا نەگىزدەلگەن ءارى ۇيىمداسقان قىلمىس. بۇل تەك ەلوردادا عانا ەمەس، بۇكىل ەل بويىنشا ەتەك جايدى. زاڭدى قاتايتىپ، جەتىلدىرۋ كەرەك دەيدى زاڭگەر.

«كورىنگەن كارتوچكا نومەرىنە اقشا اۋدارا بەرۋگە بولمايدى. كەز كەلگەن زاڭدى قايىرىمدىلىق قوردىڭ رەسمي كاسساسى بولۋى كەرەك. نەمەسە كوز جەتكىزىپ، كومەككە مۇقتاج جاننىڭ جەكە نومەرىنە اۋدارعان دۇرىس. ورتاداعى دەلدالدارعا سەنبەۋ كەرەك»، دەيدى زاڭگەر سەرگەي ۋتكين. بۇل ماسەلە تاياۋدا ماجىلىستە دە قارالدى. دەپۋتاتتار قايىرىمدىلىق تۋرالى زاڭ قابىلدادى. قۇجاتقا سايكەس، ارنايى كەلىسىم-شارتسىز الەۋمەتتىك جەلى ارقىلى اقشا جيناۋعا بولمايدى. ونسىز بۇل ارەكەت الاياقتىققا نەمەسە اقشا جىمقىرۋعا جاتادى. جاڭا زاڭ 5-قىركۇيەكتە كۇشىنە ەنەدى.

«حابار 24»