اقتوبەدە موتوسيكل رۋلىنە يە بولا الماعان جاس ءوسپىرىم كوز جۇمدى

اقتوبە. قازاقپارات - اقتوبەدە جاس ءوسپىرىم موتوسيكل رۋلىنە يە بولا الماي، اۋدارىلىپ قالدى. سالدارىنان ول وقيعا ورنىندا كوز جۇمدى، دەپ حابارلايدى قازاقپارات ءتىلشىسى.

اقتوبە وبلىستىق پوليتسيا دەپارتامەنتى تاعى دا ەسكەرتۋ جاسادى. جول- كولىك وقيعاسىن بولدىرماۋ ءۇشىن ەرەجەنى قاتاڭ ساقتاۋ كەرەك.

«كامەلەت جاسقا تولماعان اقتوبەلىك مەملەكەتتىك تىركەۋ ءنومىرى جوق «LT-200» موتوسيكلىمەن حرومتاۋ اۋدانىنىڭ تاسوتكەل اۋىلى باعىتىندا كەلە جاتىپ، رۋلدى باسقارا الماي قالدى. ول وڭ جاققا اۋدارىلىپ كەتكەن. تەكسەرۋ كەزىندە قاجەتتى جۇرگىزۋشى كۋالىگى بولماعانى انىقتالدى. جول-كولىك وقيعاسى سالدارىنان جاس ءوسپىرىم العان جاراقاتىنان وقيعا ورنىندا كوز جۇمدى. قىلمىستىق كودەكستىڭ «كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋى» بابى بويىنشا سوتقا دەيىنگى تەرگەۋ باستالدى»، - دەدى وبلىستىق پ د باسپا ءسوز قىزمەتى.

ەسكە سالساق، اقتوبەدە جول- كولىك وقيعاسى جيىلەپ كەتتى. سامارا- شىمكەنت تاسجولىندا 6 ادام كوز جۇمدى .

ال اقتوبە- اتىراۋ تاسجولىندا ءتورت ادام مەرت بولدى. تەمىر قالاسىنان كەڭقياق اۋىلى باعىتىندا كەلە جاتقان ۆاز-2113 اۆتوكولىگىنىڭ 26 جاستاعى جۇرگىزۋشىسى قارسى قوزعالىسقا ارنالعان جولاققا شىعىپ كەتىپ، مۇعالجار اۋدانىنىڭ 50 جاستاعى تۇرعىنىنىڭ باسقارۋىنداعى كاماز كولىگىمەن سوقتىعىسقان. جول- كولىك وقيعاسى سالدارىنان ۆاز-2113 اۆتوكولىگىنىڭ جۇرگىزۋشىسى مەن ءۇش جولاۋشىسى العان جاراقاتتارىنان وقيعا ورنىندا كوز جۇمدى . كوپ ۇزاماي وسى اۋداننىڭ اكەلى- بالالى تۇرعىنى جول اپاتىندا مەرت بولدى .

گازەل اۆتوكولىگىنىڭ جۇرگىزۋشىسى اقتوبە قالاسى باعىتىنداعى جولدا قارسى جولاققا شىعىپ كەتىپ، تەمىر اۋدانىنا بارا جاتقان «Toyota Camry» اۆتوكولىگىمەن سوقتىعىسقان.

اۆتور التىناي ساعىندىقوۆا