قازاقستاندىق ساربازدار حالىقارالىق ارميا ويىندارىندا تاعى دا جەڭىسكە جەتتى

None
None
نۇر-سۇلتان. قازاقپارات - قازاقستاندىق اسكەري توپوگرافتار، ارتيللەريستەر مەن مەرگەندەر حالىقارالىق ارميا ويىندارىندا توپ جاردى، دەپ حابارلايدى قازاقپارات.

ق ر قورعانىس مينيسترلىگى باسپا ءسوز قىزمەتىنىڭ حابارلاۋىنشا، قازاقستاندىق جاۋىنگەرلەر حالىقارالىق ارميا ويىندارى ءوتىپ جاتقان پوليگوندارىندا وزدەرىنىڭ كاسىبي شەبەرلىگىن كورسەتىپ، سايىستار ءارى قاراي قىزىقتى وربۋدە.

اقمولا وبلىسىنىڭ شۋچينسك قالاسىنداعى «اماندىق» پوليگونىندا «مەريديان» سايىسىنا قاتىسۋشىلار ەكىنشى «ازيمۋت» كەزەڭىنىڭ جاتتىعۋىن ورىندادى. اۋدانى 12 شارشى شاقىرىم اۋداننىڭ ورتاشا قيىلىسقان جەرى بويىنشا قوزعالا وتىرىپ، سەگىز ەلدىڭ اسكەري توپوگرافتارى بەرىلگەن باعىتتار مەن تاكتيكالىق تاپسىرمادا كورسەتىلگەن باقىلاۋ نۇكتەلەرى بويىنشا ءوتتى.


توپوگەودەزيالىق ەسەپتوپتاردىڭ سايىسىندا 41 مينۋت 53 سەكۋندتا جەڭىسكە جەتكەن قازاقستان كومانداسى بولدى. سايىستى ەكىنشى بولىپ قىتاي اسكەري قىزمەتشىلەرى - 46 مينۋت 36 سەكۋند، ءۇشىنشى - بەلارۋس 49 مينۋت 26 سەكۋند ۋاقىت كورسەتكىشىمەن اياقتادى.

قاراعاندى وبلىسىنىڭ «سپاسسك» وقۋ- جاتتىعۋ پوليگونىندا «تاكتيكالىق مەرگەن» جارىسىنىڭ «جاۋىنگەر ەكەۋ» دەپ اتالاتىن ەكىنشى كەزەڭى ءوتتى. اسكەري قىزمەتشىلەر عيماراتتى شارتتى قارسىلاستان ازات ەتۋ تاپسىرمالارىن ورىندادى.

- اتالعان جاتتىعۋدى ورىنداۋ كەزىندە وقىس وقيعالاردى بولدىرماۋ ءۇشىن تورەشىلەر عيمارات ىشىندەگى اتقىشتاردىڭ جانىندا بولىپ، قاۋىپسىزدىك تەحنيكاسىنىڭ ساقتالۋىن باقىلايدى. مۇندا جاۋىنگەرلەر بىرگە جۇمىس ىستەي وتىرىپ، ەكەۋى دە بارىنشا مۇقيات جانە ساق بولۋى كەرەك، - دەدى سايىستىڭ تورەشىسى مايور عالىم سادىقوۆ.


كاسىبي شەبەرلىكتىڭ، جىلدام جانە ۇيلەسىمدى ءىس- قيمىلدىڭ ارقاسىندا قازاقستان كومانداسى جەڭىسكە جەتتى. ەكىنشى ورىندا قىتايدىڭ اسكەري اتقىشتارى، ءۇشىنشى ورىندا - وزبەكستان.

جامبىل وبلىسىنداعى «گۆاردەيسك» پوليگونىندا «ارتيللەريادان وق اتۋ شەبەرلەرى» سايىسىندا مينااتقىش ەسەپتوپتارىنىڭ ەكىنشى كەزەڭىنەن كەيىن، ياعني جەكە جارىس پەن تۇنگى سپرينت ناتيجەلەرى بويىنشا قازاقستاننىڭ اسكەري قىزمەتشىلەرى كوش باستاپ كەلەدى. ەكىنشى ورىندا رەسەي كومانداسى، ءۇشىنشى ورىندا - ازەربايجان.

ازەربايجان رەسپۋبليكاسىنىڭ اۋماعىنداعى تەڭىز پوليگونىندا ءوتىپ جاتقان «تەڭىز كۋبوگى» سايىسىنىڭ ەكىنشى كەزەڭى ءوتتى. اسكەري تەڭىزشىلەر تەڭىز نىسانالارىنا ارتيللەريادان وق اتتى. جاتتىعۋلاردى ورىنداۋ ناتيجەلەرى بويىنشا قازاقستاندىق تەڭىزشىلەر 87 ۇپايمەن ەكىنشى ورىنعا تابان تىرەدى، ال، ءبىرىنشى ورىندى 90 ۇپاي العان رەسەيلىك جانە ازەربايجاندىق اسكەري قىزمەتشىلەر ءوزارا ءبولىستى.

وسىعان دەيىن حالىقارالىق ارميا ويىندارىندا تانكيستەردىڭ ەكىنشى ەكيپاجى جەڭىسكە جەتكەنىن حابارلاعان ەدىك.



سوڭعى جاڭالىقتار