«اتالارىمىز بىلگەن عوي». مالداس قۇرىپ وتىرۋدىڭ پايداسى بار ما؟
18 تامىز 21:46

«اتالارىمىز بىلگەن عوي». مالداس قۇرىپ وتىرۋدىڭ پايداسى بار ما؟

نۇر-سۇلتان.قازاقپارات - قازاق حالقىنىڭ وتىرۋ ادەبىنەن ءبىر ەرەكشەلىكتى بايقاۋعا بولادى. ول - مالداس قۇرۋ.

Massaget.kz ءتىلشىسى مالداس قۇرىپ وتىرۋ دەنساۋلىققا قانشالىق پايدالى ەكەنىن ءبىلۋ ماقساتىندا 20 جىلدىق تاجىريبەسى بار جوعارى ساناتتى نيەۆرولوگ گۇلزات دوسقارامەن سۇحباتتاستى.

«مالداس قۇرىپ وتىرۋ» تىركەسىنىڭ ءمانى قانداي؟

جامال مانكەيەۆا، ءالىمحان جۇنىسبەك سىندى عالىمدار قۇراستىرعان «قازاق ادەبي ءتىلىنىڭ سوزدىگىنە» سۇيەنسەك، مالداس قۇرۋ تىزەنى اشايتا بۇگىپ، اياعىن ايقاستىرا، استىنا الىپ وتىرۋ دەگەندى بىلدىرەدى.

نيەۆرولوگ نە دەيدى؟

«اتالارىمىز بىلگەن عوي» دەگەن تۇسىنىك قانشالىقتى راس؟ مالداس قۇرىپ وتىرۋدىڭ پايداسى بار ما؟ ۇزاق جىلدىق تاجىريبەسى بار مامان گۇلزات جەڭىسبەك قىزىنىڭ سوزىنشە، راسىندا دا بۇلاي وتىرۋ دەنساۋلىققا ايتارلىقتاي وڭ اسەر ەتەدى.

«مالداس قۇرىپ وتىرۋ اتا- بابامىزدان قالعان، بۇرىننان كەلە جاتىر. مالداس قۇرىپ وتىرۋ كەزىندە ەڭ الدىمەن مي جانە ميدىڭ بولىكتەرى دەم الادى، سونىمەن قاتار، جۇلىن، مويىن، كەۋدە، بەلومىرتقا، سەگىزكوز، قۇيىمشاققا دا كەرەمەت اسەرى بار. سەبەبى اعزامىز بوساڭسىپ، تىنىس العان كەزدە سايكەسىنشە ىشكى مۇشەلەرىمىز دە بوساڭسيدى»، - دەيدى مامان.

مالداس قۇرىپ وتىرۋ ادەتتە ەر ادامدارعا ءتان. الايدا مامان بۇل ءادىس ايەل ادامداردىڭ جىنىس مۇشەلەرىنە دە وڭ ىقپال ەتەتىنىن ايتتى.

«مالداس قۇرىپ وتىرعاندا، اسىرەسە، كىشى جامباس قۋىسىنداعى بۇلشىقەتتەر، قۋىق قىزمەتى، ايەل ادامنىڭ جىنىس مۇشەلەرى جانە ەر ادامنىڭ جىنىس مۇشەلەرىنىڭ قان اينالىمى جاقسارادى»، - دەيدى گۇلزات دوسقارا.

گۇلزات جەڭىسبەك قىزى مالداس قۇرىپ وتىرۋ بەلگىلى ءبىر اۋرۋلاردىڭ الدىن الۋدا كومەكتەسەتىنىن ەسكە سالدى.

«بۇل وتىرىس مويىن، كەۋدە، بەلومىرتقا اۋرۋلارىن، ياعني وستەوحوندروز، ليۋمبالگيا، ومىرتقا جارىعى سەكىلدى اۋرۋلاردىڭ الدىن الادى. سونداي- اق، اۋرۋ سەزىمىن باسەڭدەتىپ، قىسىلىپ قالعان جۇيكە تالشىقتارىن بوساڭسىتادى»، - دەيدى دارىگەر.

ەجەلگى ءۇندىستاندا باستاۋ العان يوگا تەراپياسىندا دا مالداس قۇرىپ وتىرعانعا ۇقساس قيمىل بار.

«كۇنىنە 2-3 مارتە نەمەسە ودان دا كوپ مالداس قۇرىپ وتىرىپ، دەنەڭىزدى جاتتىقتىرساڭىز كەز كەلگەن اۋرۋدىڭ الدىن الۋعا بولادى. ءتىپتى يوگا تەراپياسىندا مالداس قۇرىپ وتىرۋدى ءبىرىنشى ورىنعا قويادى، سەبەبى مي دەمالادى، تىنىس الۋ جولدارىنىڭ قىزمەتى جاقسارادى»، - دەيدى ول.

اقپارات دەرەككوزى: https://massaget.kz


جاڭالىقتار