ماجارستان رەجيسسەرى قازاقستانداعى اشارشىلىق قاسىرەتى تۋرالى فيلم ءتۇسىردى - فوتو

نۇر-سۇلتان. قازاقپارات - «قازاق فيلم» كينوستۋدياسىندا اشارشىلىق تۋرالى «ءولىارا» اتتى تولىقمەتراجدى كوركەم فيلمى ءتۇسىرىلدى، دەپ حابارلايدى قازاقپارات كينوستۋديانىڭ باسپا ءسوز قىزمەتىنە سىلتەمە جاساپ.

« ءولىارا» كوركەم ءفيلمىنىڭ ءتۇسىرىلىمى 2021 -جىلعى 28-قازان مەن 7-جەلتوقسان ارالىعىندا الماتى وبلىسىندا ءوتتى. 2022 -جىلى شىلدە ايىندا كينوكارتينانىڭ مونتاجداۋ- ارلەۋ كەزەڭى باستالدى.

فيلمنىڭ سەناري اۆتورى نۇرلان سانجار، قويۋشى رەجيسسەرى ماجارستان رەسپۋبليكاسىنىڭ تۋماسى تاماش توت. فيلمنىڭ جەلىسى XX عاسىردىڭ 30-جىلدارىنداعى اشارشىلىق قاسىرەتىن باياندايدى.

«كارتينانىڭ سيۋجەتى بويىنشا يشتۆان ماديار «ساياسي كىناسىن» وتەۋ ءۇشىن قازاق جەرىنەجىبەرىلەدى. ول قارابايدىڭ جەدەل وتريادىنا ءتۇسىپ، كۋلاك مالىن جەدەل ىزدەۋمەن جانە تاركىلەۋمەن اينالىسادى. سول كەزدە ءوز كوزىمەن اشارشىلىق پەن جاۋىنگەرلەردىڭ قاتىگەزدىگىن كورىپ، توڭكەرىس تۋرالى كوزقاراسىن وزگەرتەدى. يشتۆان جەرگىلىكتى تۇرعىندارعا جاقتاسىپ، سولارمەن بىرگە قىزىل وزبىرلىقپەن كۇرەسۋگە تىرىسادى. باس كەيىپكەر امان قالىپ، قازاق حالقىنىڭ ۇلى قاسىرەتى تۋرالى شىندىقتى جەتكىزۋگە بار كۇشىن سالادى»، - دەدى فيلمنىڭ اتقارۋشى پروديۋسەرى جانسەرىك شونا ۇلى.

فيلمگە ەكى ەلدىڭ تانىمال اكتەرلەرى قاتىسقان. باستى رولدەردە ماجار ەلىنىڭ تەاتر جانە كينو اكتەرى پيتەر بارنا، بەلگىلى قازاقستاندىق اكتەرلەر الدابەك شالبايەۆ، ەرجان نۇرىمبەت جانە باسقالارى ويناعان.

كارتينانىڭ ۇلكەن ەكراندارعا شىعۋى 2023 -جىلعا جوسپارلانىپ وتىر.